ປະທານສະມາຄົມບານເຕະຍີ່ປຸ່ນ ຕິດເຊື້ອໄວຣັສ ໂຄວິດ-19

ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ໂຄໂຊ ທາກິມິ ປະທານສະມາຄົມບານເຕະຍີ່ປຸ່ນ (JFA), ທັງເປັນຮອງປະທານຄະນະກຳມະການໂອແລມປິກຍີ່ປຸ່ນ ອາຍຸ 62 ປີ ໄດ້ອອກມາຢືນຢັນວ່າຕິດເຊື້ອພະຍາດ ໂຄວິດ-19.

ຜ່ານການກວດປະຫວັດການເຄື່ອນໄຫວ ແລະ ການເດີນທາງຂອງ ໂຄໂຊ ທາກິມິ ໃນລະຫວ່າງເດືອນກຸມພາຫາເດືອນມີນານີ້ ໄດ້ເດີນທາງໄປປະເທດອັງກິດ, ໂຮນລັງ ແລະ ສະຫະລັດອາເມຣິກາ ເພື່ອພົວພັນດ້ານວຽກງານ ແລະ ທຸລະກິດ.

ສະມາຄົມບານເຕະຍີ່ປຸ່ນ ຖະແຫລງໃຫ້ຮູ້ຕື່ມອີກວ່າ: ປະຈຸບັນ ທ່ານ ໂຄໂຊ ທາກິມິ ຮ່າງກາຍແຂງແຮງດີ ແຕ່ມີອາການໄຂ້ເລັກໜ້ອຍ, ຊຶ່ງໃນລະຫວ່າງການເດີນທາງ ທ່ານ ໂຄໂຊ ທາກິມິ ໄດ້ເຂົ້າຊົມການແຂ່ງຂັນເຕະບານອຸ່ນເຄື່ອງ ແລະ ເຂົ້າຮ່ວມກອງປະຊຸມກ່ຽວກັບບານໂລກປະເພດຍິງ ປີ 2023 ຊຶ່ງປະເທດຍີ່ປຸ່ນເປັນໜຶ່ງໃນປະເທດສະເໜີຕົວຊິງສິດເປັນເຈົ້າພາບງານຄັ້ງນີ້.