ຕິດເກມອອນລາຍຕາຍທັງເປັນ
ຂ້ອຍເປັນຜູ້ຍິງອາຍຸ 38 ປີ ມີຜົວ ແລະ ລູກ 1 ຄົນທີ່ເປັນໜ້າຮັກໜ້າແພງ, ຂ້ອຍເປັນພະນັກງານລັດ, ເກີດໃນຄອບຄົວທີ່ມີການສຶກສາ ຂ້ອຍເອງກໍຮຽນຈົບຊັ້ນປະລິນຍາໂທຢ່າງດີ.
ເຖິງແມ່ນຂ້ອຍຈະເປັນຜູ້ຍິງກໍຕາມແຕ່ຂ້ອຍມັກຫລິ້ນການພະນັນ ໂດຍສະເພາະແມ່ນຫລິ້ນການພະນັນອອນລາຍ ໃນຂະນະທີ່ຜົວຂອງຂ້ອຍແມ່ນບໍ່ໃກ້ເລີຍເລື່ອງແບບນີ້. ຜົວຂ້ອຍເປັນຄົນດີ ດຸໝັ່ນຂະຫຍັນພຽນໃນການເຮັດວຽກ, ເຂົາບໍ່ຕ້ອງການເງິນຄຳທີ່ຫາມາໄດ້ແບບບໍ່ຊອບທຳ, ສ່ວນຂ້ອຍຊໍ້າພັດຕ່າງກັບນິໄສຂອງຜົວ ທີ່ຍາມໃດກໍຄິດວ່າໂຕເອງຫາເງິນໄດ້ແບບງ່າຍໆ.
ໃນເບື້ອງຕົ້ນການຫລິ້ນເກມຂອງຂ້ອຍກໍມີມື້ໄດ້ ມີມື້ເສຍ, ຫຼັງຈາກນັ້ນກໍຍິ່ງເຮັດໃຫ້ຂ້ອນນັບມື້ບືນເລິກເຂົ້າໄປຊັກໄຊ້. ໃນເມື່ອກ່ອນ ທີ່ຍັງບໍ່ທັນຫລິ້ນພະນັນ ຂ້ອຍບໍ່ເຄີຍຢືມເງິນໃຜຈັກເທື່ອ, ເງິນເດືອນທັງຜົວ ແລະ ເມຍໂຮມເຂົ້າກັນກໍປະຢັດໄດ້ເດືອນລະ 20-25 ລ້ານກີບ ແລະ ກໍໃຊ້ຈ່າຍສຸດທີ່ປະຢັດ. ແຕ່ຄ່າຂ້ອຍຕິດເກມມານີ້ ບໍ່ທັນໄດ້ ເຄີ່ງປີ ກໍມີແນວຄິດຢາກລັກເອົາເງິນປະຢັດຂອງຄອບຄົວໄປໃຊ້ຈ່າຍໃນການຫລິ້ນເກມ ແລະ ສອງສາມເດືອນຜ່ານມານີ້ເງິນເດືອນກໍປະຢັດບໍ່ໄດ້ເລີຍ ສຸດທ້າຍກໍໄດ້ໄປກູ້ຢືມເປັນວັນວັນ.
ຢູ່ມາມື້ໜຶ່ງ ຂ້ອຍໄດ້ຮັບໃບແຈ້ງໜີ້ 10 ລ້ານກີບ, ຜົວໂສກເສົ້າຫງວມເຫງົາ ແຕ່ກໍບໍ່ໄດ້ຮ້າຍຂ້ອຍແມ່ນແຕ່ໜ້ອຍດຽວ ແຕ່ເຂົາຍັງໄດ້ເອົາເງິນໄປໄຊ້ແທນໃຫ້ຂ້ອຍ ແລະ ເວົ້າວ່າ ເທື່ອນີ້ເປັນເທື່ອທຳອິດ ແລະ ກໍໃຫ້ເປັນເທື່ອສຸດທ້າຍ. ຂ້ອຍຄິດຈະຕັດສິນໃຈເຊົາຫຼີນຫຼາຍເທື່ອແລ້ວ ແຕ່ກໍເຊົາບໍ່ໄດ້. ທ່ານຜູ້ອ່ານຄົນໃດມີວິທີເຊົາຫລິ້ນການພະນັນໄດ້ ກະລູນາບອກຂ້ອຍແດ່ ກ່ອນທີ່ຂ້ອຍຈະຫຼ້າສວາຍ ແລະ ໝົດຕົວໄປກວ່ານີ້.
