ທ່ານ ສີຈິນຜິງ ໄປເຂດສູນກາງລະບາດພະຍາດ ໂຄວິດ-19 ເປັນຄັ້ງທຳອິດ

ລູກເມືອງພວນ

ປະທານ ສີຈິນຜິງ ຂອງຈີນໄດ້ໄປເຖິງເມືອງ ອູຮັ່ນ ໃນຕອນເຊົ້າມື້ນີ້, ຊຶ່ງເປັນຄັ້ງທຳອິດນັບແຕ່ມີການລະບາດຂອງພະຍາດ ໂຄວິດ-19 ເກີດຂຶ້ນຢູ່ເມືອງນີ້.

ທ່ານປະທານ ສີຈິນຜິງ ໄດ້ໄປເມືອງ ອູຮັ່ນ ຊຶ່ງເປັນສູນກາງຂອງແຂວງຫູເປີ່ຍ ເພື່ອກວດກາເບິ່ງການປ້ອງກັນການແຜ່ລະບາດຂອງພະຍາດ ແລະ ທັງເປັນການໄປຢື້ຢາມຖາມຂ່າວພະນັກງານແພດໝໍທີ່ປະຕິບັດໜ້າທີ່ຢູ່ແນວໜ້າຂອງບັ້ນຮົບຕໍ່ສູ້ກັບພະຍາດ ໂຄວິດ-19, ໃຫ້ທິດຊີ້ນຳຕໍ່ກຳລັງທະຫານ, ພະນັກງານທົ່ວໄປ, ຕຳຫຼວດ ແລະ ອາສາສະໝັກ, ຜູ້ຕິດເຊື້ອ ແລະ ປະຊາຊົນ ຕາມປະເພນີຂອງຈີນ.

ນີ້ເປັນການຢ້ຽມຢາມຄັ້ງທຳອິດຂອງທ່ານ ສີຈິນຜິງ ທີ່ເມືອງ ອູຮັ່ນ ເປັນຕົ້ນກຳເນີດຂອງພະຍາດ ໂຄວິດ-19 ລະບາດແຕ່ເດືອນ ທັນ 2019 ເປັນຕົ້ນມາ. ນະຄອນ 11 ລ້ານຄົນແຫ່ງນີ້ ຖືກປິດປະຕູມາແຕ່ເດືອນ 1, ພາຍຫຼັງມີພະຍາດ ໂຄວິດ-19 ລະບາດຂຶ້ນ ຊຶ່ງເຊື່ອກັນວ່າເກີດມາຈາກຕະຫຼາດຄ້າຂາຍສັດປ່າທີ່ຜິດກົດໝາຍ ແຫ່ງໜຶ່ງ ອັນເປັນສາເຫດໃຫ້ເກີດພະຍາດດັ່ງກ່າວ.

ສຳນັກຂ່າວ ຊິນຫົວ ໄດ້ເຜີຍແຜ່ບາງຮູບພາບ ທີ່ທ່ານ ສີຈິນຜິງກຳລັງລົງຢ້ຽມຢາມໂຮງໝໍ Huoshenshan ເປັນໜຶ່ງໃນໂຮງໝໍທີ່ສ້າງຂຶ້ນຊົ່ວຄາວ ເພື່ອປີ່ນປົວຜູ້ຕິດເຊື້ອເປັນຈຳນວນຫຼວງຫຼາຍ. ທ່ານໄດ້ໂອ້ລົມກັບພະນັກງານແພດ ແລະ ພະນັກງານທົ່ວໄປຈຳນວນໜຶ່ງ, ທຸກຄົນລ້ວນແຕ່ໃສ່ໜ້າກາກອານາໄມການແພດ. ອີກຮູບພາບໜຶ່ງກໍຄື ທ່ານກຳລັງໂອ້ລົມກັບຜູ້ຕິດເຊື້ອ ທີ່ເປັນວິດີໂອ.

ການໄປຄັ້ງນີ້ ແມ່ນມີຂຶ້ນໃນຂະນະທີ່ເມືອງ ອູຮັ່ນກຳລັງມີການຄວບຄຸມການແຜ່ລະບາດຂອງພະຍາດຢ່າງເອົາເປັນເອົາຕາຍ ແລະ ເຂດອື່ນໆແຂວງ ຫູເປີ່ຍ ໂດຍບໍ່ມີການແຈ້ງໃຫ້ຮູ້ລ່ວງໜ້າ.

ຄະນະກຳມະການແພດແຫ່ງຊາດຈີນ (NHC) ອອກມາແຈ້ງວ່າມື້ນີ້ຢູ່ ອູຮັ່ນມີຜູ້ຕິດເຊື້ອພຽງ 17 ຄົນເທົ່ານັ້້ນ, ສ່ວນອີກສອງຄົນແມ່ນຢູ່ ປັກກິງ ແລະ ຢູ່ແຂວງກວາງຕຸ້ງ ຊຶ່ງເປັນຜູ້ທີ່ມາຈາກຕ່າງປະເທດ. ປັດຈຸບັນ ຢູ່ຈີນ ມີຜູ້ຕິດເຊື້ອທັງໝົດ ຫຼາຍກວ່າ 80.000 ຄົນ, ສ່ວນຫຼາຍແມ່ນຢູ່ເມືອງ ອູຮັ່ນ, ໃນນັ້ນ ເກືອບ 60.000 ໄດ້ຮັບການປິ່ນປົວຫາຍຂາດ.

ລັດຖະບານຈີນໄດ້ສົ່ງພະນັກງານແພດໝໍຫຼາຍພັນຄົນໄປອູຮັ່ນ ແລະ ທັງໄດ້ສ້າງໂຮງໝໍສະໝໍລະພູມຂຶ້ນ. ມື້ນີ້ ເມືອງອູຮັ່ນໄດ້ປິດປະຕູໂຮງໝໍສະໝໍລະພູມອີກສອງແຫ່ງ.

ການໄປຢ້ຽມຢາມຂອງທ່ານ ສີຈິນຜິງ ໃນຄັ້ງນີ້ ມັນເປັນສັນຍານເຕືອນໃຫ້ເຫັນວ່າ ການນຳຂອງຈີນມີຄວາມເຊື່ອໝັ້ນວ່າ ການຈຳກັດແບບເຄັ່ງຄັດ ລວມທັງປິດການເຄື່ອນໄຫວຂອງຜູ້ຄົນ ໄດ້ເຮັດໃຫ້ການຄວບຄຸມພະຍາດ ໂຄວິດ-19 ໄດ້ດີຂຶ້ນ. ໃນຂະນະທີ່ຜູ້ຕິດເຊື້ອໃໝ່ແມ່ນຫຼຸດລົງ. ເມືອງອູຮັ່ນຍັງເປັນບ່ອນທີ່ມີຜູ້ຕິດເຊື້ອໃໝ່ຫຼາຍກວ່າໝູ່. ພ້ອມກັນນັ້ນ, ຫຼາຍກວ່າ 70% ໃນຈຳນວນທັງໝົດ 3.136 ຄົນເສຍຊີວິດ ໃນຈີນແຜ່ນດິນໃຫ່ຍ.

ກ່ອນທີ່ຈະມີການໄປຢ້ຽມຢາມຂອງທ່ານ ສີຈິນຜິງ, ທ່ານຮອງນາຍົກລັດຖະມົນຕີ ໂຕນຊວັນລານ ໄດ້ໄປ ອູຮັ່ນ ເພື່ອສັງເກດສະພາບການການເຄື່ອນໄຫວຂອງຄະນະກຳມະການທີ່ເຮັດໜ້າທີ່ດູແລປະຊາຊົນໃນໄລຍະທີ່ປິດປະຕູເມືອງ. ໃນຂະນະທີ່ທ່ານໄປກາຍເຂດຊູມຊົນ ມີປະຊາຊົນຢູ່ຕຶກສູງຮ້ອງຄັດຄ້ານຜ່ານປະຕູປ່ອງຢ້ຽມໃສ່ທ່ານ.

ປະຊາຊົນຈຳນວນໜຶ່ງອອກມາສະແດງຄວາມບໍ່ພໍໃຈທີ່ພວກເຂົາບໍ່ໄດ້ຮັບການຊ່ວຍເຫຼືອທີ່ຈຳເປັນ, ໃນຂະນະດຽວກັນບັນດາພະນັກງານກໍໃຫ້ຮູ້ວ່າ ພວກເຂົາຖືກກົດດັນຢ່າງໜັກ. ປະຊາຊົນສ່ວນຫຼາຍແມ່ນມີຊີວິຢູ່ໄດ້ຍ້ອນການຊື້ຂາຍທາງອອນລາຍຕະຫຼອດສອງເດືອນທີ່ຜ່ານມາ. ເຖິງແມ່ນວ່າບັນດາຫ້າງຊັບພະສິນຄ້າຈະຕອບສະໜອງສິນຄ້າໃຫ້ກໍຕາມ ແຕ່ຄົນຈຳນວນໜຶ່ງບໍ່ພໍໃຈກັບລາຄາຂອງມັນ ແລະ ຄຸນນະພາບຂອງທັນຍາຫານທີ່ເຂົາເຈົ້າຈອງຊື້ນັ້ນກໍບໍ່ດີ. ທ່ານ ຮອງນາຍົກລັດຖະມົນຕີ ໄດ້ຈັດກອງປະຊຸມຖະແຫຼງຂ່າວທັນທີ ເພື່ອອະທິບາຍຄວາມຂັດຂ້ອງໝອງໃຈຂອງປະຊາຊົນ.

ໃນເດືອນ 2 ຜ່ານມາ ທ່ານ ສີຈິນຜິງ ກໍໄດ້ໄປສັງເກດການການຕ້ານ ແລະ ປ້ອງກັນ ກໍຄືການຄວບຄຸມ ໂຄວິດ-19 ຢູ່ສູນໃນຄຸ້ມ ເຈົາຢາງ ໃນນະຄອນປັກກິ່ງ, ນັ້ນຄື ການປະກົດຕົວຄັ້ງທຳອິດຂອງທ່ານ ສີຈິນຜິງ ນັບຕັ້ງແຕ່ພະຍາດ ໂຄວິດ-19 ລະບາດຂຶ້ນ. ການທີ່ທ່ານຫາຍໜ້າຫາຍຕາໄປຈາກສື່ມວນຊົນໃນໄລຍະນີ້ ໄດ້ເຮັດໃຫ້ຫຼາຍຄົນເກີດຄວາຮູ້ສຶກປະຫຼາດໃຈ ເພາະຜູ້ນຳປະເທດຊາດ ຕ້ອງເປັນຜູ້ຢືນຢູ່ແຖວໜ້າ ໃນເມື່ອມີວິກິດການ./.