ຈະຕ້ານພະຍາດ covid-19 ໄດ້ແນວໃດ?

   ດັ່ງທີ່ເຮົາຮູ້ກັນແລ້ວວ່າ: ປັດຈຸບັນ, ທົ່ວໂລກກຳລັງພະເຊີນກັບໄພຄຸກຄາມຮ້າຍແຮງຈາກການລະບາດຂອງພະຍາດ ອັກເສບປອດສາຍພັນໃໝ່ ຫລື ເອີ້ນກັນວ່າ: covid-19 ມີຜູ້ຕິດເຊື້ອທັງໝົດ 128,343 ຄົນ, ເພີ່ມຂື້ນ 2.208 ຄົນ ແລະ ພະຍາດດັ່ງກ່າວນີ້, ໄດ້ຂ້າຊີວິດຄົນໃນຫລາຍປະເທດໄປແລ້ວກວ່າ 4 ພັນຄົນ, ຊຶ່ງທາງອົງການອະນາໄມໂລກ ໄດ້ແຈ້ງວ່່າ: ການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ເປັນການລະບາດໃຫຍ່ ຫລື pandemic ຫລັງເຊື້ອລຸກລາມໄປໃນ 118 ປະເທດ ແລະ ເຂດແຄ້ນທົ່ວໂລກ, ສະນັ້ນ ຕໍ່ກັບການວິກິດນີ້, ຫລາຍປະເທດກໍໄດ້ເອົາໃຈໃສ່ສະກັດກັ້ນປ້ອງກັນ. ສະເພາະ ຢູ່ ສປປ ລາວ, ກໍເປັນອີກປະເທດໜຶ່ງທີ່ຍັງບໍ່ທັນພົບກໍລະນີຕິດເຊື້ອ, ແຕ່ທາງລັດຖະບານກໍບໍ່ໄດ້ລົດລະ ຫລື ນີ້ງນອນໃຈ ຕໍ່ກັບບັນຫາດັ່ງກ່າວ, ໂດຍຕັ້ງຄະນະສະເພາະກິດຕິດຕາມເຝົ້າລະວັງ, ວາງແຜນປ້ອງກັນ ແລະ ຄວບຄຸມໃຫ້ເຂັ້ມງວດ, ຊຶ່ງ ສປປ ລາວ ກໍເປັນປະເທດມີຄວາມສ່ຽງສູງທີ່ຈະມີການຕິດເຊື້ອ ແລະ ມີການແຜ່ລະບາດຢ່າງໄວ ຖ້າຫາກເຮົາບໍ່ເຂັ້ມງວດໃນການປ້ອງກັນ, ດັ່ງນັ້ນໃນວັນທີ 12 ມີນາ ນີ້, ຄະນະສະເພາະກິດ ໄດ້ປຶກສາຫາລືການຈັດຕັ້ງປະຕິບັດປ້ອງກັນ ແລະ ຄວບຄຸມພະຍາດ ໂຄວິດ-19 ຢູ່ ສປປ ລາວ ໃຫ້ໄດ້ຮັບຜົນດີກ່ວາເກົ່າ, ຈາກການຫາລື ແລະ ປະກອບຄຳເຫັນຂອງບັນດາຜູ້ເຂົ້າຮ່ວມກອງປະຊຸມເຫັນດີວ່າ: ເຖິງວ່າປະເທດ ເຮົາຍັງບໍ່ທັນມີກໍລະນີຜູ້ເປັນພະຍາດ ໂຄວິດ-19 ກໍຕາມແຕ່ກໍໄດ້ມີມາດຕະການສຳຄັນຈຳນວນໜຶ່ງແລ້ວ, ແຕ່ມີຄວາມຈຳເປັນຢ່າງຍິ່ງທີ່ຈະຕ້ອງໄດ້ຍົກລະດັບມາດຕະການ ປ້ອງກັນໃຫ້ເຂັ້ມງວດ ແລະ ເຂັ້ມແຂງກ່ວາເກົ່າ, ໂດຍສະເພາະການປະຕິບັດບັນດາແຈ້ງການຕ່າງໆທີ່ທາງຄະນະສະເພາະກິດວາງອອກເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19, ກອງປະຊຸມ ໄດ້ສະເຫນີໃຫ້ລັດຖະບານ ພິຈາລະນາປິດບາງດ່ານທ້ອງຖິ່ນ ແລະ ດ່ານປະເພນີ, ຍ້ອນຢູ່ບັນດາດ່ານດັ່ງກ່າວມີປະຊາຊົນລາວ ແລະ ປະຊາຊົນປະເທດອ້ອມຂ້າງ ເຂົ້າ-ອອກຫລາຍ, ພະນັກງານກວດວັດອຸນຫະພູມຮ່າງກາຍ, ຄວາມກຽມພ້ອມຂອງສະຖານທີ່ກັກບໍລິເວນຄົນເຈັບບແລະ ບັນຫາອື່ນໆ ຍັງເຮັດບໍ່ໄດ້ດີ ແລະ ຍັງບໍ່ພຽງພໍ, ເຊິ່ງອາດເປັນຊ່ອງຫວ່າງໃຫ້ຜູ້ເປັນພະຍາດເຂົ້າມາແຜ່ເຊື້ອ ຢູ່ປະເທດເຮົາ, ລວມໄປເຖິງການຢຸດອອກໜັງສືຜ່ານແດນໃຫ້ນັກທ່ອງທ່ຽວທີ່ເດີນທາງເຂົ້າມາລາວ ໂດຍສະເພາະ ບັນດາດ່ານເຊື່ອມຕໍ່ບັນດາປະເທດທີ່ມີການລະບາດຂອງພະຍາດ ໂຄວິດ-19, ໃຫ້ກະຊວງສາທາລະນະສຸກຈັດລຽງບູລິມະສິດ ຄວາມຕ້ອງການ, ເຄື່ອງມື, ອຸປະກອນການແພດ ທີ່ມີຄວາມຈຳເປັນຮີບດ່ວນ ຕາມລາຍການຈັດຊື້ 43 ລາຍການ ມູນຄ່າກວ່າ 22 ຕື້ກີບ ທີ່ທາງກະຊວງ ສາທາລະນະສຸກໄດ້ຂື້ນແຜນໄວ້ແລ້ວ.

    ມາດຕະການປ້ອງກັນພະຍາດ ໂຄວິດ-19 ທີ່ລັດຖະບານວາງອອກແມ່ນມີຄວາມເຂັ້ມງວດສົມຄວນ, ແຕ່ຖ້າຫາກເຮົາບໍ່ມີຄວາມສາມັກຮ່ວມແຮງກັນເອົາໃຈໃສ່ປ້ອງກັນສະກັດກັ້ນ, ໂດຍສະເພາະການກວດກາຄົນເຂົ້າ-ອອກ ຢ່າງເຂັ້ມງວດແລ້ວ, ພະຍາດນີ້ ກໍມີຄວາມສ່ຽງທີ່ຈະແຜ່ລະບາດໄດ້ສູງສົມຄວນ, ເຮົາຄວນຮ່ວມແຮງຮ່ວມໃຈກັນ ດັ່ງສຸພາສິດທີ່ວ່າ: “ໄມ້ລຳດຽວລ້ອມຮົ້ວບໍ່ໄຂ່ວ ໄພ່ບໍ່ພ້ອມແປງບ້ານບໍ່ຮຸ່ງເຮືອງ”