ລາວພົບຜູ້ຕິດເຊື້ອເພີ່ມ 2 ຄົນ ລວມ ເປັນ 8 ຄົນ
ທ່ານ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ COVID-19 ໄດ້ຖະແຫລງຂ່າວຕໍ່ສື່ມວນຊົນວ່າ: ມາຮອດວັນທີ 28 ມີນານີ້, ສປປ ລາວ ໄດ້ກວດພົບຜູ້ຕິດເຊື້ອຕື່ມອີກ 2 ຄົນຄື: ຜູ້ທີ 1 ເພດຍິງ, ອາຍຸ 50 ປີ, ສັນຊາດ ລາວ,ຢູ່ບ້ານວິຊຸນ, ນະຄອນຫຼວງພະບາງ, ເປັນເມຍ ຂອງຜູ້ຕິດເຊື້ອ ທີ່ເປັນຄົນຂັບລົດໃຫ້ແກ່ກຸ່ມທົວທີ່ລາຍງານໄປໃນກ່ອນໜ້ານີ້.ສ່ວນຜູ້ທີ 2 ເພດຊາຍ, ອາຍຸ 18 ປີ, ຢູ່ບ້ານ ດອນນົກຂຸ້ມ, ເມືອງ ສີສັດຕະນາກ, ນະຄອນຫຼວງວຽງຈັນ, ເປັນພະນັກງາບໍລິສັດ DHL ທີ່ໄດ້ໃກ້ຊິດສໍາພັດ ກັບຜູ້ຕິດເຊື້ອກໍລະນີທີ່ສາມ ທີ່ເປັນນັກທຸລະກິດ.
ມາຮອດປະຈຸບັນລາວໄດ້ກວດຫາເຊື້ອຜູ້ຕ້ອງສົງໃສ ທັງໝົດ 276 ກໍລະນີ, ໃນນັ້ນໄດ້ພົບຜູ້ຕິດເຊື້ອແລ້ວ 8 ກໍລະນີ ແລະ ປດຈຸບັນ ນັກລະບາດວິທະຍາພາກສະໜາມ ໄດ້ເລັ່ງສືບຕໍ່ຄົ້ນຫາຜູ້ທີ່ສຳພັດໃກ້ຊິດທັງໝົດ 235 ກໍລະນີ.
ຄະນະສະເພາະກິດໄດ້ແນະນຳໃຫ້ປະຊາຊົນບັນດາເຜົ່າເອົາໃຈໃສ່ຮັກສາສຸຂະພາບກາຍ ແລະ ສຸຂະພາບຈິດ ຕົນເອງຄື:
• ກິນອາຫານທີ່ມີປະໂຫຍດ ຕາມຫຼັກໂພສະນາການ ເພື່ອເສີມສ້າງ ລະບົບພູມຄຸ້ມກັນຮ່າງກາຍໃຫ້ແຂງແຮງ
• ຫຼຸດຜ່ອນການດື່ມທາດເຫຼົ້າ ແລະ ເຄື່ອງດື່ມທີ່ມີນໍ້າຕານ
• ບໍ່ໃຫ້ສູບຢາ ເພາະວ່າ ມັນເພີ້ມຄວາມສ່ຽງຫຼາຍຂື້ນ ເພາະເມື່ອຕິດພະຍາດນີ້ມັນຈະເຮັດໃຫ້ ລະບົບຫາຍໃຈຂອງທ່ານເກີດຄວາມເສບຫາຍ
• ອອກກຳລັງກາຍເພື່ອໃຫ້ສຸຂະພາບແຂງແຮງ
• ເບິ່ງແຍງສຸຂະພາບຈິດຕົນເອງໃຫ້ດີ, ຄວາມເຂົ້າໃຈ, ເມດຕາກະລຸນາ ແມ່ນເປັນຢາທີ່ດີ, ສົນທະນາ ແລະ ປຶກສາຫາສື ກັບໝູ່ຄູ່ຢ່າງສະໝໍ່າສະເໝີ, ຊ່ວຍເຫຼືອຄົນອ້ອມ
• ຫຼີກລ້ຽງການຕິດຕາມຂ່າວຫຼາຍຈົນເກີນໄປ ເພາະມັນຈະເຮັດໃຫ້ທ່ານເກີດຄວາມວິຕົກກັງວົນ, ຄວນຮັບຟັງຂໍ້ມູນຂ່າວສານຈາດແຫຼ່ງຂ່າວທາງການ 1-2 ເທື່ອຕໍ່ມື້ ກໍພຽງພໍ ເພື່ອຮັບຟັງຄວາມຄືບໜ້າ ແລະ ວິທີການປະຕິບັດຈາກ ທາງການ
ຕໍ່ຜູ້ສຳຜັດໃກ້ຊິດກັບຄົນທີ່ຢັ້ງຢືນ ວ່າຕິດເຊື້ອແລ້ວ,ໃຫ້ຈຳກັດບໍລິເວນຕົນເອງໃຫ້ຄົບ 14 ວັນ ຕາມຂໍ້ແນະນຳຂອງການແພດ,ໃຫ້ແຈ້ງຕົນເອງໄດ້ສຳຜັດໃກ້ຊິດ ຫຼື ສະຖານທີ່ ໄດ້ໄປ ຫຼັງຈາກສຳຜັດໃກ້ຊິດກັບຜູ້ທີ່ຕິດເຊື້ອແລ້ວນັ້ນເພື່ອຈະໄດ້ຕິດຕາມ ອາການຂອງຕົນເອງ, ຖ້າມີອາການ ໄຂ້, ໄອ, ເຈັບຄໍ, ຫາຍໃຈຝຶດ ແມ່ນໃຫ້ລາຍງານແພດ ຫຼື ໂຮງໝໍຢູ່ໃກ້ບ້ານທ່ານ ເພື່ອຂໍຄຳແນະນຳ ຫຼື ໂທຫາສາຍດ່ວນ 166, ໄດ້ທຸກເວລາ.
