ລ້ຽງລູກຜິດຄົນ
ເສົາໄຊນຳມໍນິງ, ໄດ້ໂພດເລື່ອງລາວສູດດາມ່າຂອງຄອບຄົວຊາວຈີນຄອບຄົວໜຶ່ງ ທີ່ສະທ້ອນເຖິງຄວາມຫຼົ້ມເຫຼວ ຫຼື ຄວາມບົກຜ່ອງຂອງສານຍຸຕິທຳຂອງຈີນ, ໄດ້ເຮັດໃຫ້ແມ່ຊາວຈີນຄົນໜຶ່ງຕ້ອງໄດ້ຮັບເດັກຊຶ່ງບໍ່ແມ່ນລູກຂອງຕົນເອງມາລ້ຽງດົນກວ່າ 23 ປີຈຶ່ງຮູ້ຄວາມຈິງ. ມາເຖິງປີ 2018 ຜູ້ທີ່ລັກເອົາລູກຂອງລາວໄປນັ້ນໄດ້ອອກມາບອກຄວາມຈິງ ແລະ ສົ່ງລູກຊາຍຄືນໃຫ້.
ນາງ ຈູສຽວຈວນ ອາຍຸ 58 ປີ ໄດ້ຢື່ນຟ້ອງຕໍ່ສານສູງເພື່ອໃຫ້ເອົາຜິດກັບສານເມືອງສົງຊິ່ງຫຍູຈົງ ພ້ອມທັງຮຽກຮ້ອງຄ່າເສຍຫາຍທາງຈິດໃຈ ແລະ ຄ່າລ້ຽງດູລູກເປັນເວລາ 23 ປີ, ຈຳນວນເງິນ 2,950,000 ຢວນ
ຄະດີນີ້ເກີດຂຶ້ນເມື່ອປີ 1992 ທີ່ເມືອງສົງຊິ່ງ ຢູ່ທາງພາກຕາເວັນຕົກສ່ຽງໃຕ້ຂອງຈີນ. ລູກຊາຍຂອງນາງ ຈູ ອາຍຸ 1 ປີຫາຍຕົວໄປຢ່າງບໍ່ຮູ້ຮ່ອງຮອຍ. ຜູ້ເປັນແມ່ໄດ້ຊອກນຳຫາລູກຕົນເອງເປັນເວລາ 3 ປີ ຈຶ່ງພົບເຫັນເດັກຄົນໜຶ່ງທີ່ຄ້າຍຄືກັບລູກຂອງຕົນເອງ ທີ່ພວກເຈົ້າໜ້າທີ່ຕຳຫຼວດໄດ້ຊ່ວຍອອກມາໄດ້ຈາກພວກກຸ່ມແກ້ງຄ້າມະນຸດ ເພື່ອສົ່ງໃຫ້ສານເມືອງ ສົງຊິງ ຊ່ວຍພິສູດຄວາມຈິງ.
ປີ 1995, ສານມົນທົນຫູໜານ ໄດ້ສັ່ງໃຫ້ກວດເບິ່ງ ດີເອັນເອ. ຜົນການກວດທີ່ໄດ້ມາ ເດັກມີສິລິລະວິທະຍາຄ້າຍກັບນາງຈູ ແລະ ຜົວຂອງລາວ. ທັງສອງຈຶ່ງເຊື່ອວ່າແມ່ນລູກຂອງຕົນເອງແທ້ ຈຶ່ງໄດ້ຮັບເອົາມາລ້ຽງເປັນເວລາ 23 ປີ.
ເດືອນມັງກອນ ປີ 2018 ນາງ ເຫີສຽວຜິງອາຍຸ ອາຍຸ 48 ປີ ອະດີດແມ່ບ້ານຂອງນາງ ຈູ ໄດ້ອອກມາເປີດເຜີຍເລື່ອງລາວຄວາມຈິງວ່າ: ຕົນເອງເປັນຜູ້ລັກເອົາລູກຂອງນາງຈູໄປລ້ຽງເອງ ເມື່ອສຳນຶກຜິດຈຶ່ງອອກມາເປີດເຜີຍ ແລະ ຍອມຮັບຄວາມຈິງທັງສົ່ງລູກຄືນໃຫ້ນາງຈູ. ນາງຈູໄດ້ຮ້ອງຟ້ອງຕໍ່ສານເພື່ອຂໍຄ່າເສຍຫາຍທາງດ້ານຈິດໃຈ ແລະ ເງິນຄ່າລ້ຽງດູລູກຕະຫຼອດ 23 ປີຜ່ານມາ. ເມື່ອເກີດເລື່ອງແບບນີ້ຂຶ້ນມາຈຶ່ງຮູ້ສຶກຊໍ້າໃຈ ແລະ ເສຍໃຈເປັນຢ່າງຍິ່ງ ແລະ ລູກຊາຍທີ່ຕົນເອງລ້ຽງມາ 23 ປີນັ້ນກໍພາດໂອກາດບໍ່ໄດ້ຢູ່ກັບພໍ່ແມ່ຂອງຕົນເອງແທ້ໆ ອັນເນື່ອງມາຈາກຄວາມຜິດພາດຂອງສານນັ້ນເອງ.
ດ້ານສານມົນທົນ ຫູໜານ ໄດ້ອອກມາຖະແຫຼງຍອມຮັບຄວາມຜິດພາດອັນເນື່ອງມາຈາກເຄື່ອງເທັກໂນໂລຢີບໍ່ທັນທັນສະໄໝເທົ່າທີ່ຄວນ ແລະ ຢືນຢັນວ່າ ສານບໍ່ໄດ້ລ່ວງລະເມີດຂໍ້ກົດໝາຍໃດໆ ທັງອອກຮຽກຮ້ອງໃຫ້ຄ່າເສຍຫາຍໃຫ້ແກ່ນາງຈູເປັນເງິນ 5 ລ້ານຢວນ ຊຶ່ງບໍ່ໄດ້ຕາມທີ່ນາງຈູຮຽກຮ້ອງ, ຈຶ່ງຕົກລົງກັນບໍ່ໄດ້, ຄະດີຈຶ່ງເປັນອັນບໍ່ທັນສິ້ນສຸດເທື່ອ.
