ນະຄອນຫລວງວຽງຈັນທໍາລາຍສັດປີກລັກລອບນໍາເຂົ້າບໍ່ຖືກຕ້ອງເປັນຈໍານວນຫລາຍ

ເມື່ອບໍ່ດົນມານີ້, ເຈົ້າໜ້າທີ່ເມືອງຫາດຊາຍຟອງສົມທົບກັບເມືອງປາກງື່ມ, ນະຄອນຫລວງວຽງຈັນ, ໄດ້ຈັດພິທີທໍາລາຍສັດປີກປະເພດໄກ່, ເປັດ ແລະ ຫ່ານເປັນຈໍານວນຫລາຍສີບກິໂລທີ່ລັກລອບນໍາເຂົ້າບໍ່ຖືກຕ້ອງຈາກປະເທດໄທເພື່ອມາຈໍາໜ່າຍໃນຕະຫລາດແຫ່ງຕ່າງໆໃນນະຄອນຫລວງວຽງຈັນ.

ເຈົ້າໜ້າທີ່ໃຫ້ຮູ້ວ່າ: ສັດປີກດັ່ງກ່າວແມ່ນຍືດໄດ້ຈາກຜູ້ລັກລອບນໍາເຂົ້າຢູ່ບ້ານໝາກຮຽວ, ເມືອງປາກງື່ມ, ໂດຍນຳໃຊ້ລົດຮຸນໄດໝາຍເລກທະບຽນ ຈກ 4728 ກຳແພງນະຄອນລັກລອບຂົນສົ່ງສັດປີກຈຳນວນ 31 ເປົາ, ໃນນັ້ນມີໄກ່ 9 ເປົາ, ເປັດ 22 ເປົາ ແລະ ຫ່ານ 2 ໂຕຈາກທ່າເຮືອບ້ານໝາກຮຽວ, ເພື່ອໄປຂາຍຢູ່ຕະຫລາດຫົວຂົວ ແລະ ຕະຫລາດສວນມອນ ແລະ ພໍມາຮອດເຂດເມືອງຫາດຊາຍຟອງກໍຖືກເຈົ້າໜ້າທີ່ກັກຕົວ. ເຈົ້າໜ້າທີ່ໃຫ້ຮູ້ວ່າ: ຜ່ານມາພວກກ່ຽວເຄີຍຖືກເຈົ້າໜ້າທີ່ ປກສ ເມືອງປາກງື່ມ ສຶກສາອົບຮົມມາແລ້ວຫລາຍຄັ້ງ, ແຕ່ບໍ່ມີທ່າທີຢຸດເຊົາ ແລະ  ໄດ້ສືບຕໍ່ເຄື່ອນໄຫວກະທໍາຜິດລັກສະນະດັ່ງກ່າວເລື້ອຍໆມາ.

ຜ່ານການສືບສວນ-ສອບສວນຜູ້ກ່ຽວຮັບສາລະພາບວ່າ: ໄດ້ເຄື່ອນໄຫວຄ້າຂາຍສັດປີກທີ່ລັກລອບນໍາເຂົ້າມາຈາກໄທຫລາຍຄັ້ງ ເພື່ອນໍາມາຈໍາໜ່າຍໃຫ້ແມ່ຄ້າຕາມທ້ອງຕະຫລາດຕ່າງໆໃນຕົວເມືອງ, ໂດຍສັດປີກທັງໝົດແມ່ນຊື້ມາຈາກປະຊາຊົນຢູ່ເຂດເມືອງໂພນພິໃສ, ຈັງຫວັດໜອງຄາຍ, ໂດຍໃຊ້ເຮືອຫາງຂົນສົ່ງຂ້າມມາຂຶ້ນຢູ່ທ່າຝັງເຂດບ້ານໝາກຮຽວ, ເມືອງປາກງື່ມ.

ຕໍ່ຜູ້ກະທໍາຜິດນີ້ເຈົ້າໜ້າທີ່ໄດ້ດໍາເນີນການສຶກສາອົບຮົມ ແລະ ປັບໄໝຕາມລະບຽບການ.