ຮ່າໂນ້ຍ ເລັ່ງອອກກວດຫາເຊື້ອໄວຣັສໂຄວິດ-19ໃຫ້ປະຊາຊົນ ພຽງ 10 ນາທີຮູ້ຜົນ
ລູກເມືອງພວນ
ແຫຼ່ງຂ່າວຈາກ TTO ຂອງຫວຽດນາມ, ວັນທີ 30 ມີນານີ້ ໃຫ້ຮູ້ວ່າ: ນະຄອນຫຼວງຮ່າໂນ້ຍ ໄດ້ແຕ່ງຕັ້ງໜ່ວຍແພດໝໍເຄື່ອນທີ່ອອກເປັນ 10 ຈຸ ເພື່ອລົງກວດຫາເຊື້ອໄວຣັສໂຄວິດ-19 ໃຫ້ປະຊາຊົນຢູ່ 10 ຈຸດທົ່ວພື້ນທີ່ຂອງນະຄອນຫຼວງ ຮ່າໂນ້ຍ.
ທ່ານ ຈຸງ ເຈົ້າຄອງນະຄອນ ຮ່າໂນ້ຍໃຫ້ຮູ້ວ່າ: “ການກວດຫາເຊື້ອໄວຣັສໂຄວິດ-19, ໂດຍການເຈາະເອົາເລືອດໄປກວດ ພຽງ 10 ນາທີກໍຈະຮູ້ຜົນ. ເຄື່ອງກວດນີ້ມີຄວາມວ່ອງໄວ ແລະ ຊັດເຈນ ຊຶ່ງຜະລິດໂດຍ ສ ເກົາຫຼີ” .
ທ່ານໃຫ້ຮູ້ຕື່ມອີກວ່າ: “ໃນເບື້ອງຕົ້ນ, ວັນທີ 30 ມີນານີ້ ຈະຈັດຕັ້ງເປັນ 3 ຈຸ ເພື່ອກວດຢູ່ອ້ອມຮອບໂຮງໝໍ ແບັກມາຍກ່ອນ”
ເຈົ້າຄອງນະຄອນໃຫ້ຮູ້ອີກວ່າ: ທ່ານໄດ້ເຊື່ອເຊີນເອົາຄົນຫວຽດນາມທີ່ດຳລົງຊີວິດຢູ່ ສ ເກົາຫຼີ ແລະ ຢູ່ສະຫະລັດອາເມລິການ ອອກແບບ ເຕັ້ນ ກວດເຄື່ອນທີ່ ທີ່ໄດ້ມາດຕະຖານຂອງອົງການອານາໄມໂລກໃຫ້. ແຕ່ລະເຕັ້ນມີຄວາມກວ້າງ 3×3ມ, ປະກອບມີ: ໂຕະ ແລະ ອຸປະກອນ, ເຄື່ອງມືຄົບຊຸດ ຊຶ່ງສາມາດເຮັດວຽກໄດ້ຕະຫຼອດ 24 ຊົ່ວໂມງ./.
