“ໂຄວິດ-19” ຂ້າຊີວິດຊາວມຽນມາຄົນທຳອິດ

     ທາງການມຽນມາລາຍງານຜູ້ເສຍຊີວິດຄົນທຳອິດຈາກການຕິດເຊື້ອໄວຣັສໂຄໂຣນາສາຍພັນໃໝ່ ເປັນຜູ້ຊາຍຊາວເມືອງຢາງກຸ້ງ ມີໂຣກປະຈຳຕົວ ແລະ ມີປະຫວັດເດີນທາງໄປຕ່າງປະເທດ.

     ກະຊວງສາທາລະນະສຸກຂອງມຽນມາອອກຖະແຫລງການໃນວັນທີ 31 ມີນາ ເລື່ອງຜູ້ເສຍຊີວິດຄົນທຳອິດໃນປະເທດ ທີ່ເປັນຜົນຈາກການຕິດເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19” ຄື “ຜູ້ປ່ວຍຄົນທີ 5” ເປັນຜູ້ຊາຍຊາວມຽນມາ ອາຍຸ 69 ປີ ມີພູມລຳເນົາຢູ່ເມືອງຢາງກຸ້ງ ເຂົ້າຮັບການປິ່ນປົວຢູ່ໂຮງໝໍກາງໃນເມືອງຢາງກຸ້ງ ເມື່ອວັນທີ 25 ມີນາ ໄດ້ຮັບການຢືນຢັນວ່າຕິດເຊື້ອເມື່ອວັນທີ 27 ມີນາ ແລະ ເສຍຊີວິດໃນຕອນເຊົ້າຕາມເວລາທ້ອງຖິ່ນຂອງວັນທີ 31 ມີນາ.

    ຜູ້ປ່ວຍຄົນດັ່ງກ່າວເດີນທາງກັບມາເມືອງຢາງກຸ້ງ ໃນວັນທີ 14 ມີນາຜ່ານມາ ຫລັງເຂົ້າຮັບການປິ່ນປົວທາງການແພດຢູ່ອົດສະຕຣາລີເປັນເວລາ 1 ເດືອນ ແລະ ແວ່ພັກຢູ່ສິງກະໂປອີກ 4 ວັນ. ທັງນີ້ ການເສຍຊີວິດຂອງຜູ້ປ່ວຍຄົນທີ 5 ເຮັດໃຫ້ມຽນມາເຫລືອຜູ້ປ່ວຍເຂົ້າຮັບການປິ່ນປົວຈາກໂຣກໂຄວິດ-19 ຢ່າງໜ້ອຍ 13 ຄົນ ສ່ວນຫລາຍມີປະຫວັດການເດີນທາງໄປຕ່າງປະເທດໃນຮອບ 14 ວັນຫລ້າສຸດກ່ອນບໍ່ສະບາຍ ແລະ ໜຶ່ງໃນຜູ້ທີ່ກຳລັງເຂົ້າຮັບການປິ່ນປົວຄືຜູ້ຍິງຊາວສະວິດ ອາຍຸ 58 ເປັນເຈົ້າໜ້າທີ່ສະຫະປະຊາຊາດ (UN) ປະຈຳມຽນມາ.