ທ່ານນາຍົກເຄື່ອນໄຫວຊຸກຍູ້ການຜະລິດເມືອງຊະນະຄາມ

 ໃນວັນທີ 13 ມີນານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ຄະນະ, ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານການຜະລິດເປັນສີນຄ້າ ແລະ ແກ້ໄຂຄວາມທຸກຍາກຢູ່ເມືອງຊະນະຄາມແຂວງວຽງຈັນ ແລະ ໄດ້ໃຫ້ກຽດໂອ້ລົມບັນດາຄະນະນໍາຂອງແຂວງ ແລະ ເມືອງ, ຊຶ່ງກ່ອນອື່ນໄດ້ສະແດງຄວາມຊົມເຊີຍຜົນສຳເລັດປະຊາຊົນແຂວງວຽງຈັນເວົ້າລວມ, ເວົ້າສະເພາະແມ່ນຊາວເມືອງຊະນະຄາມສາມາດຍາດມາໄດ້ໃນໄລຍະຜ່ານມາ. ພ້ອມທັງຍົກໃຫ້ເຫັນສະພາບເງື່ອນໄຂ, ທ່າແຮງ ແລະ ບັນຫາສິ່ງທ້າທາຍຂອງການພັດທະນາ, ໂດຍເນັ້ນໃຫ້ການນຳແຂວງ, ເມືອງເອົາໃຈໃສ່ສ້າງເງື່ອນໄຂອຳນວຍຄວາມສະດວກໃຫ້ແກ່ການດຳລົງຊີວິດ ກໍຄືການຜະລິດເປັນສີນຄ້າຂອງປະຊາຊົນ, ໝູນໃຊ້ທ່າແຮງທາງທຳມະຊາດ, ສົ່ງເສີມການປູກພືດປອດສານພິດຫລຸດຜ່ອນການນໍາໃຊ້ສານເຄມີທີ່ອັນຕະລາຍເຂົ້າໃນການຜະລິດເພື່ອຮັບປະກັນການປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມໃຫ້ຍືນຍົງ. ນອກຈາກນີ້, ກໍຕ້ອງເອົາໃຈໃສ່ແກ້ໄຂບັນຫາລັກລອບຕັດໄມ້ທໍາລາຍປ່າຢ່າງເດັດຂາດ, ບັນຫາແຮງງານຜິດລະບຽບກົດໝາຍ, ບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆຢ່າງເຂັ້ມງວດຕາມລະບຽບກົດໝາຍ.

ໃນໂອກາດນີ້, ທ່ານນາຍົກລັດຖະມົນຕີໄດ້ໄປຢ້ຽມຢາມໂຮງໝໍເມືອງ, ໄປເບິ່ງການດໍາເນີນກິດຈະການໂຮງສີໝາກເດືອຍຢາງຢ່າງ, ກຸ່ມຕົວແບບການປຸງແຕ່ງກ້ວຍອົບເນີຍ-ອົບແດດ, ກວນໝາກຂາມຫວານ ແລະ ກ້າເບ້ຍໄມ້ຂາຍທີ່ບ້ານປາກມີ້ນໍາອີກ.

ເມືອງຊະນະຄາມແມ່ນໜຶ່ງໃນ 11 ເມືອງຂອງແຂວງວຽງຈັນ, ເປັນເມືອງມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວສະເລ່ຍ 8%, ລາຍຮັບສະເລ່ຍບັນລຸ 1.775 ໂດລາສະຫະລັດຕໍ່ຄົນຕໍ່ປີ, ປີ 2016 ສາມາດເກັບລາຍຮັບເຂົ້າງົບປະມານໄດ້ 4,74 ຕື້ກີບເທົ່າກັບ 110,45% ຂອງຄາດໝາຍ, ທົ່ວເມືອງມີໄຟຟ້າຊົມໃຊ້ 100% ແລະ ອັນພົ້ນເດັ່ນແມ່ນມີສິນຄ້າໜຶ່ງເມືອງໜຶ່ງຜະລິດຕະພັນ (ODOP) ເປັນຈໍານວນຫລາຍ.