ອິຕາລີ ສັ່ງປິດປະເທດໜີ ໂຄໂຣນາ
ວັນທີ 10 ມີນານີ້ ທ່ານ ຈູເຊັບເປ້ ກ໊ອງເຕ້ ນາຍົກລັດຖະມົນຕີອິຕາລີ ປະກາດຂະຫຍາຍມາດຕະການຮັບມືການລະບາດຂອງເຊື້ອໄວຣັສໂຄໂຣນາສາຍພັນໃໝ່ ຫລື ໂຄວິດ-19 ໂດຍການສັ່ງປິດທົ່ວທຸກພື້ນທີ່ຂອງປະເທດ ເຊິ່ງມີປະຊາກອນຫລາຍກວ່າ 60 ລ້ານຄົນ ຈົນເຖິງວັນທີ 3 ເມສາ ພ້ອມທັງຂໍໃຫ້ປະຊາຊົນຢູ່ແຕ່ໃນເຮືອນ.
ນອກຈາກນີ້, ທາງການອິຕາລີ ຍັງສັ່ງຫ້າມລວມກຸ່ມໃນສະຖານທີ່ສາທາລະນະ ບໍ່ວ່າຈະມີຜູ້ເຂົ້າຮ່ວມຈຳນວນເທົ່າໃດ, ຫ້າມແຂ່ງຂັນກິລາ, ຫ້າມຈັດງານດ້ານສິລະປະວັດທະນະທຳ ແລະ ພິທີການທາງສາສະໜາທຸກປະເພດ. ພ້ອມສັ່ງປິດສະຖານບັນເທີງ ແລະ ສະຖານທີ່ຈັດງານທຸກປະເພດ ບໍ່ວ່າຈະເປັນໂຮງຮູບເງົາ, ພິພິຕະພັນ, ໂຮງລະຄອນ, ສະລອຍນ້ຳ ແລະ ສູນອອກກຳລັງກາຍ. ສ່ວນຮ້ານອາຫານ ແລະ ບາ ໃຫ້ເປີດບໍລິການໄດ້ລະຫວ່າງເວລາ 6:00 ໂມງຫາ 18:00 ໂມງ ຂອງແຕ່ລະວັນຕາມເວລາທ້ອງຖິ່ນ.
