ຊົມເຊີຍມິດຕະພາບທີ່ຍິ່ງໃຫ່ຍລາວ-ຈີນ

ລູກເມືອງພວນ

ສະບາຍດີທ່ານຜູ້ອ່ານທີ່ຮັກແພງທັງຫລາຍ, ດັ່ງທີ່ທຸກຄົນຮູ້ນຳກັນແລ້ວວ່າທົ່ວທັງໂລກໃຜກໍຮູ້ດີວ່າ ເຊື້ອໄວຣັສ ໂຄໂຣນາ ຫຼື ໂຄວິດ-19 ມີກົກເຫງົ້າມາຈາກເມືອງອູຮັ່ນ ແຂວງຫູເປີຍ ປະເທດຈີນ. ໃນຊ່ວງເດືອນມັງກອນຫາຕົ້ນເດືອນມີນານີ້, ພະຍາດດັ່ງກ່າວໄດ້ລະບາດຢ່າງຮ້າຍແຮງທີ່ສຸດໃນປະເທດຈີນ ຊື່ງປະຊາຊາດໃນໂລກລ້ວນແຕ່ມີຄວາມກໍວິຕົກກັງວົນ ແລະ ເປັນຫ່ວງຢ່າງສູງຕໍສະຖານະການດັ່ງກ່າວໃນຈີນ.

ຕໍ່ໜ້າສະພາບການດັ່ງກ່າວ, ລັດຖະບານຈີນໄດ້ຕັດສິນໃຈເຮັດທຸກສິ່ງທຸກຢ່າງ ເພື່ອປ້ອງກັນ, ຕ້ານ ແລະ ສະກັດກັ້ນພະຍາດດັ່ງກ່າວດ້ວຍພະລັງແຮງມະກາສາມັກຄີທົ່ວປວງຊົນ ແລະ ດ້ວຍເທັກໂນໂລຢີທີ່ທັນສະໄໝ.

ພາຍໃນ 2 ເດືຶອນປາຍເທົ່ານັ້ນ, ຢູ່ໃນຈີນມີຜູ້ຕິດເຊື້ອຫຼາຍກວ່າ 82,133 ກວ່າຄົນ ແລະ ເສຍຊີວິດ 3.182 ພັນກວ່າຄົນ. 

ດ້ວຍພະລັງແຫ່ງຄວາມສາມັກຄີຂອງປະຊາຊົນທັງຊາດ ຈີນສາມາດຍາດເອົາຊະນະກັບພະຍາດດັ່ງກ່າວເປັນກ້າວໆມາ. ຊຶ່ງມາເຖິງວັນທີ 19 ເດືອນມີນາ ບໍ່ມີຜູ້ຕິດເຊື້ອໃນຈີນເພີ່ມເຕີມແມ່ນແຕ່ຄົນດຽວເປັນວັນທຳອິດ. ນີ້ຄືໄຊຊະນະທີ່ຍິ່ງໃຫ່ຍ ທີ່ຊາຊົນຈີນຍາດມາໄດ້. ນັບແຕ່ນັ້ນເປັນຕົ້ນມາ ສະຖານະການຢູ່ໃນຈີນກໍຄ່ອຍໆກັບຄືນເຂົ້າສູ່ສະພາບເປັນປົກກະຕິຢ່າງໄວວາຈົນເທົ່າທຸກວັນນີ້.

ເມື່ອສະພາບການຢູ່ພາຍໃນປະເທດຄ່ອຍໆສະຫງົບລົງ. ໂດຍມູນເຊື້ຶອ ປະເພນີອັນດີງາມຂອງຈີນ, ຍາມເພື່ອນຕົກທຸກໄດ້ຍາກ ” ເຂົ້າເມັດຫັກຜັກເສັ້ນໜຶ່ງກໍແບ່ງກັນກິນ”, ເຖິງແມ່ນສະພາບການພາຍໃນປະເທດຂອງຕົນຍັງບໍ່ທັນສະເດັດນໍ້າຢ່າງແທ້ຈິງກໍຕາມ ແຕ່ຈີນກໍໄດ້ສະແດງໃຫ້ເຫັນນໍ້າໃຈສາມັກຄີທີ່ຜອງໃສຂອງຕົນຕໍ່ມະນຸດຊາດດ້ວຍກັນຢ່າງໜ້າປະທັບໃຈ ແລະ ເປັນໜ້າຍົກຍ້ອງສັນລະເສີນທີ່ສຸດ.

ບົນພື້ນຖານຈິດໃຈສາກົນກຳມະຊີບທີ່ຜ່ອງໃສຈີນໄດ້ໃຫ້ການຊ່ວຍເຫຼືອບາງປະເທດຈຳນວນໜຶ່ງໃນໂລກທີ່ມີການລະບາດຂອງພະຍາດ ເຊັ່ນ: ໃຫ້ການຊ່ວຍເຫຼືອ 89 ປະເທດ ແລະ 4 ອົງການຈັດຕັ້ງສາກົນ, ເປັນຕົ້ນແມ່ນໄດ້ສົ່ງທີມແພດໝໍ ແລະ ຊ່ຽວຊານໄປຊ່ວຍ ປະເທດ ອີຕາລີ…ແລະ ມາບັດນີ້, ລັດຖະບານ ແລະ ປະຊາຊົນຈີນກໍໄດ້ສົ່ງທີມແພດໝໍ ແລະ ຊ່ຽວຊານຈຳນວນ 12 ທ່ານພ້ອມດ້ວຍອຸປະກອນການແພດມາຊ່ວຍປະຊາຊົນລາວຢ່າງທັນການ. ຊຶ່ງການຊ່ວຍເຫຼືອໃນຄັ້ງນີ້ມັນຢັ້ງຢືນເຖິງຄວາມສຳພັນທີ່ໜັກແໜ້ນ, ຄວາມສາມັກຄີທີ່ເປັນມູນເຊື້ອຂອງສອງຊາດທີ່ມີມາແຕ່ດຶກດຳບັນ ຊຶ່ງພວກເຮົາທັງສອງປະເທດບໍ່ສາມາດຈະຖີ້ມກັນໄດ້ໃນເມື່ອປະເທດໃດໜຶ່ງພົບກັບຄວາມຂັບຂັນ.

ລາວ ແລະ ຈີນ ເປັນສອງປະເທດທີ່ມີຄວາມສຳພັນສາມັກຄີໄມຕີຈິດຮັກແພງກັນມາໄດ້ຫຼາຍຊົ່ວຄົນ ຈົນກາຍເປັນມູນເຊື້ອ ແລະ ມໍລະດົກຂອງສອງຊາດທີ່ຂາດກັນບໍ່ໄດ້. ນີ້ຄືຕົວແບບທີ່ດີງາມ ແລະ ສົດໃສທີ່ສຸດ ໃນສາຍພົວພັນສາກົນທີ່ມີຄວາມຜ່ອງໃສແບບນີ້.

ຕອນບ່າຍຂອງວັນທີ່ 29 ມີນາ 2020 ນີ້, ຖ້ຽວບິນຊ່ວຍເຫຼືອລາວກໍໄດ້ບິນມາເຖິງນະຄອນຫຼວງວຽງຈັນ. ການຊ່ວຍເຫຼືອຄັ້ງນິ້ລວມມີທີມແພດໝໍ ແລະ ຊ່ຽວຊານຈຳນວນ 12 ທ່ານ ພ້ອມດ້ວຍອຸປະກອນການແພດເປັນມູນຄ່າ 4,17 ຕື້ ຢວນ (ສະກຸນເງິນຂອງຈີນ).

ຕໍ່ຄຸນງາມຄວາມດີຂອງລັດຖະບານ ແລະ ປະຊາຊົນຈີນນັ້ນ, ລັດຖະບານລາວ ແລະ ປະຊາຊົນລາວຂໍສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງມາຍັງລັດຖະບານລາວ ແລະ ປະຊາຊົນຈີນ ນະໂອກາດນີ້ຢ່າງເລິກເຊີ່ງ.

ອວຍພອນໃຫ້ຄວາມສາມັກຄີມິດຕະພາບ ແລະ ສາຍພົວພັນອັນດີງາມທີ່ເປັນມູນເຊື້ອຂອງສອງຊາດລາວ-ຈີນຈົ່ງໝັ້ນຄົງຂະນົງແກ່ນຕະຫຼອດໄປ. ນໍ້າໃຈສາມັກຄີແບບບ້ານໃກ້ເຮືອນຄຽງຈົ່ງໝັ້ນຍືນຕະຫຼອດການ. ປະຊາຊົນລາວ ແລະ ປະຊາຊົນຈີນຈົ່ງພ້ອມກັນຕີເອົາຊະນະສັດຕູໂຄວິດ-19 ຄັ້ງນີ້ຢ່າງມີໄຊ./.