ຈຳນວນຜູ້ເສຍຊີວິດ COVID-19 “ອິຕາລີ” ບັນລຸ 8.215 ຄົນ ສູງສຸດໃນໂລກ

      ສຳນັກຂ່າວ BBC ລາຍງານວ່າ: ອິຕາລີມີຜູ້ເສຍຊີວິດຈາກໄວຣັສໂຄໂຣນາສາຍພັນໃໝ່ ຕົ້ນຕໍເກີດໂຣກໂຄວິດ-19 ເພີ່ມອີກ 712 ຄົນພາຍໃນເວລາ 24 ຊົ່ວໂມງ ນັບແຕ່ຄືນວັນທີພຸດເຖິງວັນພະຫັດທີ 26 ມີນາ ເຮັດໃຫ້ຈຳນວນຜູ້ເສຍຊີວິດທົ່ວປະເທດຫລ້າສຸດມີ 8.215 ຄົນແລ້ວ.

     ກ່ອນໜ້ານີ້ ສຳນັກງານປ້ອງກັນພົນລະເຮືອນອິຕາລີ ລະບຸວ່າ: ພົບຜູ້ເສຍຊີວິດ 662 ຄົນໃນໄລຍະເວລາດັ່ງກ່າວ, ແຕ່ຂໍ້ມູນຂອງພວກເຂົາບໍ່ໄດ້ລວມຜູ້ເຄາະຮ້າຍ 50 ຄົນຢູ່ແຄວ້ນພີດມອນ ທາງຕາເວັນຕົກສຽງເໜືອຂອງປະເທດເຂົ້າໄປນຳ.

     ສຳນັກງານປ້ອງກັນພົນລະເຮືອນອິຕາລີ ຊີ້ວ່າ: ຕົວເລກຜູ້ເສຍຊີວິດຫລ້າສຸດ ສະແດງໃຫ້ເຫັນວ່າອັດຕາການເສຍຊີວິດລາຍວັນເພີ່ມຂຶ້ນຈາກວັນພຸດ ທີ່ພົບຜູ້ເສຍຊີວິດ 683 ຄົນ ເຊິ່ງຫລຸດລົງຈາກ 743 ຄົນໃນວັນອັງຄານຜ່ານມາ. ຂະນະທີ່ວັນທີ່ມີຜູ້ເສຍຊີວິດຫລາຍທີ່ສຸດຂອງອິຕາລີຄືວັນເສົາທີ 21 ມີນາ ພົບຜູ້ເສຍຊີວິດເຖິງ 793 ຄົນໃນ 24 ຊົ່ວໂມງ.

     ເຖິງຢ່າງໃດກໍຕາມ, ອັດຕາຜູ້ຕິດເຊື້ອໃໝ່ແຕ່ລະວັນໄດ້ກັບມາເພີ່ມຂຶ້ນອີກ ຫລັງຈາກຊ້າລົງມາຕະຫລອດ 4 ວັນຜ່ານມາ ໂດຍເພີ່ມຈາກ 74.386 ຄົນໃນວັນພຸດເປັນ 80.539 ຄົນໃນວັນພະຫັດ ຫລື 6.153 ຄົນ ຫລາຍທີ່ສຸດນັບແຕ່ວັນເສົາ.