ອະນາໄມໂລກປະກາດໃຫ້ໂຄວິດ-19 ເປັນ “ການລະບາດໃຫຍ່” ທົ່ວໂລກ
ອົງການອະນາໄມໂລກ (WHO) ປະກາດໃຫ້ການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ເປັນ
“ການລະບາດໃຫຍ່” ຫລື pandemic ຫລັງຈາກເຊື້ອລຸກລາມໄປໃນ 118 ປະເທດ ແລະ ດິນແດນທົ່ວໂລກ
ແລະ ມີຜູ້ຕິດເຊື້ອ 121.000 ກວ່າຄົນ ທັງໄດ້ຂ້າຊີວິດຄົນໄປແລ້ວ 4.300 ກວ່າຄົນ.
ທ່ານ ດຣ. ເທດຣອສ ອາດານອມ ເກເບຣເຍຊັສ ຜູ້ອຳນວຍການໃຫຍ່ WHO ຖະແຫລງໃນວັນທີ 11 ມີນາວ່າ: ຈຳນວນຜູ້ຕິດເຊື້ອໄວຣັສໂຄໂຣນາສາຍພັນໃໝ່ນອກປະເທດຈີນເພີ່ມຂຶ້ນວ່ອງໄວ 13 ເທົ່າພາຍໃນໄລຍະ 2 ອາທິດຜ່ານມາ.
ທ່ານກ່າວວ່າ: ຮູ້ສຶກ “ກັງວົນຫລາຍ” ຕໍ່ “ການເມີນເສີຍໃນລະດັບທີ່ໜ້າຕົກໃຈ” ທີ່ມີຕໍ່ວິກິດໃນຄັ້ງນີ້.
ເຖິງຢ່າງໃດກໍຕາມ, ຜູ້ອຳນວຍການ WHO ຊີ້ວ່າ: ການປ່ຽນແປງລະດັບເຕືອນໄພໂຣກລະບາດຄັ້ງນີ້ບໍ່ໄດ້ໝາຍຄວາມວ່າ WHO ຈະປ່ຽນແປງຄຳແນະນຳທີ່ປະເທດຕ່າງໆຄວນປະຕິບັດ ເພື່ອຮັບມືວິກິດນີ້, ພ້ອມຮຽກຮ້ອງໃຫ້ລັດຖະບານປະເທດຕ່າງໆດຳເນີນມາດຕະການ “ຮີບດ່ວນ ແລະ ແຂງແກ່ນ” ເພື່ອຮັບມືການແຜ່ລະບາດຂອງໂຣກ.
ໃນຫລາຍອາທິດຜ່ານມາ WHO ພະຍາຍາມຫລີກເວັ້ນການປະກາດໃຫ້ ການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ເປັນ “ການລະບາດໃຫຍ່” ໂດຍ ດຣ. ໄມເຄິລ ເຈ ໄຣອັນ ຜູ້ອຳນວຍການບໍລິຫານ WHO ອະທິບາຍກ່ອນໜ້ານີ້ວ່າ “ບໍ່ມີປະໂຫຍດ” ທີ່ WHO ຈະປະກາດວ່າໂຣກໂຄວິດ-19 ກຳລັງຈະເຂົ້າສູ່ສະພາບລະບາດໃຫຍ່ ຂະນະທີ່ທົ່ວໂລກກຳລັງພະຍາຍາມຄວບຄຸມການລະບາດຂອງໄວຣັສຊະນິດນີ້.
