ດຳລົງຊີວິດຢ່າງມີສະຕິເພື່ອປ້ອງກັນ ໂຄວິດ-19
ລູກເມືອງພວນ
ສະບາຍດີທ່ານຜູ້ອ່ານທີ່ຮັກແພງທັງຫຼາຍ! ໃນວັນທີ 25 ມີນານີ້ ກະຊວງສາທາລະນະສຸກໄດ້ອອກມາປະກາດຢືນຢັນຢ່າງເປັນທາງການວ່າລາວເຮົາມີຜູ້ຕິດເຊື້ອ 3 ຄົນ. ຜູ້ທີ່ໜຶ່ງແມ່ນໄກ້ນຳທ່ຽວໃຫ້ຄົນຕ່າງປະເທດ ແລະ ອີກຄົນໜຶ່ງແມ່ນ ພະນັກງານຂອງໂຮງແຮມແຫ່ງໜຶ່ງໃນນະຄອນຫຼວງວຽງຈັນ ໄດ້ໄປຝຶກອົບຮົມວຽກງານການໂຮງແຮມຢູ່ປະເທດເພື່ອນບ້ານໃກ້ຄຽງກັບຄືນມາ ແລະ ຜູ້ໜຶ່ງເປັນນັກທຸລະກິດ ເຊິ່ງໄດ້ພົວພັນກັບພະນັກງານຂອງໂຮງແຮມຜູ້ທີ່ຕິດເຊື້ອ.
ພາຍຫຼັງຮູ້ວ່າພວກກ່ຽວທັງສອງຕິດເຊື້ອໄວຣັສໂຄວິດ-19 ແລ້ວ, ທາງເຈົ້າໜ້າທີ່ກ່ຽວຂ້ອງກໍໄດ້ກັກຕົວແຍກປ່ຽວພວກກ່ຽວໄວ້ເພື່ອປິ່ນປົວ ແລະ ໄດ້ສືບຊາວຄາວຫາປະຫວັດການເຄື່ອນໄຫວຂອງພວກກ່ຽວທັງສອງ ແລະ ກໍໄດ້ຂໍ້ມູນຈຳນວນໜຶ່ງ ແຕ່ກໍຍັງບໍ່ພຽງພໍ ແລະຄົບຖ້ວນ. ປັດຈຸບັນບັນດາເຈົ້າໜ້າທີ່ກຳລັງຄົ້ນຫາເສັ້ນທາງການເຄື່ອນໄຫວຂອງພວກກ່ຽວຢ່າງລະອຽດຮັດກຸ່ມ ເພື່ອໃຫ້ຮູ້ວ່າໄປສະຖານທີ່ໃດແດ່? ໃກ້ສິດ ສຳພັດກັບໃຜແດ່? ເພື່ອຈະນຳເອົາພວກທັງໝົດມາກັກຕົວ ກວດຫາເຊື້ອພະຍາດໃຫ້ໄດ້. ແຕ່ກໍເປັນເລື່ອງທີ່ຍາກເຕັມທີ ທີ່ຈະມີຂໍ້ມູນລະອຽດໄດ້.
ເຖິງຢ່າງໃດກໍດີ, ເມື່ອມີເຫດການດັ່ງກ່າວເກີດຂຶ້ນ ເຮັດໃຫ້ທົ່ວສັງຄົມຜະຫວາ ແລະ ມີສະຕິປ້ອງກັນຕົວເອງສູງຂຶ້ນ ແຕ່ບໍ່ໃຫ້ແຕກຕື່ນເກີນກວ່າເຫດ, ຈົ່ງມີສະຕິໃນການດຳລົງຊີວິດ ແລະ ມີວິຈາລະຍານໃນການເສບສື່ໃນໄລຍະນີ້ ແລະ ຕ້ອງມີຄວາມຮູ້ພື້ນຖານໃນການປ້ອງກັນຕົນເອງ. ທາງທີ່ດີທີ່ສຸດໃນການປ້ອງກັນໂຕເອງກໍຄື ບໍ່ໄປບ່ອນທີ່ມີຜູ້ຄົນແອອັດເຊັ່ນ: ຮ້ານບາ, ຮ້ານບັນເທີງ, ຕະຫຼາດ, ງານດອງ, ການຈັດຕັ້ງງານສ້າງສັນຊຸມແຊວ ແລະ ກັກຕົນເອງຢູ່ໃນຂອບເຂດບໍລິເວນທີ່ຈຳກັດ ແມ່ນເປັນການດີທີ່ສຸດ.
ຕາມບົດຮຽນຂອງຫຼາຍໆປະເທດໃນການສະກັດກັ້ນ ແລະ ປ້ອງກັນໂຄວິດທີ່ດີທີ່ສຸດແມ່ນການກັກໂຕເອງຢູ່ໃນສະຖານທີ່ຈຳກັດ ຫຼື ສະຖານທີ່ແຍກປ່ຽວ.
ຍ້ອນດັ່ງນັ້ນ, ຈຶ່ງຮຽກຮ້ອງໃຫ້ທຸກຄົນ ຈົ່ງໃຫ້ການຮ່ວມໄມ້ຮ່ວມມືກັບລັດຖະບານ ຈັດຕັ້ງຄຳສັ່ງຂອງລັດຖະບານໃຫ້ໄດ້ດີທີ່ສຸດ. ເມື່ອມີອາການສົງໄສກໍຮິບຟ້າວໄປຫາແພດໝໍ ເພື່ອກວດເຊັກສຸຂະພາບຂອງຕົນ ແລະ ບໍ່ປິດບັງປະຫວັດການເຄື່ອນໄຫວໄປມາຂອງຕົນໃຫ້ເຈົ້າໜ້າທີ່ກ່ຽວຂ້ອງຮັບຊາບ.
ທຸກຄົນຕ້ອງຄຳນຶງຢູ່ສະເໝີວ່າປ້ອງກັນພະຍາດໂຄວິດ-19 ເພື່ອເພື່ອຕົນເອງ, ເພື່ອບາດຕິພີ່ນ້ອງ, ຄອບຄົວ ລູກເມຍ, ລູກຜົວຂອງຕົນເອງ. ສິ່ງນີ້ແມ່ນນໍ້າໃຈເພື່ອປະຊາຊົນລາວທັງຊາດ./.
