ອາທິດນີ້ມວນອາກາດຮ້ອນສືບຕໍ່ປົກຄຸມທຸກ ພາກຂອງປະເທດເຮົາ

   ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 18-22 ມີນານີ້, ສະພາບອາກາດ ຢູ່ທຸກພາກຂອງປະເທດເຮົາຈະສືບຕໍ່ຮ້ອນເອົ້າ, ມີຝົນຕົກຟ້າເຫລື້ອມ ແລະ ມີລົມແຮງ ເນື່ອງຈາກຄວາມກົດດັນຕໍ່າຂອງອາກາດຮ້ອນຍັງຈະສືບຕໍ່ປົກຄຸມຢູ່ທົ່ວທຸກພາກຂອງປະເທດເຮົາ.

    ສໍາລັບສະພາບອາກາດແຕ່ລະພາກດັ່ງນີ້: ພາກເໜືອດ້ານຕາເວັນອອກ ອາກາດຈະຮ້ອນ ຂຶ້ນ ອຸນຫະພູມແຕ່ 15-31 ອົງສາ. ພາກເໜືອດ້ານຕາເວັນຕົກ  ອາກາດສືບຕໍ່ຮ້ອນຫາ ຮ້ອນເອົ້າ ອຸນຫະພູມແຕ່ 19-38 ອົງສາ. ພາກກາງ ອາກາດຍັງຈະຮ້ອນຕື່ມອີກ ອຸນຫະພູມ ຕໍ່າສຸດ 21-39 ອົງສາ. ສະເພາະແຂວງໄຊສົມບູນ, ເຂດຫລັກ 20, ເມືອງວຽງທອງ ແລະ ເມືອງນາກາຍ ຈະມີອາກາດໜາວເຢັນ, ພ້ອມຈະມີໝອກບາງປົກຫຸ້ມຢູ່ທົ່ວໄປໃນຕອນກາງ ຄືນຫາຕອນເຊົ້າ ແລະ ຈະມີລົມພັດແຮງເປັນບາງໂອກາດຢູ່ບາງບໍລິເວນ ແລະ ຈະມີຝົນຕົກ ຟ້າເຫລື້ອມ, ພ້ອມມີລົມພັດແຮງເປັນບາງໂອກາດ ອຸນຫະພູມຕໍ່າສຸດ 14-28 ອົງສາ ແລະ ພາກໃຕ້ ອາກາດຍັງຈະຮ້ອນຫາຮ້ອນເອົ້າ, ພ້ອມມີໝອກແຫ້ງປົກຫຸ້ມຢູ່ທົ່ວໄປໃນຕອນ ກາງເວັນ ແລະ ຈະມີຝົນຕົກຟ້າເຫລື້ອມ, ພ້ອມມີລົມພັດແຮງຢູ່ບາງທ້ອງຖິ່ນ ອຸນຫະພູມ ແຕ່ 23-39 ອົງສາ. ສະ ເພາະເຂດພູພຽງບໍລະເວນ ໃນໄລຍະດັ່ງກ່າວ ອາກາດຈະເຢັນຫາ ໜາວເຢັນ ແລະ ຈະມີຝົນຕົກຟ້າເຫລື້ອມ ພ້ອມມີລົມພັດແຮງຢູ່ບາງບໍລິເວນ ອຸນຫະພູມ ແຕ່ 10-28 ອົງສາ.

    ຕໍ່ສະພາບອາກາດດັ່ງກ່າວ, ອາດຈະເຮັດໃຫ້ເກີດມີພາຍະລຸດູຮ້ອນ, ຝົນ ຕົກແຮງ, ຟ້າຜ່າ ແລະ ໝາກເຫັບຕົກຢູ່ບາງທ້ອງຖິ່ນໃນແຕ່ລະພາກ. ດັ່ງນັ້ນ ຈຶ່ງແຈ້ງເຕືອນໃຫ້ປະຊາຊົນບັນ ດາເຜົ່າ ແລະ ອຳ ນາດການປົກຄອງທຸກພາກສ່ວນຈົ່ງມີສະຕິຕໍ່ສະພາບຝົນຕົກ, ລົມແຮງ ແລະ ໃຫ້ຢູ່ຫ່າງໄກຈາກຕົ້ນໄມ້ໃຫຍ່ ແລະ ສິ່ງທີ່ປູກສ້າງບໍ່ທັນສຳເລັດ, ພ້ອມໃຫ້ຕິດຕາມຂ່າວ ພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.