ໂຄໂຣນາປຽບເໝືອນຮ່າກິນຄົນ
ທິດກໍ່າ:
ກ່ອນພະພຸດທະເຈົ້າຈະປະຣິນິພານໄປ ພະອົງໄດ້ຕັດສັ່ງໄວ້ວ່າ: ຕົກເຂົ້າຍຸກຕະຖາຄົດ ຫລືວ່າ ສາສະໜາພຸດມີອາຍຸໄດ້ 2.500 ປີຂຶ້ນໄປ ໜ່ວຍໂລກທີ່ມະນຸດເຮົາອາໄສຢູ່ນີ້ຈະຄ່ອຍໆມີການປ່ຽນແປງໄປຕາມການເວລາໃນຫລາຍດ້ານ ເປັນຕົ້ນເກີດພາຍຸລົມແຮງ, ແຜ່ນດິນໄຫວ, ເກີດອັກຄີໄພ, ອຸທົກກະໄພ, ຮ້ອນເກີນໄປ, ໜາວເກີນໄປ, ເກີດອະສໍຣະພິດ ແລະ ກາລະໂຣກຕ່າງໆແກ່ມວນມະນຸດໃນທົ່ວໂລກ. ການປ່ຽນແປງທຸກສິ່ງທຸກຢ່າງນັ້ນມັນຈະກາຍເປັນໄພພິບັດ ຫລື ມະຫັນຕະໄພຮຸນແຮງຂຶ້ນນັບມື້ ອັນຈະເປັນໄພຄຸກຄາມທາງດ້ານໄພທຳມະຊາດ ແລະ ສັງຄົມ, ສ້າງຄວາມເດືອດຮ້ອນແກ່ມວນມະນຸດຫລາຍທີ່ສຸດເຊັ່ນວ່າ: ເກີດເສິກສົງຄາມປະຫັດປະຫານຂ້າພັນລັນແທງກັນ, ມີຄວາມເດືອດຮ້ອນຍ້ອນເກີດອັກຄີໄພ, ອຸທົກກະໄພໂຈຣະໄພ, ອຶດຫິວ, ມີຄົນຕາຍຕາມທົ່ງ, ຕາມຖະໜົນຫົນທາງ, ການໄປມາກໍບໍ່ສະດວກຍ້ອນໄພພິບັດຕ່າງໆນາໆມາກີດຂວາງທຳລາຍເຜົາຜານຊີວິດອິນຊີຂອງມວນມະນຸດ.
ຕໍ່ຄຳທຳນາຍຂອງພະພຸດທະອົງທີ່ໄດ້ກ່າວມານັ້ນ, ພວກເຮົາເຫັນວ່າມັນກາຍມາເປັນຄວາມຈິງໃຫ້ເຮົາເຫັນຕັ້ງແຕ່ເກີດສົງຄາມໂລກຄັ້ງທີໜຶ່ງ ແລະ ຄັ້ງທີສອງມາແລ້ວ. ນອກຈາກເກີດສົງຄາມໂລກແລ້ວ ຍັງເກີດສົງຄາມພາກສ່ວນ, ສົງຄາມພາກພື້ນ, ສົງຄາມລະຫວ່າງປະເທດ, ເກີດບັນຫາຄວາມຂັດແຍ່ງກັນທາງດ້ານເສດຖະກິດການເມືອງ ຈົນແກ່ຍາວມາເຖິງທຸກວັນນີ້. ສ່ວນວ່າການປ່ຽນແປງທຳມະຊາດ ແລະ ສິ່ງແວດລ້ອມຂອງໂລກນັ້ນກໍນັບມື້ເຫັນປະຈັກຕາໜັກໜ່ວງ ແລະ ໜ້າເປັນຫ່ວງຂຶ້ນເລື້ອຍໆຈົນມາຮອດຍຸກປັດຈຸບັນໄດ້ເກີດມີມະຫັນຕະໄພ ແລະ ໄພພິບັດຕ່າງໆນາໆຢ່າງໃຫຍ່ຫລວງລ້າງຜານຊີວິດອິນຊີຂອງມວນມະນຸດໃນແຕ່ລະປີຫລາຍໝື່ນ, ຫລາຍແສນ ແລະ ຫລາຍລ້ານຄົນໃນທົ່ວໂລກ.
ເວົ້າສະເພາະ ສປປ ລາວ ຂອງພວກເຮົາໃນຫ້າປີ, ສິບປີຜ່ານມານີ້ ກໍເຫັນວ່າມີປາກົດການປ່ຽນແປງທາງດ້ານທຳມະຊາດຫລາຍຂຶ້ນ, ໜັກຂຶ້ນເລື້ອຍໆ ເປັນຕົ້ນເກີດແລ້ງ, ເກີດຖ້ວມ, ເກີດຮ້ອນ, ເກີດໜາວ, ເກີດພາຍຸແຜ່ນດິນໄຫວມາແລ້ວຫລາຍຄັ້ງ. ຕໍ່ໄພພິບັດທີ່ວ່ານີ້ ໄດ້ສ້າງຄວາມເສຍຫາຍແກ່ຊີວິດອິນຊີ ແລະ ຊັບສິນຂອງປະຊາຊົນບັນດາເຜົ່າຫລວງຫລາຍພາຍມາກ.
ດັ່ງພວກເຮົາຮັບຮູ້ນຳກັນແລ້ວວ່າ: ໜຶ່ງໃນບັນຫາໜັກໜ່ວງສະເທືອນໂລກໃນປັດຈຸບັນນີ້ກໍຄືເກີດມີພະຍາດຊະນິດໃໝ່ມາຮາວີລ້າງຜານມະນຸດເຮົາຢູ່ຫລາຍປະເທດໃນທົ່ວໂລກ. ເຊື້ອພະຍາດທີ່ວ່ານີ້ກໍຄືເຊື້ອໄວຣັສສາຍພັນໃໝ່ ເອີ້ນວ່າ: ໂຄໂຣນາ 2019 ຫລື ເອີ້ນຫຍໍ້ວ່າ: ໂຄວິດ-19. ເຊື້ອພະຍາດທີ່ວ່ານີ້ແມ່ນເປັນອັນຕະລາຍຮ້າຍກາດ ແລະ ຕິດແປດໄວປານຈະຫລວດ. ຖ້າເຊື້ອພະຍາດນີ້ໄປເຂົ້າຄົນໃດປົວບໍ່ທັນແມ່ນຕາຍດັບປານຜີຮ່າກິນຄົນ ເໝືອນດັ່ງເຖົ້າແກ່ບູຮານລາວເຄີຍເວົ້າເຄີຍວ່າ. ມາຮອດປັດຈຸບັນ ເຊື້ອພະຍາດດັ່ງກ່າວໄດ້ແຜ່ລາມໄປຫລາຍສິບປະເທດແລ້ວ. ບັນດາປະເທດທີ່ປະສົບບັນຫາໜັກໜ່ວງໃນອາຊີເຮົາກໍມີເກົາຫລີ, ຍີ່ປຸ່ນ ແລະ ປະເທດອື່ນໆ. ສ່ວນທາງເອີຣົບນັ້ນກໍມີອິຕາລີ, ຝຣັ່ງ ແລະ ພວມແຜ່ລາມເຂົ້າອາເມລິກາ ແລະ ບັນດາປະເທດອື່ນໆໃນທົ່ວໂລກ.
ແນວໃດກໍຕາມ, ໃນເງື່ອນໄຂທີ່ນັກວິທະຍາສາດພວມຄົ້ນຄວ້າເຖິງທີ່ໄປທີ່ມາຢ່າງລະອຽດຊັດເຈນກໍຖືວ່າຢູ່ປະເທດຈີນອັນເປັນທີ່ມາຂອງເຊື້ອພະຍາດຊະນິດນີ້ກໍໄດ້ປາບປາມ ແລະ ປົດປ່ອຍໄປແລ້ວ ວ່າຊັ້ນ. ສ່ວນວ່າໃນບັນດາປະເທດທີ່ພວມແຜ່ລາມຢູ່ນັ້ນ ບັນດາແພດໝໍ, ນັກວິທະຍາສາດກໍພວມຮ່ວມມືກັນປາບປາມເພື່ອຢັບຢັ້ງພະຍາດດັ່ງກ່າວໃຫ້ຈິບຫາຍໄປຢ່າງສິ້ນເຊີງ. ທາງວິທະຍາສາດຍັງໄດ້ກ່າວກັນວ່າ: ເຊື້ອພະຍາດໄວຣັສສາຍພັນໃໝ່ແມ່ນເລີ່ມຈາກສັດມາສູ່ຄົນ ແລະ ຈາກຄົນຜູ້ໜຶ່ງຕໍ່ໃສ່ຫລາຍຄົນທີ່ຢູ່ໃກ້ຊິດກັນ, ຈາກນັ້ນກໍລາມພະລາມຈົວໄປສູ່ຫລາຍໆຄົນໃນທົ່ວປະເທດ. ຖ້າເຊື້ອພະຍາດນີ້ໄປເຂົ້າບຸກຄົນ ຫລື ຫລາຍໆຄົນປົວບໍ່ທັນແມ່ນຕາຍພາບດຽວເປັນຫ້າເປັນສິບ.
ສຳລັບປະເທດລາວເຮົາທີ່ມີຊາຍແດນຕິດກັບບັນດາປະເທດອ້ອມຂ້າງທີ່ໄດ້ເປັນມາແລ້ວ ແລະ ພວມແຜ່ລາມຕິດຕໍ່ໜໍ່ເນື່ອງກັນປັດຈຸບັນນີ້ຄື: ຢູ່ຈີນ, ຫວຽດນາມ, ໄທ ແລະ ຢູ່ກຳປູເຈຍ ກໍຍັງຖືວ່າປະເທດລາວເປັນເຕຊະບຸນຄຸນທີ່ຍັງບໍ່ທັນມີຄົນໃດຕິດແປດ ແລະ ຕາຍຍ້ອນ.
ເຖິງຢ່າງໃດກໍດີ, ເພື່ອເປັນການຕ້ານ ແລະ ຕອບໂຕ້ພະຍາດຊະນິດນີ້ໄດ້ຢ່າງທັນການ ພັກ ແລະ ລັດຖະບານເຮົາກໍເຮັດທຸກສິ່ງທຸກຢ່າງ ເປັນຕົ້ນລົງທຶນລົງຮອນທັງກຳລັງຊັບ, ກຳລັງແພດໝໍ, ກຳລັງພາຫະນະ ເພື່ອກຽມພ້ອມສູ້. ນອກນັ້ນ ກໍມີເພື່ອນມິດຫລາຍປະເທດໄດ້ໃຫ້ການຊ່ວຍເຫລືອໃຫ້ລອດພົ້ນຈາກວິກິດຄັ້ງນີ້ໄດ້ຢ່າງປອດໄພໄຮ້ຄົນເຈັບຄົນຕາຍຍ້ອນເຊື້ອພະຍາດໂຄໂຣນາສາຍພັນໃໝ່. ກໍຂໍໃຫ້ທຸກຄົນຈົ່ງພ້ອມກັນຫາວິທີຕ້ານດ້ວຍຕົນເອງເປັນຕົ້ນຕໍ. ປະຕິບັດດ້ວຍຕາລັກຄະນາໃນໃຈ, ມີຫລັກໝັ້ນ, ມີສິນທຳ, ບໍ່ບຽດບຽນສັດເດຍລະສານ, ບໍ່ບຽດບຽນຄົນອື່ນ, ຮັກແພງມະນຸດດ້ວຍກັນ ນັ້ນລະຄືສິ່ງຍອດຍິ່ງຂອງຄົນທີ່ມີຈັນຍາທຳແລ້ວບາບກຳກໍຈະບໍ່ມາຮາວີຕົນເອງ ນັ້ນແລ !.
