ເມື່ອການແຂ່ງຂັນບໍ່ຍອມເລື່ອນ..! ນັກເຕະເລີຍພ້ອມໃຈກັນໃສ່ຜ້າອັດປາກ ລົງແຂ່ງ ປະທ້ວງລີກ

ຕາມການລາຍງານຂອງສຳນັກຂ່າວຕ່າງປະເທດໃຫ້ຮູ້ວ່າ: ເປົາໂລ ລຸຍ ຮອງປະທານສະໂມສອນ ເກຣມິໂອ ທີມໃນລີກສູງສຸດຂອງປະເທດບຣາຊິນ, ກ່າວເຫດຜົນທີ່ນັກເຕະໃສ່ຜ້າອັດປາກ ລົງສະໜາມ ໃນນັດທີ່ສະເໝີກັບ ເຊົາ ລຸຍຊ໌ 3-3 ເມື່ອວັນທີ 15 ມີນາທີ່ຜ່ານມາ. ເພື່ອເປັນການປະທ້ວງກໍລະນີທີ່ຍັງໃຫ້ມີການແຂ່ງຂັນທັງທີ່ກໍາລັງເກີດວິກິດ    ໂຄວິດ-19 ລະບາດ.

ການແຂ່ງຂັນບານເຕະໃນລີກ ບຣາຊິນ ຍັງດໍາເນີນການແຂ່ງຂັນຕໍ່ໄປ ໂດຍເປັນການແຂ່ງຂັນແບບປິດ (ຫ້າມໃຫ້ກອງເຊຍເຂົ້າມາຊົມ), ຮອງປະທານສະໂມສອນ ເກຣມິໂອ ເປີດໃຈຫຼັງຈົບການແຂ່ງຂັນວ່າ: ນີ້ຄືການປະທ້ວງຈາກນັກເຕະທີ່ໃສ່ຜ້າອັດປາກລົງສະໜາມ, ມັນເປັນການສະແດງອອກຢ່າງຊັດເຈນຂອງນັກເຕະໃສ່ຜ້າອັດປາກລົງແຂ່ງຂັນ

 ເພື່ອຕ້ອງການບອກວ່າ ພວກເຮົາສະໜັບສະໜູນໃຫ້ການແຂ່ງຂັນຕ້ອງຢຸດ ເພື່ອໃຫ້ຫຼາຍຢ່າງໄດ້ດີຂຶ້ນ ແລະ ຈໍາເປັນຕ້ອງຄວບຄຸມສະຖານະການເຫຼົ່ານີ້ ເຊິ່ງເປັນເລື່ອງທີ່ຍາກລໍາບາກ ແລະ ຕ້ອງໃຫ້ຄວາມສໍາຄັນກັບຊີວິດເປັນອັນດັບທໍາອິດ.