ຂ່າວດີຂອງວົງການບານເຕະອັງກິດ “ອາເຕຕ້າ”ຫາຍດີແລ້ວ ຫຼັງຈາກຕິດເຊື້ອໄວຣັສໂຄວິດ-19
ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ:
ມິເກວ ອາເຕຕ້າ ຄູຝຶກຂອງທີມປືນໃຫຍ່ ອາເຊນອລ ທີມດັງໃນພຣີເມຍລີກອັງກິດ ໃຫ້ສຳພາດເປັນຄັ້ງທຳອິດ ຫຼັງຈາກຖືກກວດພົບວ່າຕິດເຊື້ອໄວຣັສໂຄວິດ-19
ໂດຍໄດ້ຢືນຢັນວ່າມີອາການດີຂື້ນ ແລະ ຮູ້ສຶກວ່າຫາຍເປັນປົກກະຕິແລ້ວ, ພ້ອມດຽວກັນນັ້ນ ເຈົ້າໜ້າທີ່ຂອງສະໂມສອນຫຼາຍກວ່າ
100 ຄົນ ລວມເຖິງນັກເຕະຊຸດໃຫຍ່ຂອງອາເຊນອລ ຕ້ອງໄດ້ກັກຕົວເອງເພື່ອບໍ່ໃຫ້ຕິດເຊື້ອໄວຣັສດັ່ງກ່າວ.
ໂດຍ ອາເຕຕ້າ ໄດ້ເລົ່າເຖິງຄັ້ງທີ່ຮູ້ຕົນເອງວ່າຕິດເຊື້ອໄວຣັສໂຄວິດ-19 ທຸກຢ່າງມັນເກີດຂຶ້ນໄວຫຼາຍ ກ່ອນທີ່ຈະຮັບຮູ້ວ່າຕົນນັ້ນໄດ້ໄປໃກ້ຊິດກັບ ອີວານ ເກລອສ ມາຣິນາຄິສ ປະທານສະໂມສອນ ໂອລິມປຽກກ໊ອສ ທີ່ຕິດເຊື້ອໄວຣັສດັ່ງກ່າວແລ້ວນັ້ນ ລວມໄປເຖິງທຸກຄົນທີ່ໃກ້ຊິດກັບເຂົາຕົກຢູ່ໃນຄວາມສ່ຽງທີ່ຈະຕິດເຊື້ອທັງໝົດ. ສໍາລັບ ອາເຊນອລ ຢືນຢັນວ່າຈະບໍ່ເອີ້ນໂຕນັກເຕະເຂົ້າມາຝຶກຊ້ອມໃນໄລຍະນີ້ເທື່ອ ເຖິງວ່າຈະຄົບກຳໜົດກັກຕົວ 14 ວັນແລ້ວກໍຕາມ ເພື່ອຄວາມປອດໄພ.
