ການຄ້າມະນຸດໃນຮູບແບບຫລອກແຕ່ງງານ ກັບຄົນຕ່າງປະເທດຍັງເກີດຂຶ້ນຫລາຍໃນລາວ

      ໃນປີ 2019 ຜ່ານມາ, ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ສູນກາງສະຫະພັນແມ່ ຍິງລາວ ໄດ້ໃຫ້ການປົກປ້ອງ ແລະ ຊ່ວຍເຫລືອແມ່ຍິງ ແລະ ເດັກນ້ອຍທີ່ຖືກເຄາະຮ້າຍຈາກການຄ້າມະນຸດ ລວມທັງໝົດ 146 ຄົນ, ໃນນັ້ນ ເປັນຜູ້ຖືກເຄາະຮ້າຍຈາກການຄ້າມະນຸດມາຈາກ ສປ ຈີນ 94 ຄົນ, ໄທ 17 ຄົນ, ຫວຽດນາມ 3 ຄົນ, ເຫລືອນັ້ນແມ່ນຢູ່ກະໂຕພາຍໃນປະເທດ ຊຶ່ງຜູ້ຖືກເຄາະຮ້າຍທີ່ຊ່ວຍເຫລືອມາຫລາຍກວ່າໝູ່ແມ່ນແມ່ຍິງ ແລະ ເດັກນ້ອຍໃນນະຄອນຫລວງວຽງຈັນ ແລະ ແຂວງວຽງຈັນ; ສ່ວນຮູບແບບການຄ້າມະນຸດ ຕົ້ນຕໍແມ່ນການຂູດຮີດແຮງງານ, ຂູດຮີດທາງເພດ ແລະ ການແຕ່ງດອງແອບແຝງ ໂດຍສະເພາະແມ່ນກັບຄົນຈີນຈະພົບເຫັນຫລາຍກວ່າໝູ່.

      ມາຮອດປັດຈຸບັນ, ການຄ້າມະນຸດຍັງສືບຕໍ່ເກີດຂຶ້ນ ແລະ ແຜ່ລາມໄປຫລາຍເຂດແຂວງໃນທົ່ວປະເທດ ແລະ ສະເພາະໃນຮູບແບບແອບແຝງແຕ່ງດອງກັບຄົນຕ່າງປະເທດແມ່ນມີທ່າອ່ຽງເພີ່ມຂຶ້ນຢ່າງຕໍ່ເນື່ອງ.

      ສໍາລັບສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ຕັ້ງຢູ່ບ້ານໂນນແສງຈັນ ເມືອງໄຊທານີ ນະຄອນຫລວງວຽງຈັນ; ຜູ້ທີ່ມີບັນຫາຕ່າງໆສາມາດໂທລະສັບເຂົ້າໄປຮັບຄໍາປຶກສາໄດ້ຜ່ານໝາຍເລກ 1362 ຫລື ຈະເຂົ້າໄປພົວພັນຮັບຄໍາປຶກສາຢູ່ສູນໄດ້ໂດຍກົງໂດຍບໍ່ເສຍຄ່າແຕ່ຢ່າງໃດ.