ຍີ່ປຸ່ນ ແນວຄິດດີ ຈັດພິທີທາງສາສະໜາອອນລາຍ
“ຍີ່ປຸ່ນ” ແນວຄິດດີ ຈັດພິທີທາງສາສະໜາອອນລາຍ, ເຜີຍແຜ່ ແລະ ອອກອາກາດທາງອິນເຕີເນັດ.
ເຖິງວ່າໄວຣັສໂຄໂຣນາສາຍພັນໃໝ່ 2019 (ໂຄວິດ-19) ແຜ່ລະບາດຢູ່ໃນປັດຈຸບັນນີ້ ເຮັດໃຫ້ປະຊາຊົນຫລາຍປະເທດບໍ່ຍອມອອກຈາກເຮືອນ ສົ່ງຜົນໃຫ້ຢູ່ຫລາຍໆປະເທດ ລວມທັງບໍລິສັດໄດ້ປັບຕົວຮັບມືກັບໄວຣັສດັ່ງກ່າວ ໂດຍໃຊ້ຊ່ອງທາງໃນການຕິດຕໍ່ສື່ສານຜ່ານອອນລາຍແທນ.
ຫລ້າສຸດ ສຳນັກຂ່າວກຽວໂດ ລາຍງານວ່າ: ໂບດຢູ່ຍີ່ປຸ່ນໄດ້ເລີ່ມຈັດພິທີທາງສາສະໜາໃນຮູບແບບໃໝ່ ເພື່ອປ້ອງກັນການແຜ່ລະບາດຂອງໄວຣັສໂຄໂຣນາສາຍພັນໃໝ່ (ໂຄວິດ-19) ໂດຍສະຖາບັນທາງສາສະໜາບາງແຫ່ງໄດ້ຕັດສິນໃຈຈັດພິທີ ແລະ ອອກອາກາດຜ່ານອິນເຕີເນັດແທນ. ຂະນະທີ່ ບາງແຫ່ງຈັດພິທີໃຫ້ປະຊາຊົນກຸ່ມນ້ອຍໆເທົ່ານັ້ນ.
ລາຍງານລະບຸວ່າ: ໂບດກາໂຕລິກຢູ່ໂຕກຽວ (Catholic Archdiocese of Tokyo) ໄດ້ຢຸດການຈັດພິທີມິສຊາປະຈຳວັນອາທິດທັງໝົດໃນເດືອນມີນານີ້ ໂດຍຈະຖ່າຍທອດສົດຜ່ານອິນເຕີເນັດແທນ. ການຕັດສິນໃຈດັ່ງກ່າວມີຂຶ້ນ ເພາະຜູ້ທີ່ມາໂບດສ່ວນຫລາຍເປັນຜູ້ອາຍຸສູງ ເຊິ່ງເປັນກຸ່ມສ່ຽງຈະຕິດເຊື້ອໂຄວິດ-19 ຈົນມີອາການຮຸນແຮງ.
