ອິຕາລີຍັງໜັກ ! ຈຳນວນຜູ້ເສຍຊີວິດຈາກໂຄວິດ-19 ຮອດ 4.000 ຄົນ
ອິຕາລີແຈ້ງຈຳນວນຜູ້ເສຍຊີວິດຈາກໂຄວິດ-19 ບັນລຸ 4.000 ຄົນ, ຂະນະທີ່ຈຳນວນຜູ້ຕິດເຊື້ອໄວຣັສຊະນິດນີ້ຢູ່ອິຕາລີເພີ່ມຂຶ້ນ 14,6% ໃນວັນດຽວ ເປັນ 47.021 ຄົນ.
ສຳນັກຂ່າວຕ່າງປະເທດ ລາຍງານວ່າ: ຈຳນວນຜູ້ເສຍຊີວິດຈາກເຊື້ອໄວຣັສໂຄໂຣນາສາຍພັນໃໝ່ຕົ້ນຕໍໂຣກໂຄວິດ-19 ຢູ່ອິຕາລີເພີ່ມຂຶ້ນ 627 ຄົນພາຍໃນເວລາ 24 ຊົ່ວໂມງ ຫລື 14,8% ຖືເປັນການເພີ່ມຂຶ້ນສູງສຸດໃນວັນດຽວ ນັບແຕ່ເກີດການແຜ່ລະບາດຂອງໂຣກໂຄວິດ-19 ຢູ່ອິຕາລີ ສົ່ງຜົນໃຫ້ຈຳນວນຜູ້ເສຍຊີວິດລວມຢູ່ອິຕາລີມີ 4.032 ຄົນ.
ສ່ວນຈຳນວນຜູ້ຕິດເຊື້ອໄວຣັສຊະນິດນີ້ຢູ່ອິຕາລີເພີ່ມຂຶ້ນ 14,6% ໃນວັນດຽວ ເປັນ 47.021 ຄົນ ຈາກ 41.035 ຄົນ ໃນໜຶ່ງວັນກ່ໜໜ້ານີ້ ຖືວ່າເພີ່ມຂຶ້ນ 5.986 ຄົນ.
ດ້ານສະຖາບັນສຸຂະພາບແຫ່ງຊາດຂອງອິຕາລີ ລະບຸວ່າ: ອາຍຸສະເລ່ຍຂອງຜູ້ເສຍຊີວິດຄື 78,5 ປີ, ສ່ວນຜູ້ເສຍຊີວິດທີ່ມີອາຍຸນ້ອຍທີ່ສຸດຄື 31 ປີ ແລະ ອາຍຸຫລາຍທີ່ສຸດຄື 103 ປີ.
ອິຕາລີເປັນປະເທດທີ່ມີປະຊາກອນອາຍຸສູງຫລາຍທີ່ສຸດໃນໂລກ ຮອງລົງມາຄືປະເທດຍີ່ປຸ່ນ ມີປະຊາກອນທີ່ອາຍຸເກີນ 65 ປີໃນອັດຕາສ່ວນ 23% ເຊິ່ງຜູ້ຊ່ຽວຊານສ່ວນຫລາຍມີຄວາມເຫັນກົງກັນວ່າ: ນີ້ອາດເປັນເຫດຜົນທີ່ເຮັດໃຫ້ອິຕາລີມີຜູ້ເສຍຊີວິດຈາກໂຣກໂຄວິດ-19 ຫລາຍກວ່າປະເທດອື່ນໆ.
