ກະຊວງການຕ່າງປະເທດ ຊີ້ແຈງຕໍ່ສາກົນການງົດອອກວີຊາ ແລະ ປິດດ່ານປະເພນີ ແລະ ທ້ອງຖິ່ນ ເພື່ອປ້ອງກັນເຊື້ອ covid-19

ໃນວັນທີ 19 ມີນາ ນີ້, ຢູ່ ນະຄອນຫລວງວຽງຈັນ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແລະ ທ່ານ ພູທອນ ເມືອງປາກ ຮອງລັດຖະມົນຕີ ກະຊວງ ສາທາລະນະສຸກ ໄດ້ຊີ້ແຈງຫລາຍບັນຫາຕໍ່ທູຕານຸທູດ, ໂດຍສະເພາະກ່ຽວກັບການແຈ້ງຜົນກອງປະຊຸມລັດຖະບານ ທີ່ໄດ້ມີມາດຕະການຍົກລະດັບການສະກັດກັ້ນ ແລະ ຄວບຄຸມເຊື້ອ covid-19 ວ່າ: ລັດຖະບານຈະສືບຕໍ່ປະຕິບັດມາດຕະການຜ່ານ ມາທີ່ໄດ້ວາງອອກແລ້ວ ແລະ ອອກມາດຕະການເພີ່ມເຕີມຄື: ປິດດ່ານ ທ້ອງຖິ່ນ ແລະ ດ່ານປະເພນີໃນຂອບເຂດທົ່ວປະເທດ, ສ່ວນດ່ານສາກົນ ໃຫ້ເບິ່ງຄືນຄວາມຮັບປະກັນຮອບດ້ານ ຈຶ່ງອະນຸຍາດໃຫ້ເປີດເຂົ້າ-ອອກ ປົກກະຕິ, ໂຈະການອອກ visa ກັບດ່ານທຸກປະເພດ ສຳລັບທຸກປະເທດໃນໄລຍະ 30 ວັນ, ສຳລັບຜູ້ທີ່ໄດ້ວີຊາແລ້ວ ກໍຕ້ອງມີການຢັ້ງຢືນການກວດສຸຂະພາບ ແລະ ກວດປະຫວັດການເຄື່ອນໄຫວໃນໄລຍະ 14 ວັນຜ່ານມາ, ສຳລັບປະເທດທີ່ໄດ້ຮັບການຍົກເວັ້ນວີຊາ ເຫັນດີໃຫ້ຍົກເລີກການຍົກເວັ້ນວີຊາດັ່ງກ່າວຊົ່ວຄາວ ຈົນກ່ວາຈະມີການພິຈາລະນາໃໝ່ຂອງລັດຖະບານ.

    ທ່ານ ລັດຖະມົນຕີກະຊວງການຕ່າງປະເທດ ຢັ້ງຢືນວ່າ: ສປປ ລາວ, ແມ່ນຍັງບໍ່ທັນພົບຜູ້ຕິດເຊື້ອ covid-19 ເທື່ອ, ແຕ່ເນື່ອງຈາກວ່າ ປະເທດລາວ ມີຊາຍແດນຕິດຈອດ ແລະ ມີການເດີນທາງເຂົ້າ-ອອກຂອງຄົນຕ່າງປະເທດທີ່ມີຜູ້ຕິດເຊື້ອ ເຮັດໃຫ້ ສປປ ລາວ ມີຄວາມສ່ຽງສູງ, ດັ່ງນັ້ນ ລັດຖະບານໄດ້ສຸມໃສ່ບັນດາມາດຕະການເພື່ອສະກັດກັ້ນ ແລະ ປ້ອງກັນການແຜ່ລະບາດ ພ້ອມທັງມີແຜນການກະກຽມຄວາມພ້ອມໃນການຮັບມືກັບກໍລະນີ ທີ່ອາດກວດພົບຜູ້ຕິດເຊື້ອໃນຕໍ່ໜ້າ.