WHO ເຕືອນ “ໂຄໂຣນາ” ອາດຈະລະບາດໄປທົ່ວໂລກ
WHO ເຕືອນ ໄວຣັສໂຄໂຣນາ ກຳລັງມີຄວາມສ່ຽງຈະເຂົ້າສູ່ສະພາບແຜ່ລະບາດໄປທົ່ວໂລກ ຫລັງມີການລຸກລາມໄປຫລາຍປະເທດໃນອາຊີ, ເອີຣົບ, ຕາເວັນອອກກາງ ແລະ ອາເມລິກາ.
ທ່ານ ທີໂດຣສ ອັດຮານອມ ກີບຣີເຍຊຸສ ຜູ້ອຳນວຍການອົງການອະນາໄມໂລກ ຫລື WHO ກ່າວວ່າ: ໄວຣັສໂຄໂຣນາສາຍພັນໃໝ່ ຫລື ໂຄວິດ-19 ໄດ້ແຜ່ກະຈາຍໄປຫລາຍປະເທດ ເຮັດໃຫ້ຄວາມສ່ຽງໃນການແຜ່ລະບາດໄປທົ່ວໂລກມີຄວາມເປັນຈິງຫລາຍຂຶ້ນ.
ຜູ້ອຳນວຍການບໍລິຫານໂຄງການສຸກເສີນຂອງ WHO ກ່າວວ່າ: ເມື່ອໄວຣັສມີການລະບາດໄປຫລາຍກ່ວາ 100 ປະເທດ ແລະ ມີຜູ້ຕິດເຊື້ອຫລາຍກ່ວາ 100.000 ຄົນ,ຊຶ່ງມັນ ເຖິງເວລາແລ້ວທີ່ຕ້ອງກັບມາທົບທວນການຕັດສິນໃຈ ຫລັງຈາກກ່ອນໜ້ານີ້ພຽງ 2 ອາທິດ ໄວຣັສມີການແຜ່ລະບາດພຽງ 30 ປະເທດ.
ຜ່ານມາ ເຈົ້າໜ້າທີ່ຂອງ WHO ຫລີກເວັ້ນຈະປະກາດວ່າ: ໄວຣັສໂຄວິດ-19 ໄດ້ເຂົ້າສູ່ສະພາບແຜ່ລະບາດໄປທົ່ວໂລກ ເຖິງວ່າມີການສົ່ງສັນຍານວ່າພວກເຂົາໃກ້ຈະປະກາດສະພາບດັ່ງກ່າວ.
ໃນທ້າຍເດືອນກຸມພາຜ່ານມາ, ຜູ້ອຳນວຍການ WHO ໄດ້ປະກາດຍົກລະດັບການເຕືອນໄພຂອງໄວຣັສໂຄໂຣນາເປັນລະດັບທີ່ “ສູງຫລາຍ” ຕໍ່ການແຜ່ລະບາດ ແລະ ສ່ຽງການຕິດເຊື້ອໄປທົ່ວໂລກ ເນື່ອງຈາກຫລາຍປະເທດໃນປັດຈຸບັນກຳລັງປະເຊີນກັບບັນຫາໃນການກຳຈັດການລະບາດຂອງເຊື້ອໄວຣັສດັ່ງກ່າວ.
ເຖິງຢ່າງໃດກໍຕາມ, ການປະກາດເພື່ອຍົກລະດັບໃນຄັ້ງນີ້ເປັນການເຕືອນໄພໃນລະດັບສູງສຸດເທົ່າທີ່ອົງການອະນາໄມໂລກຈະສາມາດເຮັດໄດ້, ແຕ່ການປະກາດເຕືອນໃນຄັ້ງນີ້ ບໍ່ແມ່ນການປະກາດວ່າເຊື້ອໄວຣັສໂຄໂຣນາ ເກີດການລະບາດໃຫຍ່ທົ່ວໂລ (pandemic) ເພາະປັດຈຸບັນບໍ່ແມ່ນວ່າທຸກຄົນທົ່ວໂລກຈະຕ້ອງຕິດເຊື້ອໄວຣັສດັ່ງກ່າວ.
