ເມືອງ ນາຊາຍທອງ ມີພື້ນທີ່ຂາຍບໍ່ລິການທາງເພດ ແລະ ຄ້າປະເວນີຫລາຍຈຸດ

ໃນກອງປະຊຸມສະຫລຸບວຽກງານປະຈຳປີຂອງກອງບັນຊາການ ປກສ ເມືອງ ນາຊາຍທອງ ນະຄອນຫລວງວຽງຈັນ, ໃນວັນທີ 25 ມີນານີ້, ທ່ານ ພັນໂທ ລຳພອນ ສີສົມບັດ ຫົວຫນ້າກອງບັນຊາການ ປກສ ເມືອງດັ່ງກ່າວ ໄດ້ໃຫ້ຮູ້ວ່າ: ສະພາບຫຍໍ້ທໍ້ພົ້ນເດັ່ນທີ່ເກີດຢູ່ເມືອງຂອງຕົນ,ນອກຈາກການລັກຊັບ, ມົ້ວສຸມຢາເສບຕິດແລ້ວ ຍັງພົບມີບັນຫາຄ້າຂາຍມະນຸດ, ໂດຍມີຈຸດສ່ຽງຢູ່ບັນດາໂຮງແຮມ, ເຮືອນພັກ, ຮ້ານອາຫານ, ຮ້ານກາເຟ, ຮ້ານກິນດື່ມ ແລະ ຈຸດສັບສົນຢູ່ 4 ແຫ່ງຄື: 1.ເຂດບ້ານນາສ້ຽວ, 2. ເຂດບ້ານຫົວຂົວ-ໜອງຄັນຄູ, 3. ບ້ານອີໄລ-ສົງເປືອຍ, 4.ເຂດບ້ານນາຂ່າ-ນາງ່າ, ຊຶ່ງຜ່ານມາເຈົ້າຫນ້າທີ່ສາມາດກວດພົບ ແລະ ໄດ້ເຮັດບົດບັນທຶກສຶກສາອົບຮົມຜູ້ຄ້າປະເວນີ 12 ຄົນ, ຊາຍ 1 ຄົນ ແລະ ໄດ້ສຶກສາອົບຮົມຜູ້ຂາຍປະເວນີ ຈໍານວນ 47 ຄົນ ແລະ ໄດ້ດໍາເນີນຄະດີຄ້າມະນຸດ , ຄະດີທໍາສໍາເລົາເດັກແລະອື່ນໆຫລາຍຢ່າງຊຶ່ງຈະຕ້ອງໄດ້ເພີ່ມທະວີການຕິດຕາມກວດກາໃຫ້ເຂັ້ມງວດຫລາຍຂື້ນ