ສະໂມສອນຢູເວນຕຸສ ປະກາດຢ່າງເປັນທາງການ ມາຕຸຍດີ ຕິດເຊື້ອໄວຣັສ COVID-19

          ສະໂມສອນບານເຕະ ຢູເວນຕຸສ ທີມດັງຈາກອີຕາລີ ໄດ້ອອກຖະແຫຼງການຢ່າງເປັນທາງການວ່າ: ແບລ ມາຕຸຍດີ ກອງກາງຂອງທີມ ແລະ ທີມຊາດຝຣັ່ງ, ເປັນນັກກີລາຄົນທີ່ 2 ຂອງສະໂມສອນທີ່ຕິດເຊື້ອໄວຣັສ COVID-19 ຫຼັງຈາກທີ່ຜົນກວດເປັນບວກ.

ທາງສະໂມສອນຢູເວນຕຸສຕົ້ນສັງກັດໄດ້ໃຫ້ ມາຕຸຍດີ ກັກບໍລິເວນ ພ້ອມທີ່ຈະຮັກສາ, ແຕ່ ມາຕຸຍດີ ເອງຍັງຄົງມີສຸຂະພາບແຂງແຮງດີ ແລະ ບໍ່ມີອາການປ່ວຍແຕ່ຢ່າງໃດ ພ້ອມນີ້ທາງທີມແພດໝໍກໍ່ໄດ້ດູແລຮັກສາຢ່າງໃກ້ຊິດ.

    ກ່ອນໜ້ານັ້ນ ດານິເອເລ ຣູການີ ກອງຫຼັງຊາວອີຕາລີ ເປັນຄົນທຳອິດໃນເຊເລອາ ອີຕາລີ ທີ່ຕິດເຊື້ອໄວຣັສດັ່ງກ່າວ ສົ່ງຜົນໃຫ້ສະມາຊິກໃນທີມບໍ່ວ່າຈະເປັນນັກເຕະ,ທີມງານ,ລວມໄປເຖີງບຸກຄົນທີ່ມີສ່ວນພົວພັນ ຕ້ອງໄດ້ຖືກກັກຕົວ

            ທັ້ງນີ້ ປະເທດອີຕາລີ ມີຜູ້ຕິດເຊື້ອໄວຣັສ COVID-19 ຈຳນວນ 27.980ຄົນ, ຮັກສາຫາຍແລ້ວ 2.749 ຄົນ, ແລະ ເສຍຊີວິດໄປແລ້ວ 7.126 ຄົນ (ອັບເດດເມື່ອວັນທີ່ 18 ມີນາ 2020 ເວລາ 07:00)