ນັກວິໄຈຈີນ ຄົ້ນພົບ Avigan ຢາສູ້ໄວຣັສ ໂຄວິດ-19
ກະຊວງວິທະຍາສາດ ແລະ ເຕັກໂນໂລຊີຂອງຈີນ
ເປີດເຜີຍວ່າ: ຢາຕ້ານໄຂ້ຫວັດ Avigan ຫລື ຢາຟາວິພິຣາເວີຍ (Favi;iravir) ທີ່ພັດທະນາໂດຍຍີ່ປຸ່ນ
ສາມາດປິ່ນປົວຜູ້ປ່ວຍທີ່ຕິດເຊື້ອໄວຣັສໂຄໂຣນາ 2019 ໄດ້ຢ່າງມີປະສິດທິຜົນ
ເຊິ່ງຫລັງຈາກນີ້ຈະສະໜັບສະໜູນໃຫ້ໃຊ້ກັບຜູ້ປ່ວຍໂຄວິດ-19 ໃນປະເທດຕໍ່ໄປ.
ທ່ານ ຈາງຊິນໝິນ ຜູ້ອຳນວຍການສູນພັດທະນາເຕັກໂນໂລຊີຊີວະພາບແຫ່ງຊາດຈີນ ຖະແຫລງຂ່າວຢູ່ນະຄອນຫລວງປັກກິ່ງ ໃນວັນທີ 18 ມີນາວ່າ: ຈາກການທົດລອງທາງຄລີນິກກັບຜູ້ປ່ວຍໂຄວິດ-19 ຈຳນວນ 340 ຄົນ ໂດຍອົງການການແພດໃນເມືອງອູ່ຮັ່ນ ແລະ ເຊິນເຈິ້ນພົບວ່າ: ຢາ Avigan ທີ່ພັດທະນາໂດຍບໍລິສັດ Fujifilm Toyama Chemical ແລະ ປັດຈຸບັນໃຊ້ປິ່ນປົວຜູ້ປ່ວຍຢູ່ຍີ່ປຸ່ນ ມີປະສິດທິຜົນໃນການຕ້ານໄວຣັສໂຄໂຣນາ 2019.
ເຖິງຢ່າງໃດກໍຕາມ, ບໍລິສັດຟູຈິຟີມ ໂຕຢາມະ
ເຄມິຄັລ ບໍລິສັດລູກຂອງ “ຟູຈິຟີມ” ຢູ່ຍີ່ປຸ່ນ ເຊິ່ງເປັນຜູ້ຄິດຄົ້ນ ແລະ
ພັດທະນາຢາດັ່ງກ່າວໃນປີ 2014 ປະຕິເສດທີ່ຈະສະແດງຄວາມຄິດເຫັນຕໍ່ການເຄື່ອນໄຫວດັ່ງກ່າວ.
ທ່ານ ຈາງ ຢືນຢັນຕໍ່ນັກຂ່າວອີກວ່າ: ຢາຊະນິດນີ້ມີຄວາມປອດໄພສູງ ແລະ ມີປະສິດທິພາບໃນການປິ່ນປົວຜູ້ປ່ວຍ ໂດຍຜູ້ປ່ວຍຢູ່ເຊິນເຈິ້ນມີຜົນກວດເປັນລົບຫລັງໄດ້ຮັບຢາດັ່ງກ່າວສະເລ່ຍ 4 ວັນ ນັບຈາກທີ່ມີຜົນກວດເຊື້ອເປັນບວກ ທຽບກັບຄ່າສະເລ່ຍ 11 ວັນ ຂອງຜູ້ທີ່ບໍ່ໄດ້ຮັບການປິ່ນປົວຈາກຢາດັ່ງກ່າວ.
ນອກຈາກນີ້ ຜົນການເອັກສະເຣຍັງສະແດງໃຫ້ເຫັນອີກວ່າ: ປອດຂອງຜູ້ປ່ວຍທີ່ໄດ້ຮັບການປິ່ນປົວດ້ວຍຢາຟາວິພິຣາເວີຍ ຟື້ນຟູດີຂຶ້ນ 91% ເມື່ອທຽບໃສ່ 62% ຂອງຜູ້ທີ່ບໍ່ໄດ້ຮັບການປິ່ນປົວຈາກຢາດັ່ງກ່າວ.
ສະຖານີໂທລະພາບ NHK ລາຍງານວ່າ: ບໍລິສັດຈີນແຫ່ງໜຶ່ງ ເຊິ່ງໄດ້ໃບອະນຸຍາດຈາກບໍລິສັດຜູ້ພັດທະນາຢູ່ຍີ່ປຸ່ນ ໄດ້ຮັບໄຟຂຽວຈາກລັດຖະບານຈີນໃນເດືອນຜ່ານມາ ໃຫ້ຜະລິດຢາໃນປະລິມານຫລາຍ ເຊິ່ງຖືເປັນອີກໜຶ່ງຂ່າວດີໃນການເຮັດສົງຄາມຕໍ່ສູ້ກັບໄວຣັສທົ່ວໂລກ. ຂະນະທີ່ອັດຕາການຕິດເຊື້ອຂອງຜູ້ປ່ວຍຄົນໃໝ່ຢູ່ຈີນຫລຸດລົງຢ່າງວ່ອງໄວ ໂດຍໃນວັນທີ 16 ມີນາຜ່ານມາ ມີຜູ້ຕິດເຊື້ອຢືນຢັນເພີ່ມພຽງ 21 ຄົນ.
