ເມືອງທີ່ມີຊື່ສຽງດ້ານ ແສງ ສີ ສຽງ ຢູ່ໄທຖືກປິດປະຕູລົງ ນັກເຕັ້ນລຳທັງຫຼາຍຫອບເຄື່ອງກັບບ້ານ ຜູ້ປະກອບການນໍ້າຕາຕົກ ຍ້ອນ ໂຄວິດ-19
ລູກເມືອງພວນ
ໃນເມື່ອກ່ອນບໍ່ທັນມີພະຍາດລະບາດ, ແຂກຕ່າງດ້າວທ້າວຕ່າງແດນ ທົ່ວທຸກສາລະທິດເຂົ້າມາໄທ ເພື່ອສະແຫວງຫາຄວາມສຸກໃນເມືອງພັດທະຍາຍາມລາຕີກາ ຊຶ່ງທີ່ນີ້ເຕັມໄປດ້ວຍນາງສາວທີ່ຍຸຍວນຊວນໃຈຮັບໃຊ້ແຂກຄົນທີ່ມາທ່ຽວໄດ້ຢ່າງຈຸໃຈ.
ເຖິງຢ່າງໃດກໍດີ, ເມື່ອມີພະຍາດໄວຣັສ ໂຄວິດ-19 ລະບາດ, ໄທໄດ້ກາຍເປັນປະເທດທີ່ມີຜູ້ຕິດເຊື້ອອັນດັບສອງຂອງອາຊີຕາເວັນອອກສຽງໃຕ້ ໂດຍມີຜູ້ຕິດເຊື້ອທັງໝົດໃນຂະນະນີ້ວັນທີ 24 ມີນານີ້ ມີ 827 ຄົນ, ເສຍຊີວິດ 4 ຄົນ.
ເມື່ອວັນທີ 18 ມີນາຜ່ານມາ ລັດຖະບານໄທໄດ້ສັ່ງປິດຮ້ານເຫຼົ້າ, ຮ້ານເບຍ ແລະ ສະຖານບັນເທີງ, ສະໝາມກິລາ ແລະ ແຫຼ່ງທ່ອງທ່ຽວທີ່ຫຼໍ່ແຫຼມຈຳນວນໜຶ່ງ. ຄຳສັ່ງດັ່ງກ່າວ ໄດ້ເຮັດໃຫ້ບັນດາຮ້ານເຫຼົ້າ ຮ້ານເບຍ ແລະ ສະຖານບັນເທີງໃນພັດທະຍາປິດລົງເໝືອນກັບຂ້າຕົນເອງ.
ມື້ສຸດທ້າຍກ່ອນຈະປິດທຸກການເຄື່ອນໄຫວໃນພັດທະຍາ ບັນດານາງສາວນັກເຕັ້ນລຳໄດ້ມ້ຽນມັດເຄື່ອງຂອງເຂົ້າຫີບ ແລ້ວກອດຈູບອຳລາກັນ ດ້ວຍຄວາມສັງເວດ, ແຂກຄົນທີ່ເຄີຍມາທ່ຽວກໍງຽບສະງັດ, ຜູ້ປະກອບການນໍ້າຕາຕົກໃນ./.
