ທຣຳ ປະກາດພາວະສຸກເສີນທົ່ວປະເທດ ພ້ອມທຸ້ມເງິນ 50.000 ລ້ານໂດລາຮັບມືໂຄວິດ-19
ໃນວັນທີ 13 ມີນານີ້, ປະທານາທິບໍດີ ໂດນັລທຣຳ ປະທານາທິບໍດີສະຫະລັດອາເມລິກາ ໄດ້ປະກາດພາວະສຸກເສີນແຫ່ງຊາດ ເພື່ອຕໍ່ສູ້ກັບເຊື້ອໄວຣັສໂຄວິດ-19, ທັງ 50 ເມືອງທົ່ວປະເທດ ແລະ ພ້ອມອະນຸມັດງົບປະມານສຸກເສີນ 50.000 ລ້ານໂດລາສະຫະລັດ ໃນການຮັບມືກັບວິກິດດ້ານສາທາລະນະສຸກຂອງການລະບາດເຊື້ອໄວຮັສດັ່ງກ່າວ, ທັງເປີດຈຸດເກັບຕົວຢ່າງຄັດກອງເຊື້ອແບບ drive-thru ຢູ່ຕາມຫ້າງຮ້ານໃຫຍ່ໆຄື: Walmart, Target ແລະ CVS ທົ່ວປະເທດເພື່ອໃຫ້ປະຊາຊົນຜູ້ຕ້ອງສົງໄສສາມາດເຂົ້າຮັບການເກັບຕົວຢ່າງເພື່ອກວດເຊື້ອໄດ້ຢ່າງມີປະສິດທິພາບ ແຕ່ ທຣຳ ບອກວ່າຈຸດຄັດກອງດັ່ງກ່າວຈະບໍ່ສາມາດກວດຫາເຊື້ອໄດ້ໝົດທຸກຄົນ.
ຄຳປະກາດຂອງ ທຣຳ ເຮັດໃຫ້ລັດຖະບານໄດ້ສ້າງເວັບໄຊພິເສດຫນຶ່ງຂຶ້ນມາເພື່ອດຳເນີນການໂດຍກູເກີລ ເພື່ອໃຫ້ປະຊາຊົນສາມາດປະກອບຂໍ້ມູນລາຍລະອຽດວ່າຕົນເອງມີຄວາມສ່ຽງຕິດເຊື້ອ ແລະ ສະແດງອາການປ່ວຍອອກແນວໃດຫລືບໍ່? ຈາກນັ້ນເວັບໄຊຈະແຈ້ງສະຖານທີ່ຈຸດກວດສອບທີ່ເປັນແບບ drive-thru ທີ່ຢູ່ໃກ້ທີ່ສຸດ ເພື່ອໃຫ້ປະຊາຊົນເຂົ້າຮັບການກວດສອບໄດ້ຢ່າງງ່າຍດາຍ.
ທຣຳ ກ່າວຕື່ມວ່າ: ຕົນເອງກໍຈະເຂົ້າກວດຫາເຊື້ອໄວຣັສເຊັ່ນກັນ, ເຖິງແມ່ນວ່າຈະບໍ່ມີອາການປ່ວຍໃດໆກໍຕາມ, ພາຍຫລັງໄດ້ພົວພັນໃກ້ຊິດຄົນທີ່ຕິດເຊື້ອໂຄວິດມາກ່ອນ ໂດຍສະເພາະເຈົ້າໜ້າທີ່ສື່ມວນຊົນທີ່ໄດ້ຕິດຕາມຜູ້ນຳເບຣຊິນ ແລະ ເຂົ້າຮ່ວມກອງປະຊຸມກັບລັດຖະມົນຕີຫາດໄທຂອງອົດສະຕຣາລີ ທີ່ໄດ້ປະກາດວ່າຕົນຕິດເຊື້ອດັ່ງກ່າວ.
