ອິນໂດເນເຊຍມີຜູ້ເສຍຊີວິດຈາກໂຄວິດ-19 ຄົນທຳອິດ
“ຍິງຊາວຕ່າງປະເທດຄົນໜຶ່ງ” ເປັນຜູ້ເສຍຊີວິດຄົນທຳອິດໃນອິນໂດເນເຊຍ ພຽງບໍ່ເທົ່າວັນຫລັງມີການຢືນຢັນວ່າຕິດເຊື້ອໄວຣັສໂຄໂຣນາສາຍພັນໃໝ່.
ກະຊວງສາທາລະນະສຸກຂອງອິນໂດເນເຊຍອອກຖະແຫລງການວ່າ: ມີຜູ້ຕິດເຊື້ອໄວຣັສໂຄໂຣນາສາຍພັນໃໝ່ “ໂຄວິດ-19” ໃນປະເທດຢ່າງໜ້ອຍ 27 ຄົນ ແລະ ເສຍຊີວິດແລ້ວ 1 ຄົນ ຄື “ຜູ້ປ່ວຍຄົນທີ 25” ເປັນຜູ້ຍິງຊາວຕ່າງປະເທດ ອາຍຸ 53 ປີ.
ທັງນີ້ ລັດຖະບານອິນໂດເນເຊຍຂໍສະຫງວນຂໍ້ມູນກ່ຽວກັບສັນຊາດຂອງຜູ້ເສຍຊີວິດ, ແຕ່ຢືນຢັນວ່າໄດ້ແຈ້ງໃຫ້ຄອບຄົວຂອງຜູ້ເສຍຊີວິດຮັບຮູ້ຜ່ານສະຖານເອກອັກຄະລັດຖະທູດຂອງປະເທດນັ້ນ ແລະ ອຳນວຍຄວາມສະດວກໃນການສົ່ງສົບຜູ້ເສຍຊີວິດກັບພູມລຳເນົາ.
ເຖິງຢ່າງໃດກໍດີ, ກະຊວງສາທາລະນະສຸກຂອງອິນໂດເນເຊຍລາຍງານຜົນການກວດສອບຫລ້າສຸດຂອງ “ຜູ້ປ່ວຍຄົນທີ 6” ແລະ “ຜູ້ປ່ວຍຄົນທີ 14” ວ່າຕອນນີ້ອອກມາເປັນລົບແລ້ວ ທັງສອງຄົນມີອາການດີຂຶ້ນເປັນລຳດັບ ແລະ ຄາດວ່າຈະສາມາດອອກຈາກໂຮງໝໍໄດ້ໃນມໍ່ໆນີ້ ແຕ່ທັງສອງຕ້ອງກັກຕົວເອງຢູ່ເຮືອນ “ອີກໄລຍະໜຶ່ງ” ເພື່ອການເຝົ້າລະວັງຂັ້ນສຸດທ້າຍ.
