ໂຕກຽວພົບຜູ້ຕິດເຊື້ອໂຄວິດ-19 ຄົນໃໝ່ ເພີ່ມ 60 ຄົນ ສູງທີ່ສຸດໃນວັນດຽວ
March 28, 2020 - 7:00 PM
ສຳນັກຂ່າວກຽວໂດລາຍງານວ່າ: ນະຄອນຫລວງໂຕກຽວ ເມືອງຫລວງຂອງຍີ່ປຸ່ນ ພົບຜູ້ຕິດເຊື້ອໄວຣັສໂຄວິດ-19 ຄົນໃໝ່ ເພີ່ມຂຶ້ນ 60 ຄົນ ເຊິ່ງຖືເປັນການເພີ່ມຂຶ້ນຫລາຍທີ່ສຸດໃນວັນດຽວ ສົ່ງຜົນໃຫ້ຍອດລວມຜູ້ຕິດເຊື້ອທັງໝົດຂອງນະຄອນຫລວງໂຕກຽວໃນປັດຈຸບັນມີຈຳນວນ 350 ກວ່າຄົນ ສູງທີ່ສຸດໃນບັນດາ 47 ເຂດຂອງຍີ່ປຸ່ນ.
ທັງນີ້ ໂຕກຽວມີຜູ້ຕິດເຊື້ອໃໝ່ເພີ່ມຂຶ້ນ 40 ກວ່າຄົນຕໍ່ວັນໃນໄລຍະ 3 ວັນຜ່ານມາ.
ທ່ານ ນາງ ຢູຣິໂກະ ໂຄອິເກະ ເຈົ້າຄອງນະຄອນຫລວງໂຕກຽວ ອອກມາຖະແຫລງເຕືອນໃນວັນທີ 27 ມີນາວ່າ: ນະຄອນຫລວງໂຕກຽວກຳລັງຜະເຊີນສະຖານະການການແຜ່ລະບາດທີ່ຮຸນແຮງ ແລະ ຮຽກຮ້ອງໃຫ້ປະຊາຊົນຢູ່ແຕ່ໃນເຮືອນໃນຊ່ວງທ້າຍອາທິດນີ້ ເພື່ອສະກັດກັ້ນການແຜ່ລະບາດຂອງໄວຣັສໂຄວິດ-19.