ຫວຽດນາມປິດເມືອງຊົ່ວຄາວ-ຫ້າມລວມກຸ່ມເກີນ 20 ຄົນ
ລັດຖະບານຫວຽດນາມສັ່ງປິດສະຖານປະກອບການ “ທີ່ບໍ່ຈຳເປັນ” ເຖິງກາງເດືອນເມສາ ແລະ ຫ້າມການລວມກຸ່ມຫລາຍກວ່າ 20 ຄົນ ເພື່ອຫລຸດຄວາມສ່ຽງການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່.
ສະຖານປະກອບການຢູ່ຫວຽດນາມ ລວມທັງຮ້ານນວດ, ໂຮງລະຄອນ, ຮ້ານຄາລາໂອເກະ, ຮ້ານຕັດຜົມ ແລະ ສະຖານເສີມຄວາມງາມ ໄດ້ປິດບໍລິການນັບແຕ່ວັນທີ 28 ມີນາຜ່ານມາ ຕາມຄຳສັ່ງຂອງນາຍົກລັດຖະມົນຕີ ຫງວຽນຊວນຟຸກ ເຊິ່ງບັງຄັບໃຊ້ເຖິງວັນທີ 15 ເມສານີ້ ເພື່ອຢັບຢັ້ງການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19”.
ສ່ວນຮ້ານອາຫານໃຫ້ບໍລິການສະເພາະຊື້ເມືອເຮືອນ, ຕະຫລາດ, ມິນິມາກ, ຮ້ານຂາຍເຄື່ອງຍ່ອຍ, ຮ້ານຂາຍຢາ, ທະນາຄານ ແລະ ສະຖານີບໍລິການນ້ຳມັນຍັງເປີດໃຫ້ບໍລິການຕາມປົກກະຕິ, ແຕ່ຈຳກັດຈຳນວນຜູ້ໃຊ້ບໍລິການບໍ່ເກີນ 20 ຄົນຕໍ່ຄັ້ງ ເຊັ່ນດຽວກັບກິດຈະກຳທາງສາສະໜາ ແລະ ການລວມກຸ່ມໂດຍທົ່ວໄປ ຖ້າມີການຝ່າຝືນໂດຍສະເພາະໃນພື້ນທີ່ມີອັດຕາການແຜ່ລະບາດສູງ ຜູ້ກະທຳຜິດອາດຖືກປັບໄໝສູງເຖິງ 30 ລ້ານດົງ.
ນອກຈາກນີ້ ລັດຖະບານໄດ້ກະຕຸ້ນໃຫ້ໜ່ວຍງານຢູ່ທ້ອງຖິ່ນຂະຫຍາຍຂອບເຂດການກວດຄັດກອງປະຊາຊົນ ໂດຍນະຄອນຫລວງຮ່າໂນ້ຍ ແລະ ໂຮ່ຈີ ມິນຕ້ອງເພີ່ມຈຳນວນສະຖານທີ່ໃຫ້ບໍລິການກວດຫາເຊື້ອໄວຣັສໂຄໂຣນາສາຍພັນໃໝ່ ທີ່ລັດຖະບານຕັ້ງເປົ້າໝາຍບໍ່ໃຫ້ມີຜູ້ປ່ວຍພາຍໃນປະເທດ “ເກີນ 1.000 ຄົນ” ປັດຈຸບັນຫວຽດນາມມີຜູ້ຕິດເຊື້ອຈາກໂຣກໂຄວິດ-19 ຢ່າງໜ້ອຍ 188 ຄົນ ນັບແຕ່ມີການຢືນຢັນຜູ້ປ່ວຍຄົນທຳອິດໃນວັນທີ 23 ມີນາຜ່ານມາ, ປິ່ນປົວດີແລ້ວ 25 ຄົນ ໂດຍຍັງບໍ່ມີຜູ້ເສຍຊີວິດ.
