ອິນເດຍປະກາດປິດປະເທດ ລະງັບວີຊາທ່ອງທ່ຽວ
ປະເທດອິນເດຍ ປະກາດປິດປະເທດ ລະງັບວີຊາທ່ອງທ່ຽວທັງໝົດ ພາຍຫລັງຈຳນວນຜູ້ຕິດເຊື້ອໂຄວິດ-19 ພາຍໃນປະເທດເພີ່ມເປັນ 60 ຄົນ.
ອິນເດຍປະກາດຍົກລະດັບມາດຕະການປ້ອງກັນເຊື້ອໄວຣັສໂຄໂຣນາໂດຍການສັ່ງຫ້າມຄົນຕ່າງປະເທດເຂົ້າປະເທດ ແລະ ໂຈະອອກວີຊາທ່ອງທ່ຽວທັງໝົດ ພາຍຫລັງຈຳນວນຜູ້ຕິດເຊື້ອພາຍໃນປະເທດເພີ່ມເປັນ 60 ຄົນ ແລະ ອົງການອະນາໄມໂລກ ປະກາດໃຫ້ຍົກລະດັບການແຜ່ລະບາດຂອງໂຄວິດ-19 ເປັນລະດັບການແຜ່ລະບາດໄປທົ່ວໂລກ (pandemic) ປະກາດດັ່ງກ່າວອອກມາຫລັງຈາກວັນທີ 11 ມີນາ ລັດຖະບານອິນເດຍຈັດກອງປະຊຸມຮີບດ່ວນລະຫວ່າງກະຊວງຕ່າງໆ ໄດ້ແກ່ ກະຊວງສາທາລະນະສຸກ, ກະຊວງປ້ອງກັນຄວາມສະຫງົບ, ກະຊວງການຕ່າງປະເທດ ແລະ ກະຊວງອື່ນໆ ເພື່ອຊອກຫາມາດຕະການໃນການປ້ອງກັນບັນຫາຮ່ວມກັນ ໂດຍຜົນຈາກກອງປະຊຸມມີ 6 ບັນຫາສຳຄັນຄື:
- ວີຊາທັງໝົດທີ່ເຄີຍໃຫ້ໄປກັບປະຊາຊົນຕ່າງສັນຊາດນັ້ນໃຫ້ໂຈະໄປເຖິງວັນທີ 15 ເມສາ ໂດຍໃຫ້ມີຜົນບັງຄັບໃຊ້ໃນວັນທີ 13 ມີນາ ໃນທຸກຊ່ອງທາງທີ່ຊາວຕ່າງຊາດຈະເດີນທາງມາອິນເດຍ. ທັງນີ້ໃຫ້ມາດຕະການນີ້ຍົກເວັ້ນວີຊາທາງການທູດ, ວີຊາທາງການ, ວີຊາສຳລັບສະຫະປະຊາຊາດ ແລະ ອົງການສາກົນ, ວີຊາເຮັດວຽກ ແລະ ວີຊາໂຄງການ.
- ວີຊາສຳລັບຊາວຕ່າງປະເທດທີ່ຢູ່ໃນປະເທດອິນເດຍແລ້ວນັ້ນໃຫ້ຍັງຢູ່ໄດ້ ແຕ່ຕ້ອງຕິດຕໍ່ສຳນັກງານກວດຄົນເຂົ້າເມືອງ FRRO/FRO ທີ່ໃກ້ທີ່ສຸດຜ່ານລະບົບ e-FRRO ສຳລັບການຢູ່ຕໍ່.
- ວີຊາທ່ອງທ່ຽວຟຣີທີ່ລັດຖະບານໃຫ້ແກ່ກຸ່ມຄົນທີ່ຖືບັດອິນເດຍຈະຖືກໂຈະເຊັ່ນດຽວກັນຈົນຮອດວັນທີ 15 ເມສາ ໂດຍໃຫ້ມີຜົນບັງຄັບໃຊ້ໃນວັນທີ 13 ມີນາ ໃນທຸກຊ່ອງທາງທີ່ຄົນຕ່າງປະເທດຈະເດີນທາງມາອິນເດຍ.
- ສຳລັບຄົນຕ່າງປະເທດທີ່ຕ້ອງການເດີນທາງມາອິນເດຍຈາກເຫດຜົນຈຳເປັນໃດໆ ໃຫ້ຕິດຕໍ່ສະຖານທູດ ຫລື ສະຖານກົງກຸນໃນການອອກວີຊາໃຫ້ເປັນກໍລະນີພິເສດຕາມຄວາມຈຳເປັນ.
- ສຳລັບຜູ້ທີ່ກຳລັງເດີນທາງມາອິນເດຍ ລວມທັງຄົນອິນເດຍທີ່ມີປະຫວັດການເດີນທາງມາຈາກຈີນ, ອິຕາລີ, ອີຣານ, ສ.ເກົາຫລີ, ຝຣັ່ງ, ແອັສປາຍ ແລະ ເຢຍລະມັນ ພາຍຫລັງວັນທີ 15 ກຸມພາ ຕ້ອງຖືກກັກບໍລິເວນຢ່າງໜ້ອຍ 14 ວັນ ໂດຍໃຫ້ມີຜົນບັງຄັບໃຊ້ໃນວັນທີ 13 ເມສາ ໃນທຸກຊ່ອງທາງທີ່ຄົນຕ່າງປະເທດຈະເດີນທາງມາອິນເດຍ.
- ທຸກຊ່ອງທາງການເດີນທາງລະຫວ່າງປະເທດໃນເຂດຊາຍແດນຂອງອິນເດຍທັງໝົດຈະໄດ້ຮັບການກວດກາຢ່າງເຂັ້ມງວດໃນການຜ່ານແດນ ໂດຍສະເພາະການກວດທາງການແພດ ເຊິ່ງຈະມີລາຍລະອຽດແຈ້ງຕໍ່ໄປ ໂດຍກະຊວງປ້ອງກັນຄວາມສະຫງົບ.
