ໂຄສະນາຢ່າງແຂງແຮງຕໍ່ວັນສຳຄັນຂອງຊາດ
ໂດຍ: ທິດກໍ່າ
ໃນປີ 2020 ເປັນປີໜຶ່ງທີ່ມີຄວາມໝາຍທາງດ້ານປະຫວັດສາດຢ່າງຍິ່ງໃຫຍ່ສຳລັບຊາດລາວ ກໍຄືພັກ ແລະ ລັດຖະບານເຮົາ. ຍ້ອນວ່າໃນປີນີ້ ພວກເຮົາຈະໄດ້ພ້ອມກັນລະນຶກສະເຫລີມສະຫລອງວັນທີ່ສຳຄັນຂອງຊາດຂອງພັກ ແລະ ທັງຈະໄດ້ເຫັນຜົນງານອັນຍິ່ງໃຫຍ່ພາຍໃຕ້ການນຳພາຂອງພັກຕະຫລອດໄລຍະ 65 ປີຜ່ານມາ. ສະເພາະເດືອນມີນານີ້ ຄືໃນວັນທີ 22 ກໍແມ່ນວັນສ້າງຕັ້ງພັກ ຄົບຮອບ 65 ປີ ໄດ້ໝູນວຽນມາບັນຈົບຄົບຮອບອີກວາລະໜຶ່ງ. ຮອດເດືອນເມສາ ນັບແຕ່ວັນທີ 12 ຫາວັນທີ 16 ກໍເປັນໄລຍະສະເຫລີມສະຫລອງບຸນປີໃໝ່ລາວ, ວັນທີ 14 ເມສາ ກໍເປັນວັນສ້າງຕັ້ງຊາວໜຸ່ມປະຊາຊົນປະຕິວັດລາວ, ວັນທີ 13 ກໍລະກົດແມ່ນວັນເກີດທ່ານ ປະທານ ສຸພານຸວົງ ຄົບຮອບ 111 ປີ, ວັນທີ 20 ກໍລະກົດແມ່ນວັນສ້າງຕັ້ງສະຫະພັນແມ່ຍິງລາວ, ວັນທີ 7 ຕຸລາ ແມ່ນວັນຄູແຫ່ງຊາດ, 12 ຕຸລາ ວັນປະກາດເອກະລາດ, ວັນທີ 2 ທັນວາ ເປັນວັນຊາດຄົບຮອບ 45 ປີ ແລະ ວັນທີ 13 ທັນວາ ແມ່ນວັນເກີດຂອງປະທານ ໄກສອນ ພົມວິຫານ ຄົບຮອບ 100 ປີເຕັມ. ສະຫລຸບແລ້ວ ໃນແຕ່ລະເດືອນຂອງປີ ເວົ້າໄດ້ວ່າມີວັນສຳຄັນຂອງຊາດ, ຂອງພັກ, ອົງການຈັດຕັ້ງລັດ, ອົງການຈັດຕັ້ງມະຫາຊົນ, ຂອງຜູ້ນຳ ແລະ ທາງປະເພນີວັດທະນະທຳອັນດີງາມທີ່ຫລາກຫລາຍ ເຊິ່ງເຄີຍປະຕິບັດກັນມານັບແຕ່ປະເທດຊາດຂອງພວກເຮົາໄດ້ກາຍມາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ເປັນຕົ້ນມາ.
ແນວໃດກໍດີ, ໃນເມື່ອວັນສຳຄັນຕ່າງໆໄດ້ໝູນວຽນມາບັນຈົບຄົບຮອບແລ້ວ ຖ້າພວກເຮົາບໍ່ມີກິດຈະກຳ ຫລື ຂະບວນການເຄື່ອນໄຫວໃດໜຶ່ງ ເພື່ອສະແດງໃຫ້ເຫັນຄວາມຈົດຈຳລຳລຶກໃນວັນສຳຄັນຕ່າງໆຂອງຊາດນັ້ນ ກໍຈະບໍ່ມີຄວາມໝາຍ ອັນທີ່ພິເສດສຸດສະເພາະໃນປີ 2020 ພວກເຮົາຈະໄດ້ພ້ອມກັນເອົາໃຈໃສ່ເຄື່ອນໄຫວຄຳນັບຮັບຕ້ອນວັນສ້າງຕັ້ງພັກ ຄົບຮອບ 65 ປີ, ວັນຊາດທີ 2 ທັນວາ ຄົບຮອບ 45 ປີ, ວັນເກີດຂອງປະທານ ໄກສອນ ພົມວິຫານ ຄົບຮອບ 100 ປີ ຕາມສະພາບຄວາມເປັນຈິງຂອງປະເທດໃນປັດຈຸບັນ. ແຕ່ວ່າສຳລັບປີນີ້ ພັດເກີດມີອຸປະສັກມາກີດຂວາງ ຄືມີໂຣກລະບາດທີ່ອັນຕະລາຍຮ້າຍກາດແຜ່ລາມໄປທົ່ວໂລກ ເປັນຕົ້ນຄືເກີດມີເຊື້ອໄວຣັສສາຍພັນໃໝ່ໂຄໂຣນາ ຫລື ເອີ້ນຢ່າງໜຶ່ງວ່າ ໂຄວິດ-19 ໄດ້ກາຍເປັນມະຫັນຕະໄພຂົ່ມຂູ່ສັງຫານຊີວິດອິນຊີມະນຸດເຮົາໃນທົ່ວໂລກ. ມາຮອດປັດຈຸບັນ ໄດ້ແຜ່ລາມໄປເຖິງ 100 ກວ່າປະເທດແລ້ວ.
ເພາະສະນັ້ນ, ພັກ ແລະ ລັດຖະບານເຮົາຈຶ່ງໄດ້ອອກຂໍ້ກຳນົດໃຫ້ຢຸດຕິໃນທຸກຮູບແບບການຈັດຕັ້ງເຄື່ອນໄຫວທີ່ມີຄົນຫລາຍໃຫ້ກາຍມາເປັນຄົນໜ້ອຍ. ຕະຫລອດເຖິງການສະກັດກັ້ນເກືອດຫ້າມເຮັດງານບຸນສິນກິນທານ, ກິດຈະກຳຕ່າງໆໃນສັງຄົມ ອັນຈະເປັນການແຜ່ເຊື້ອພະຍາດດັ່ງກ່າວລະຫວ່າງຄົນຕໍ່ຄົນ ເຊິ່ງເມື່ອບໍ່ດົນມານີ້, ທ່ານ ພັນຄຳ ວິພາວັນ ຮອງປະທານປະເທດ, ຜູ້ປະຈຳການເລຂາທິການສູນກາງພັກ ກໍໄດ້ອອກມາຖະແຫລງຢ່າງເປັນທາງການກ່ຽວກັບບັນຫານີ້.
ແນວໃດກໍຕາມ, ເພື່ອເຮັດໃຫ້ການສະເຫລີມສະຫລອງວັນສ້າງຕັ້ງພັກ ຄົບຮອບ 65 ປີ ແລະ ວັນສຳຄັນຕ່າງໆຂອງຊາດໃຫ້ມີຄວາມໝາຍທາງດ້ານປະຫວັດສາດ ພວກເຮົາຕ້ອງຫັນທິດເອົາສື່ມວນຊົນເປັນກຳລັງແຮງໃນການປຸກລະດົມໂຄສະນາຢ່າງແຂງແຮງຕໍ່ວັນສຳຄັນຂອງຊາດ ແລະ ຂອງພັກ. ອາໄສສື່ມວນຊົນທຸກຊະນິດ ທັງພາກລັດ ແລະ ເອກະຊົນເປັນຂົວຕໍ່ ເພື່ອໂຄສະນາໝາກຜົນແຫ່ງໄຊຊະນະໃຕ້ການຊີ້ນຳ-ນຳພາຂອງພັກໃນຫົກສິບກວ່າປີຜ່ານມາໃຫ້ຟົດຟື້ນ. ເພື່ອສຳເລັດຕາມເປົ້າໝາຍທີ່ກ່າວມານີ້, ບັນດານັກຂ່າວ, ນັກຂຽນ ຕະຫລອດສື່ມວນຊົນທຸກລະດັບ, ທຸກແຫ່ງ ນັບແຕ່ສູນກາງລົງຮອດທ້ອງຖິ່ນຕ້ອງໄດ້ເຮັດໜ້າທີ່ຢ່າງເຕັມປ່ຽມ ເພື່ອນຳເອົາໝາກຜົນຂອງການປະຕິວັດ ກໍຄືໄຊຊະນະລວມແຫ່ງການສ້າງສາ ແລະ ພັດທະນາປະເທດຊາດມາໃຫ້ສັງຄົມໄດ້ຮູ້ ແລະ ໄດ້ເຫັນ.
ນອກຈາກບັນດານັກສື່ມວນຊົນຈະເຮັດໜ້າທີ່ຢ່າງເຕັມປ່ຽມແລ້ວ, ບັນດາຂະແໜງການກ່ຽວຂ້ອງ ນັບແຕ່ສູນກາງລົງຮອດທ້ອງຖິ່ນຕ້ອງໄດ້ໃຫ້ການຮ່ວມໄມ້ຮ່ວມມື ເພື່ອສົ່ງຜົນງານຂອງຕົນໃຫ້ສື່ມວນຊົນທີ່ຢູ່ໃນທຸກທ້ອງຖິ່ນ ເພື່ອອອກຂ່າວຄາວໃນໜັງສືພິມ, ວາລະສານ, ວິທະຍຸ, ໂທລະພາບ ແລະ ໃນສື່ຕ່າງໆທີ່ມີໃນທົ່ວປະເທດ.
ໃນເງື່ອນໄຂປັດຈຸບັນ, ສື່ໃໝ່ໄດ້ກາຍເປັນພະລັງແຮງທີ່ທັນສະໄໝ ພວກເຮົາຕ້ອງນຳໃຊ້ໃຫ້ໝົດຄຸນຄ່າ ແຕ່ການບໍລິໂພກນັ້ນຕ້ອງໄດ້ຄຳນຶງເຖິງຄວາມເປັນຈິງ, ທີ່ໄປທີ່ມາ ແລະ ຈັນຍາບັນ ຫລີກເວັ້ນບໍ່ໃຫ້ຕົກຢູ່ໃນເຫລ່ກົນຂອງພວກບໍ່ຫວັງດີໄດ້ປ່ອຍອອກ ເພື່ອໃສ່ຮ້າຍປ້າຍສີ ສປປ ລາວເຮົາ ໃນແຕ່ລະວັນ.
