ບໍລິສັດຢາເຢຍລະມັນຈັບມື “ຟູ່ຊິງຟາມາ” ພັດທະນາວັກແຊງ ກຽມຈຳໜ່າຍທົ່ວໂລກ
ໄບໂອເອັນເທັກ (BioNTech) ບໍລິສັດການຢາສັນຊາດເຢຍລະມັນ ປະກາດຈັບມືເປັນພັນທະມິດໃນດ້ານການຢາ ຮ່ວມກັບກຸ່ມບໍລິສັດຟູ່ຊິງ (Fosun Group) ຂອງຈີນ ສຳລັບການພັດທະນາ ແລະ ການຈຳໜ່າຍວັກແຊງຕ້ານໂຄວິດ-19 ໃນປະເທດຈີນ.
ບໍລິສັດໄບໂອເອັນເທັກ ເຊິ່ງມີສຳນັກງານໃຫຍ່ຢູ່ເມືອງມາຍ ກ່າວໃນຖະແຫລງການວ່າ: ຈະມີການທົດລອງທາງຄລີນິກຂອງວັກແຊງເອັມອາຣເອັນເອ (mRNA) ຢູ່ຈີນ ຮ່ວມກັບອຸດສາຫະກຳຟູ່ຊິງຟາມາ (Fosun Pharma) ເຊິ່ງເປັນບໍລິສັດຍ່ອຍຂອງຊຽງໄຮ້ຟູ່ຊິງຟາມາຊູຕິຄໍ (ກຣຸບ) ຈຳກັດ.
ການຮ່ວມມືດັ່ງກ່າວຈະໃຊ້ປະໂຫຍດຈາກເຕັກໂນໂລຊີເອັມອາຣເອັນເອທີ່ເປັນກຳມະສິດຂອງໄບໂອເອັນເທັກ ແລະ ຄວາມສາມາດໃນການພັດທະນາ ແລະ ການຄ້າຂອງຟູ່ຊີງຟາມາໃນປະເທດຈີນ.
ຟູ່ຊິງຟາມາຈ່າຍເງິນ 135 ລ້ານໂດລາສະຫະລັດ ໃຫ້ໄປໂອເອັນເທັກ ສຳລັບການລົງທຶນລ່ວງໜ້າ ແລະ ຊໍາລະຕາມຂັ້ນຄວາມສຳເລັດຂອງວຽກ ເຊິ່ງລວມທັງການລົງທຶນ 50 ລ້ານໂດລາ ໃນຫຸ້ນໄບໂອເອັນເທັກທີ່ໄດ້ຮັບການອະນຸມັດຕາມກົດລະບຽບຂອງຈີນ.
ຕາມຂໍ້ຕົກລົງລະບຸວ່າ: ຟູ່ຊິງຟາມາຈະຈຳໜ່າຍວັກແຊງໃນປະເທດຈີນເມື່ອໄດ້ຮັບອະນຸມັດຕາມກົດລະບຽບ, ຂະນະທີ່ໄບໂອເອັນເທັກມີສິດໃນການພັດທະນາ ແລະ ຈຳໜ່າຍວັກແຊງໃນສ່ວນອື່ນຂອງໂລກ.
