ແອັດສະປາຍ ວິກິດ..! ຍອດຜູ້ເສຍຊີວິດຈາກໄວຣັສໂຄວິດ-19 ເພີ່ມຂຶ້ນເປັນອັນດັບ 2 ຂອງໂລກ

    ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ສະພາບການລະບາດຂອງເຊື້ອໄວຣັສໂຄວິດ-19 ໃນປະເທດແອັດສະປາຍນັບມື້ຮ້າຍແຮງຂຶ້ນເລື້ອຍໆ ເຮັດໃຫ້ມີຜູ້ເສຍຊີວິດສູງຂຶ້ນເປັນອັບດັບ 2 ຂອງໂລກ ຮອງຈາກປະເທດອິຕາລີ, ໃນປະເທດແອັດສະປາຍຂະນະນີ້ມີລາຍງານຈາກມະຫາວິທະຍາໄລຈອນ ຮ໋ອບກິ໋ນ ລະບຸວ່າມີຜູ້ເສຍຊີວິດຫຼາຍກວ່າ 3.400 ຄົນ ໂດຍເພີ່ມຂຶ້ນຈາກວັນກ່ອນ 738 ຄົນ ລວມຜູ້ຕິດເຊື້ອທັງໝົດຫຼາຍກວ່າ 47.600 ຄົນ.

          ກະຊວງສາທາລະນະສຸກແອັດສະປາຍເປີດເຜີຍວ່າ: ອັດຕາການຕິດເຊື້ອໃນປະເທດນັ້ນເພີ່ມຂຶ້ນ 20% ໃນຂະນະທີ່ປະຊາຊົນຕິດເຊື້ອໄວຣັສດັ່ງກ່າວສູງກວ່າ 5.000 ຄົນ, ການລະບາດຂອງເຊື້ອໄວຣັສໂຄວິດ-19 ໃນນະຄອນຫຼວງມາດຣິດມີອັດຕາການເສຍຊີວິດ 1 ໃນ 3 ຂອງຕົວເລກລວມ.

                ຂະນະດຽວກັນ ທ່າອ່ຽງຜູ້ເສຍຊີວິດຈາກເຊື້ອໄວຣັສໂຄວິດ-19ໃນອິຕາລີຍັງຄົງສູງເປັນອັນດັບ 1 ຂອງໂລກ ມີຜູ້ເສຍຊີວິດຫຼາຍກວ່າ 7.500 ຄົນ ແລະ  ມີຜູ້ຕິດເຊື້ອຫຼາຍກວ່າ 74.300 ຄົນ, ພ້ອມດຽວກັນນັ້ນ ເພື່ອປ້ອງກັນການແຜ່ລະບາດຂອງເຊື້ອໄວຣັສດັ່ງກ່າວ ປະເທດນິວຊີເເລນ ໄດ້ເລີ່ມບັງຄັບໃຊ້ກົດ   ໝາຍພາວະສຸກເສີນເພື່ອຄວບຄຸມການລະບາດຂອງເຊື້ອໄວຣັສໂຄວິດ-19 ໂດຍການສັ່ງປິດເມືອງທົ່ວປະເທດເປັນເວລາ 4 ອາທິດ.