ອີຢູ ປະກາດປິດຊາຍແດນເປັນເວລາ 30 ວັນ ເພື່ອຄວບຄຸມໂຣກໂຄວິດ-19 ແຜ່ລະບາດ
ລັດຖະບານຂອງປະເທດໃນກຸ່ມສະຫະພາບເອີຮົບ (ອີຢູ) ມີມະຕິປິດຊາຍແດນທັງໝົດເພື່ອປ້ອງກັນບໍ່ໃຫ້ປະຊາຊົນຈາກປະເທດອື່ນໆ ເດີນທາງເຂົ້າອີຢູເປັນເວລາ 30 ວັນ ໂດຍມີເປົ້າໝາຍທີ່ຈະຄວບຄຸມການແຜ່ລະບາດຂອງໂຣກໂຄວິດ-19 ສ່ວນການເດີນທາງຂອງພົນລະເມືອງອີຢູ ຈະຍັງໄດ້ຮັບອະນຸຍາດ ແຕ່ຕ້ອງຢູ່ພາຍໃຕ້ກົດລະບຽບທີ່ເຂັ້ມງວດ.
ເຖິງຢ່າງໃດກໍດີ ມາດຕະການດັ່ງກ່າວຈະບໍ່ບັງຄັບໃຊ້ຕໍ່ບຸກຄະລາກອນທາງການແພດ, ການຂົນສົ່ງຢາ ແລະ ສິນຄ້າປະເພດຕ່າງໆ.
ການລົງມະຕິບັງຄັບໃຊ້ມາດຕະການປິດຊາຍແດນຂອງບັນດາປະເທດສະມາຊິກກຸ່ມອີຢູ ມີຂຶ້ນພາຍຫລັງກອງປະຊຸມທາງໄກໃນເມື່ອບໍ່ດົນມານີ້ໂດຍ ທ່ານ ນາງເອີຊູລາ ຟອນ ເດີ ເລເຢນ ປະທານຄະນະກຳມາທິການ ເອີຣົບ (ອີຊີ) ເຊິ່ງເປັນອົງການບໍລິຫານຂອງອີຢູ ກ່າວວ່າ: ຂໍ້ສະເໜີໃນການປິດ ຊາຍແດນໄດ້ຮັບສຽງສະໜັບສະໜູນຢ່າງຫລວງຫລາຍຈາກປະເທດສະມາຊິກ ໂດຍແຕ່ລະປະເທດໃຫ້ຄຳໝັ້ນວ່າຈະເລີ່ມດຳເນີນໃນທັນທີ.
ເຖິງຢ່າງໃດກໍຕາມ ນາງ ຟອນ ເດີ ເລເຢນ ກ່າວວ່າ: ສະຫະຣາຊະອານາຈັກ ບໍ່ໄດ້ເຂົ້າຮ່ວມໃນການໃຊ້ມາດຕະການປິດຊາຍແດນໃນຄັ້ງນີ້ ເຖິງວ່າອີຢູ ໄດ້ເຊີນໃຫ້ ສະຫະຣາຊະອານາຈັກ ເຂົ້າຮ່ວມໃນການດຳເນີນການດັ່ງກ່າວກໍຕາມ./.
