ຄວາມບໍ່ເອົາໃຈໃສ່ໃນການປ້ອງກັນຕົວເອງ ອາດເປັນການກະທຳຜິດດ້ານລະບຽບໄດ້

ຄະນະສະເພາະກິດສະກັດກັ້ນ ແລະ ຄວບຄຸມການລະບາດຂອງເຊື້ອພະຍາດໂຄວິດ-19 ໃຫ້ຮູ້ວ່າ: ໃນປັດຈຸບັນການແຜ່ລະບາດຂອງເຊື້ອພະຍາດດັ່ງກ່າວຢູ່ຫລາຍປະເທດ ກໍຄື ສປປ ລາວ ສ່ວນໜຶ່ງແມ່ນເກີດມາຈາກ ການ ຂາດຄວາມຮັບຜິດຊອບ ແລະ ບໍ່ເອົາໃຈໃສ່ໃນການປ້ອງກັນໂຕເອງ ຫລື ສັງຄົມເຮົາຈຳນວນໜຶ່ງ ແລະ ກໍມີຫລາຍປະເທດໄດ້ເອົາບັນຫາດັ່ງກ່າວເຂົ້າສູ່ລະບຽບກົດຫມາຍ, ທັງນີ້ກໍເພື່ອສະກັດກັ້ນ ແລະ ຄວບຄຸມການແຜ່ລະບາດຂອງເຊື້ອພະຍາດນີ້ໃຫ້ມີປະສິດທິຜົນ.

ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ກ່າວວ່າ: ເຊື້ອພະຍາດດັ່ງກ່າວ, ເຖິງວ່າຕິດຕໍ່ໃສ່ກັນບໍ່ງ່າຍປານໃດ, ແຕ່ຖ້າຫາກທຸກຄົນ ບໍ່ເອົາໃຈໃສ່ປະຕິບັດບັນດາມາດຕະການປ້ອງກັນຕ່າງໆ ຢ່າງເຂັ້ມງວດ ແລະ ໃຫ້ຄວາມຮ່ວມມືກັບເຈົ້າໜ້າທີ່ ຫລື ແພດໝໍໍແລ້ວ, ກໍຈະເຮັດໃຫ້ເຊື້ອພະຍາດນີ້ ແຜ່ລະບາດໄປເປັນບໍລິເວນກວ້າງໄດ້,ໂດຍສະເພາະ ບຸກ ຄົນທີ່ເດີນທາງມາຈາກປະເທດທີ່ມີການແຜ່ລະບາດຂອງເຊື້ອພະຍາດດັ່ງກ່າວ ຫລື ມີການໃກ້ສິດກັບຜູ້ຕິດເຊື້ອ, ຕ້ອງມີຄວາມຕື່ນຕົວ ປະຕິບັດການຈຳກັດບໍລິເວນໂຕເອງຄົບກຳນົດ 14 ວັນ ຕາມຫລັກການແພດຢ່າງຈິງຈັງ ແລະ ມີການປ້ອງກັນຕົນເອງຈິ່ງຈະແມ່ນການປະພຶດທີ່ດີໄດ້. ຖ້າບໍ່ກໍແມ່ນຈຸດນີ້ເອງທີ່ ຈະກາຍເປັນຈຸດເລີ່ມຕົ້ນຂອງການແຜ່ເຊື້ອພະຍາດນີ້.

ສະນັ້ນຂໍໃຫ້ທຸກຄົນຈົ່ງເປັນເຈົ້າການນຳກັນ ໃນການປ້ອງກັນຕົນເອງ, ຄົນອ້ອມຂ້າງ ແລະ ໃຫ້ຄວາມຮ່ວມມືກັບເຈົ້າໜ້າທີ່ ເພື່ອຊ່ວຍສະກັດກັ້ນການແຜ່ລະບາດຂອງເຊື້ອພະຍາດທີ່ບໍ່ເພິ່ງປາຖະໜາດັ່ງກ່າວ ເພາະວຽກງານການປ້ອງການ, ສະກັດກັ້ນ ແລະ ຄວບຄຸມໂຣກຮ້າຍນີ້ ບໍ່ແມ່ນໜ້າທີ່ສະເພາະແຕ່ຂອງລັດ ຖະບານພຽງຜູ້ດຽວເທົ່ານັ້ນ, ແຕ່ມັນເປັນໜ້າທີ່ຂອງພົນລະເມືອງທຸກຄົນ. ຄວາມສາມັກຄີ, ຄວາມເປັນຈິງໜຶ່ງໃຈດຽວ, ການມີສະຕິ ແລະ ຄິດເຫັນຜົນປະໂຫຍດສ່ວນລວມໃຫ້ຫລາຍຂຶ້ນ ກໍຈະສາມາດເຮັດໃຫ້ປະເທດຊາດ ຂອງພວກເຮົາ ຜ່ານພົ້ນວິກິດການນີ້ໄປໄດ້ໂດຍດີ.