ລັດກຽມສະຖານທີ່ຮອງຮັບ ຈຳກັດບໍລິເວນແຮງງານທີ່ເດີນທາງມາຈາກປະເທດເພື່ອນບ້ານ

ລັດຖະບານໄດ້ກຳນົດເອົາສະຖານທີ່ໂຮງຮຽນ ແລະ ສະຖາບັນການສຶກສາ ຮອງຮັບ ແຮງງານລາວທີ່ ເດີນທາງກັບມາຈາກປະເທດເພື່ອນບ້ານ, ເພື່ອຕິດຕາມຄັດກອງກວດຫາເຊື້ອໂຄວິດ-19 ພາຍຫລັງທີ່ຈະມີການປິດດ່ານ ໃນວັນທີ 23 ມີນານີ້.

ໃນວັນທີ 22 ມີນານີ້ ທ່ານ ລັດຕະນະໄຊ ເພັດສຸວັນຫົວຫນ້າກົມຄວບຄຸມ ພະຍາດຕິດຕໍ່ກະຊວງສາທາລະນະສຸກຖະແຫລງຂ່າວໃຫ້ຮູ້ວ່າ: ແຮງງານລາວທີ່ເດີນທາງມາຈາກປະເທດເພື່ອນບ້ານ ຄາດວ່າມີຫລາຍກ່ວາ 1 ແສນຄົນ ສະນັ້ນເຮັດໃຫ້ສະຖານທີ່ກັກບໍລິເວນມີຈຳກັດ, ຈຶ່ງໄດ້ເອົາໂຮງຮຽນ ຕ່າງໆ ທີ່ທາງລັດຖະບານໄດ້ແຈ້ງໂຈະປິດຊົ່ວຄາວເປັນບ່ອນ ກັກບໍລິເວນ ເພື່ອຈະມີການກວດເຊື້ອໂຄວິດ-19, ນອກຈາກນີ້ ກໍຈະສົ່ງນັກສຶກສາ ແພດ ລົງຕິດຕາມພວກກ່ຽວຕື່ມ, ປັດຈຸບັນ ສປປ ລາວຍັງບໍ່ພົບກໍລະນີຕິດເຊື້ອໂຄວິດ-19 ແຕ່ທາງລັດຖະບານກໍ້ມີມາດຕະການເຂັ້ມງວດ ໃນການປ້ອງກັນ ແລະ ຄວບຄຸມພະຍາດດັ່ງກ່າວ ເປັນຕົ້ນການປິດດ່ານເຂົ້າ_ອອກທ້ອງຖິ່ນ, ແລະ ອອກແຈ້ງການໃຫ້ທົ່ວສັງຄົມເປັນເຈົ້າການຄວບຄຸມພະຍາດນີ້ຢ່າງເຂັ້ມງວດບໍ່ໃຫ້ມີການລະບາດ