ປະຊາຊົນເປັນຫ່ວງບັນຫາຄວາມສະອາດໃນຕົວເມືອງ

   ປັດຈຸບັນ, ນະຄອນຫລວງວຽງຈັນເວົ້າລວມ, ເວົ້າສະເພາະແມ່ນ 4 ເມືອງໃນເທດສະບານ, ພວມຜະເຊີນບັນຫາຄວາມບໍ່ສະອາດ ເປັນຕົ້ນ: ເສັ້ນທາງເປ່ເພ, ຂີ້ດິນສະສົມຕາມຂອບທາງກໍໃຫ້ເກີດຂີ້ຝຸ່ນປິວໄຫງ່ເປັນຈໍານວນຫລາຍຕາມຖະໜົນຫົນທາງ, ສາເຫດເກີດຈາກປະຊາຊົນຈໍານວນໜຶ່ງສວາຍໂອກາດລັກ

ລອບຖີ້ມຂີ້ເຫຍື້ອຊະຊາຍ, ຂະນະດຽວກັນການບໍລິການເກັບມ້ຽນຂີ້ເຫຍື້ອກໍຍັງບໍ່ທັນທົ່ວເຖິງ ແລະ ເຮັດບໍ່ໄດ້ມາດຕະຖານ, ກະໂຕລົດເກັບຂີ້ເຫຍື້ອເອງບາງເທື່ອກໍເຮັດໃຫ້ຂີ້ເຫຍື້ອຕົກເຮ່ຍຢາຍຕາມແຄມທາງ ແລະ ມີນໍ້າເປື້ອນກິ່ນເໝັນຍ້ອຍລົງໃສ່ທາງໂດຍບໍ່ໄດ້ຫົວຊາ, ຜູ້ສຳປະທານຕະຫລາດ ແລະ ສວນສາທາລະນະບາງແຫ່ງຍັງບໍ່ສາມາດຮັກສາອະນາໄມໃນຂອບເຂດຮັບຜິດຊອບຂອງຕົນໄດ້ດີເທົ່າທີ່ຄວນ, ມີຫຍ້າຮົກເຮື້ອຕາມດິນຫວ່າງ ແລະ ຍິ່ງໄປກວ່ານັ້ນຍັງມີການລັກລອບຈູດຂີ້ເຫຍື້ອ, ຈູດຫຍ້າແຫ້ງຊະຊາຍຕາມແຄມທາງ, ຂະນະດຽວກັນການບັງຄັບໃຊ້ລະບຽບກົດໝາຍຕໍ່ຜູ້ລະເມີດຍັງບໍ່ທັນເຂັ້ມງວດ, ບວກກັບຜູ້ປະກອບການ ແລະ ປະຊາຊົນຈຳນວນໜຶ່ງມີພຶດຕິກຳສວຍໂອກາດ, ຂາດຄວາມຮັບຜິດຊອບ ເປັນຕົ້ນ: ລົດຂົນດິນ-ແຮ່ ເຂົາມາໃນຕົວເມືອງຍັງມັກເອົາດິນຊາຍປຽກມີນໍ້າປົນໄຫລລົງສູ່ຖະໝົນຫົນທາງ, ເຂດກໍ່ສ້າງຫລາຍແຫ່ງຍັງມີເສດດິນຕົກເຮ່ຍໃສ່ທາງ ເປີະເປື້ອນ ແລະ ສົ່ງຜົນກະທົບອັນບໍ່ດີຕໍ່ສະພາບແວດລ້ອມ ແລະ ສັງຄົມ. ນອກຈາກນີ້, ການປຸກສ້າງຕຶກອາຄານ ຫລື ເຮືອນຊານຕ່າງໆໃນຕົວເມືອງກໍມີປາກົດການກວມເອົາທາງຍ່າງ ຫລື ເສັ້ນທາງເປັນບ່ອນວາງວັດສະດຸປະເພດຫີນ-ຊາຍ ແລະ ອື່ນໆ. ຊຶ່ງພຶດຕິກຳທີ່ກ່າວມານີ້, ເປັນການຝ່າຝືນລະບຽບກົດໝາຍ, ສ້າງຜົນສະທ້ອນບໍ່ດີຫລາຍຕໍ່ດ້ານສິ່ງແວດລ້ອມໃນຕົວເມືອງ, ແຕ່ພັດຍັງບໍ່ທັນໄດ້ຮັບການປະຕິບັດວິໄນຢ່າງຈິງຈັງ, ເຮັດໃຫ້ເກີດພຶດຕິກຳຊີນເຄີຍປຽບເໜືອນດັ່ງປາບໍ່ຢ້ານນໍ້າຮ້ອນ. ຕໍ່ບັນຫາດັ່ງກ່າວມີປະຊາຊົນສະແດງຄວາມເປັນຫ່ວງຕໍ່ພາບພົດຂອງນະຄອນຫລວງວຽງຈັນ, ເຊິ່ງເປັນເມືອງເອກ, ເປັນສູນກາງທາງດ້ານເສດຖະກິດ ແລະ ຮຽກຮ້ອງໃຫ້ອຳນາດການປົກຄອງນະຄອນວຽງຈັນເອົາໃຈໃສ່ຈັດຕັ້ງປະຕິບັດນະໂຍບາຍຕ່າງໆກ່ຽວກັບການສ້າງນະຄອນຫລວງໃຫ້ເປັນຕົວເມືອງສີຂຽວ, ສະອາດຈົບງາມ ແລະ ໜ້າຢູ່ໜ້າອາໄສສຳລັບປະຊາຊົນ ກໍຄືແຂກຕ່າງດ້າວທີ່ເດີນທາງມາປະຕິບັດໜ້າທີ່ ຫລື ທ່ອງທ່ຽວໃນນະຄອນຫຼວງວຽງຈັນໃຫ້ດີຍິ່ງຂຶ້ນ ແລະ ຕ້ອງເດັດຂາດເຂັ້ມງວດໃນການບັງຄັບໃຊ້ນິຕິກຳກ່ຽວກັບການຮັກສາຄວາມສະອາດ. ປັດຈຸບັນ ລັດຖະບານພວມຂຸ້ນຂ້ຽວຫ້າງຫາກະກຽມໃສ່ການເປີດປີທ່ອງທ່ຽວລາວຄັ້ງທີ 3 ໃນປີ 2018 ໂດຍມີເປົ້າໝາຍຈະເພີ່ມຈຳນວນນັກທ່ອງທ່ຽວໃຫ້ບັນລຸໄດ້ 5 ລ້ານຄົນຕໍ່ປີ. ສະນັ້ນ ມັນຍິ່ງມີຄວາມຈຳເປັນທີ່ທຸກພາກສ່ວນບໍ່ວ່າພາກລັດ, ເອກະຊົນ ຕະຫລດຮອດປະຊາຊົນຊາວນະຄອນຫຼວງວຽງຈັນຕ້ອງໄດ້ຮ່ວມກັນບຸກທະລຸເພື່ອແກ້ໄຂບັນຫາເປີະເປື້ອນໃນຕົວເມືອງ ແລະ ພ້ອມກັນສ້າງນະຄອນຫລວງວຽງຈັນມີຄວາມຈົບງາມສີວິໄລ ແລະ ໜ້າຢູ່.