ສິງກະໂປຄຸມເຂັ້ມຮັກສາໄລຍະຫ່າງທາງສັງຄົມ ຝ່າຝືນຕິດຄຸກ
ສິງກະໂປຄຸມເຂັ້ມມາດຕະການຮັກສາໄລຍະຫ່າງທາງສັງຄົມ ເພື່ອປ້ອງກັນໂຣກຕິດເຊື້ອໄວຣັສໂຄໂຣນາ 2019 ຫລື ໂຄວິດ-19 ລະບາດ ດ້ວຍການລົງໂທດຈຳຄຸກຜູ້ທີ່ເຈດຕະນາໃກ້ກັບຄົນອື່ນ ເລີ່ມບັງຄັບໃຊ້ນັບແຕ່ມື້ນີ້.
ສິງກະໂປໃຊ້ມາດຕະການເຂັ້ມງວດໃນການຄວບຄຸມໄວຣັສໂຄໂຣນາເຊັ່ນ: ໃຊ້ຕຳຫລວດ ແລະ ກ້ອງວົງຈອນປິດຊ່ວຍຕາມຫາຜູ້ຕ້ອງສົງໄສຕິດເຊື້ອ, ປິດສະຖານບັນເທີງ, ຈຳກັດການລວມຕົວບໍ່ເກີນ 10 ຄົນ ຍົກເວັ້ນສະຖານທີ່ເຮັດວຽກ ແລະ ສະຖານສຶກສາ, ຫ້າມຈັດງານໃຫຍ່. ຫລ້າສຸດກຳນົດໃຫ້ຜູ້ເຈດຕະນານັ່ງໃກ້ຜູ້ອື່ນບໍ່ເກີນ 1 ແມັດ ຢູ່ບ່ອນສາທາລະນະ, ນັ່ງຕັ່ງທີ່ຖືກກຳນົດຫ້າມນັ່ງ ຫລື ຢືນຕໍ່ແຖວຫ່າງຈາກຜູ້ອື່ນບໍ່ເກີນ 1 ແມັດ ຖືວ່າມີຄວາມຜິດ ມີໂທດປັບໄໝສູງສຸດ 10.000 ໂດລາສິງກະໂປ ຫລື ຕິດຄຸກສູງສຸດ 6 ເດືອນ ມີຜົນນັບແຕ່ມື້ນີ້ຈົນເຖິງວັນທີ 30 ເມສາ ຄວບຄຸມທັງບຸກຄົນທົ່ວໄປ ແລະ ທຸລະກິດ.
ທາງການເຕືອນວ່າ: ອາດບັງຄັບໃຊ້ມາດຕະການຮັກສາໄລຍະຫ່າງທາງສັງຄົມທີ່ເຂັ້ມງວດຍິ່ງຂຶ້ນ ຖ້າປະຊາຊົນບໍ່ປະຕິບັດຕາມຢ່າງເຄັ່ງຂັດ. ເຖິງຢ່າງໃດກໍດີ, ຮອດປັດຈຸບັນ ສິງກະໂປຍັງບໍ່ໄດ້ປິດປະເທດເຮັມຮູບແບບຄືອິຕາລີ, ອັງກິດ, ນິວຊີແລນ. ຂະນະທີ່ຈຳນວນຜູ້ປ່ວຍໂຄວິດ-19 ເພີ່ມຂຶ້ນ 52 ຄົນ ເປັນ 683 ຄົນໃນວັນທີ 26 ມີນາ ເສຍຊີວິດເທົ່າເກົ່າ 2 ຄົນ.
