ຫລາຍປະເທດຕາເວັນອອກກາງຕັດການພົວພັນກັບກາຕາ
ຣິຍາດ 5 ມິຖຸນາ: ຫລາຍປະເທດໃນຕາເວັນອອກກາງປະກາດຕັດການພົວພັນທາງການທູດກັບກາຕາ ໂດຍອ້າງວ່າກາຕາສະໜັບສະໜູນການກໍ່ການຮ້າຍ.
ອາຣັບບີ ຊາອຸດິດ ປະກາດຕັດການພົວພັນທາງການທູດ ແລະ ຢຸດການຕິດຕໍ່ກັບກາຕາທຸກທາງ ທັງທາງບົກ, ທາງນ້ຳ, ທາງອາກາດນັບແຕ່ວັນທີ 5 ມິຖຸນານີ້ ໂດຍໃຫ້ເຫດຜົນວ່າເພື່ອປົກປ້ອງປະເທດຈາກກະແສກໍ່ການຮ້າຍ, ພ້ອມຮຽກຮ້ອງໃຫ້ປະເທດ ແລະ ທຸລະກິດຕ່າງໆທີ່ເປັນພີ່ນ້ອງກັບອາຣັບບີ ຊາອຸດິດດຳເນີນການເຊັ່ນດຽວກັນ. ຫລ້າສຸດບາເຣນ, ເອຢິບ ແລະ ສະຫະນະຄອນ ເອເມຣັດ ອາຣັບ (UAE) ກໍປະກາດຕັດການພົວພັນທາງການທູດ ແລະ ຢຸດຊ່ອງທາງການຕິດຕໍ່ທັງໝົດກັບກາຕາແລ້ວ. ບາເຣນລະບຸວ່າ: ກາຕາແຊກແຊງກິດຈະການພາຍໃນຂອງບາເຣນ ຂໍໃຫ້ພົນລະເມືອງບາເຣນເລັ່ງເດີນທາງອອກຈາກກາຕາພາຍໃນ 14 ວັນ. ຂະນະທີ່ເອຢິບລະບຸວ່າ: ກາຕາສະໜັບສະໜູນຂະບວນການພາລາດອນພາບມຸສລິມ ເຊິ່ງຖືເປັນກຸ່ມກໍ່ການຮ້າຍຢູ່ເອຢິບ.
ກະຊວງການຕ່າງປະເທດກາຕາອອກຖະແຫລງການໃນວັນທີ 5 ມິຖຸນານີ້ວ່າ: ການປະກາດຕັດການພົວພັນທາງການທູດ ແລະ ປິດຊາຍແດນກັບກາຕາເປັນໄປຕາມຂໍ້ອ້າງທີ່ບໍ່ມີມູນຄວາມຈິງ, ເລື່ອງນີ້ເຫັນໄດ້ວ່າມີຈຸດປະສົງຈະເຮັດໃຫ້ກາຕາກາຍເປັນລັດທີ່ຕ້ອງຢູ່ພາຍໃຕ້ການຄຸ້ມຄອງ ແລະ ເປັນການລະເມີດອະທິປະໄຕຂອງກາຕາ.
ຫລ້າສຸດລັດຖະບານເຢເມນທີ່ໄດ້ຮັບການຮັບຮອງຈາກນາໆຊາດປະກາດຕັດການພົວພັນກັບກາຕາເຊັ່ນກັນ ໂດຍກ່າວຫາວ່າຮ່ວມມືກັບກຸ່ມຮູທີ ກຸ່ມກະບົດທີ່ຍຶດນະຄອນຫລວງຊານາ ແລະ ພື້ນທີ່ທາງເໜືອຂອງເຢເມນໃນປັດຈຸບັນນີ້ ໂດຍໄດ້ຮັບການສະໜັບສະໜູນຈາກອີຣານ ແລະ ກ່າວວ່າ: ລັດຖະບານເຢເມນເຫັນພ້ອມທີ່ກອງກຳລັງພັນທະມິດ ນຳໂດຍອາຣັບບີ ຊາອຸດິດ ຂັບໄລ່ກາຕາອອກຈາກກຸ່ມທີ່ເຂົ້າໄປປາບປາມກຸ່ມຮູທີມາກວ່າ 2 ປີແລ້ວ.
