ສາທາແນະນຳການຈໍາກັດບໍລິເວນຢູ່ສະຖານທີ່ພັກເຊົາຂອງຕົນເອງ ໃນໄລຍະ 14 ວັນ

ໃນວັນທີ 22 ມີນານີ້ ທ່ານ ລັດຕະນະໄຊ ເພັດສຸວັນ ຫົວຫນ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫລງຂ່າວຕໍ່ສື່ມວນຊົນວ່າ: ທຸກຄົນທີ່ເດີນທາງເຂົ້າມາ ສປປ ລາວ ຕ້ອງປະຕິບັດມາດຕະການຈຳກັດບໍລິເວນຢູ່ສະຖານທີ່ພັກເຊົາ ເປັນເວລາ 14 ວັນ ໂດຍໃຫ້ປະຕິບັດຄື: ວັດແທກອຸນຫະພູມຮ່າງກາຍ ສອງເທື່ອຕໍ່ມື້ (ເຊົ້າ-ແລງ), ໃຫ້ຢູ່ແຕ່ໃນສະຖານທີ່ພັກເຊົາຕົນເອງເທົ່ານັ້ນເປັນເວລາ 14 ວັນ, ໃຫ້ມີຜູ້ສົ່ງອາຫານ ແລະ ນໍ້າກິນໃຫ້ຢູ່ຫນ້າຫ້ອງ, ບໍ່ໃຫ້ເດີນທາງໄປຂ້າງນອກ, ບໍ່ໃຫ້ໃກ້ຊິດກັບຄົນອື່ນ ໂດຍບໍ່ໄດ້ຮັບການອະນຸຍາດຖ້າບໍ່ມີຫ້ອງເປັນຂອງຕົນເອງ ໃຫ້ຈັດສັນບໍລິເວນພັກເຊົາຂອງຕົນ, ໃຫ້ຫ່າງຈາກຄົນອ້ອມຂ້າງຢ່າງຫນ້ອຍ 2 ແມັດ ແລະ ບໍ່ໃຫ້ໃຊ້ເຄື່ອງຂອງປະປົນກັບຄົນອື່ນ, ເປີດປ່ອງຢ້ຽມພາຍໃນຫ້ອງໃຫ້ຖ່າຍເທ, ຫມັ່ນລ້າງມືໃສ່ສະບູ ແລະ ນໍ້າສະອາດ ຫລື ໃຊ້ເຈວລ້າງມືທີ່ມີສ່ວນປະສົມຂອງເຫລົ້າແຕ່ 70%-95%, ຮັກສາມາລະຍາດໃນການໄອ ແລະ ຈາມ, ຖ້າຮູ້ສຶກບໍ່ສະບາຍມີໄຂ້, ໄອ ຫລື ມີບັນຫາລະບົບຫາຍໃຈ ຕ້ອງປຶກສາແພດດ່ວນ, ພາຍຫລັງຕິດຕາມຄົບກຳນົດ 14 ວັນ ແລະ ບໍ່ມີອາຫານຜິດປົກກະຕິຫຍັງແມ່ນສາມາດອອກໄປເຄື່ອນໄຫວດຳເນີນວຽກປະຈຳວັນ ແລະ ຜູ້ຖືກດຳເນີນຈຳກັດບໍລິເວນຕ້ອງປະຕິບັດຢ່າງເຂັ້ມງວດ ຖ້າລະເມີດແມ່ນຈະຖືກປັບໄຫມຕາມລະບຽບກົດຫມາຍ