“WHO” ເຕືອນ ເຊື້ອ “COVID-19” ຢູ່ໃນອາກາດໄດ້ດົນກວ່າທີ່ຄິດ
“WHO” ເຜີຍໄວຣັສໂຄໂຣນາຢູ່ໃນອາກາດໄດ້ດົນກວ່າທີ່ຄິດ ພ້ອມເຕືອນບຸກຄະລາກອນທາງການແພດ ເປັນກຸ່ມທີ່ຄວນເພີ່ມຄວາມລະມັດລະວັງເປັນພິເສດ.
ອົງການອະນາໄມໂລກ (WHO) ເຕືອນບັນດາບຸກຄະລາກອນການແພດວ່າ: ໄວຣັສໂຄໂຣນາ ສາຍພັນໃໝ່ ຕົ້ນຕໍໂຣກໂຄວິດ-19 ສາມາດມີຊີວິດຢູ່ໃນອາກາດໄດ້ດົນກວ່າທີ່ມີການຄາດຄະເນໄວ້ ຈຶ່ງຄວນເພີ່ມຄວາມລະມັດລະວັງໃຫ້ຫລາຍຂຶ້ນ.
ຫົວໜ້າຝ່າຍໂຣກລະບາດໃໝ່ ແລະ ໂຣກທີ່ຮັບຈາກສັດຂອງອົງການອະນາໄມໂລກ ເປີດເຜີຍໃນວັນທີ 16 ມີນາວ່າ: ເຊື້ອໄວຣັສສາມາດແຜ່ລະບາດຜ່ານລະອອງ ຫລື ຂອງເຫລວພຽງເລັກໜ້ອຍ ສ່ວນຫລາຍຜ່ານທາງການໄອ ຫລື ຈາມ ເມື່ອຕ້ອງຢູ່ໃນສະຖານະການທີ່ຕ້ອງຢູ່ໃນລະອອງລອຍເຊັ່ນ: ຢູ່ໂຮງໝໍ ອາດມີຄວາມເປັນໄປໄດ້ທີ່ຈະເກີດອະນຸພາກຂອງລະອອງລອຍເຫລົ່ານີ້ ເຊິ່ງໝາຍຄວາມວ່າ: ໄວຣັສສາມາດຢູ່ໃນອາກາດໄດ້ດົນຂຶ້ນ ຈຶ່ງເປັນເລື່ອງສຳຄັນຫລາຍທີ່ເຈົ້າໜ້າທີ່ດ້ານສາທາລະນະສຸກຕ້ອງເພີ່ມຄວາມລະມັດລະວັງ ເມື່ອຕ້ອງເຮັດວຽກກັບຜູ້ປ່ວຍ.
ເຈົ້າໜ້າທີ່ຂອງ WHO ລະບຸອີກວ່າ: ໄວຣັສໂຄໂຣນາສາມາດແຜ່ຜ່ານທາງອາກາດ ແລະ ຢູ່ໃນອາກາດໄດ້ດົນພຽງໃດ ຂຶ້ນຢູ່ກັບປັດໄຈຫລາຍດ້ານ ທັງຄວາມຮ້ອນ ແລະ ຄວາມຊຸ່ມ.
