ເຢຍລະມັນ ຊ່ວຍເຫຼືອລາວ 6,8 ລ້ານເອີໂຣ ສົ່ງເສີມການເຂົ້າເຖຶງແຫຼ່ງທຶນຂອງຜູ້ທຸກຍາກ
ໂຄງການດັ່ງກ່າວ ເປັນການສະໜັບສະໜູນຂະແໜງການເງິນສຳລັບການດໍາເນີນທຸລະກິດການຄ້າຢູ່ ສປປ ລາວ ແລະ ການບໍລິການດ້ານການເງິນໃຫ້ມີຄວາມຍືນຍົງ, ໂດຍສະເພາະ ກຸ່ມທຸລະກິດຈຸລະພາກ, ຂະໜາດນ້ອຍ ເເລະ ກາງໃນເຂດຊົນນະບົດ ,ປະກອບສ່ວນເຂົ້າໃນການປັບປຸງສະມັດຕະພາບການຜະລິດ ແລະ ຄວາມສາມາດການແຂ່ງຂັນຂອງພາກເອກະຊົນ ແລະ ຊ່ວຍສ້າງວຽກເຮັດງານທຳ ແລະ ຫຼຸດຜ່ອນຄວາມທຸກຍາກຂອງປະຊົາຊົນໃນເຂດຊົນນະບົດໃຫ້ມີປະສິດທິຜົນ.
ໂຄງການຊ່ວຍເຫລືອດັ່ງກ່າວ( LAFF )ແມ່ນທະນາຄານແຫ່ງສປປລາວ( ທຫລ) ຈະເປັນຜູ້ເຮັດໜ້າທີ່ເປັນໜ່ວຍງານຈັດຕັ້ງປະຕິບັດດ້ວຍການໃຫ້ທຶນຊ່ວຍເຫຼືອເພີ່ມ ຈໍານວນ 6,8 ລ້ານເອີໂຣ ສຳລັບສະຖາບັນການເງິນ ທີ່ເປັນຄູ່ຮ່ວມງານ ,ທະນາຄານ, ການເງີນຈຸລະພາກ ເເລະ ກອງທຶນ ສາມາດຈັດສັນສິນເຊື່ອໃນວົງເງິນກູ້ໄດ້ສູງເຖິງ 500 ລ້ານກີບຕໍ່ລູກຄ້າ ສໍາລັບເຂດຊົນນະບົດຂອງລາວ ເເລະ ທຶນຊ່ວຍເຫຼືອອີກ 8 ເເສນເອີໂຣ ເເມ່ນບ້ວງສົ່ງເສີມຂີດຄວາມສາມາດໃຫ້ເເກ່ທະນາຄານກາງ ເເລະ ບັນດາສະຖາບັນການເງິນ ທີ່ເປັນຄູ່ຮ່ວມງານ.
ຮອງຜູ້ວ່າວ່າການ ທຫລ ໃຫ້ຮູ້ວ່າ: ສຳລັບວິສາຫະກິດຂະໜາດນ້ອຍ ແລະ ກາງ (SME) ໃນເຂດຊົນນະບົດຂອງປະເທດ ຍັງມີຄວາມຕ້ອງການຫຼາຍໃນການເຂົ້າເຖິງສິນເຊື່ອເງິນກູ້ຂະໜາດນ້ອຍ, ຊຶ່ງການຊ່ວຍເຫລືອນີ້ີ້ຈະເປັນໂອກາດທີ່ດີສຳລັບການເຂົ້າເຖິງແຫຼ່ງທຶນຂອງບັນດາຫົວໜ່ວຍທຸລະກິດດັ່ງກ່າວ, ພ້ອມຈະເປັນການປະກອບສ່ວນເຂົ້າໃນການສ້າງຄວາມເຂັ້ມແຂງໃຫ້ແກ່ສະຖາບັນການເງິນຄູ່ຮ່ວມງານຂອງກອງທຶນທີ່ມີຄວາມຈຳເປັນໃນການພັດທະນາລະບົບການເງິນ.
ທ່ານເອກອັກຄະລັດຖະທູດ ສ.ເຢຍລະມັນ ໄດ້ກ່າວວ່າ: ກອງທຶນ LAFF ຈະຊ່ວຽແກ້ໄຂຊ່ອງຫວ່າງການເຂົ້າເຖິງແຫລ່ງທຶນໃນເຂດຊົນນະບົດ ,ຊ່ວຍໃຫ້ຜູ້ປະກອບການໃນທ້ອງຖິ່ນ ສາມາດເຂົ້າເຖິງການບໍລິການດ້ານການເງິນຜ່ານລະບົບທະນາ ຄານ ແລະ ສະຖາບັນການເງິນຈຸລະພາກໄດ້ສະດວກຂຶ້ນ.
