ຂ້ອຍພະຍາຍາມລືມເລື່ອງຜົວນອກໃຈ

ຂ້ອຍອາຍຸ 32 ປີ, ເປັນຄົນມັກມ່ວນ ຈຶ່ງເບິ່ງຄືວ່າໜຸ່ມກ່ອນອາຍຸ, ຂ້ອຍເຮັດວຽກໃຫ້ບໍລິສັດຮ່ວມມືກັບຕ່າງປະເທດແຫ່ງໜຶ່ງ, ເງິນເດືອນກໍພໍຢູ່ພໍກິນ. ຜົວຂອງຂ້ອຍອາຍຸ 35 ປີ, ເປັນຫົວໜ້າຄົວໃນໂຮງແຮມທີ່ມີຊື່ສຽງແຫ່ງໜຶ່ງ.
ພວກຂ້ອຍໄດ້ລູກນຳກັນ 2 ຄົນ, ຍິງໜຶ່ງ ຊາຍໜຶ່ງ. ຢູ່ມາມື້ໜຶ່ງຂ້ອຍຮູ້ຂ່າວວ່າຜົວມີການພົວພັນຊູ້ສາວກັບນັກສຶກສາສາວຄົນໜຶ່ງທີ່ມາຝຶກຫັດຢູ່ໃນໂຮງແຮມ. ເມື່ອເສຍລັບຜົວກໍເຮັດທຳທ່າໂທລະສັບໄປຫາສາວນັກສຶກສາຄົນນັ້ນຢູ່ຕໍ່ໜ້າຂ້ອຍເລີຍ ແລະ ເວົ້າກັບສາວນັກສຶກສາຄົນນັ້ນວ່າ: ແຕ່ນີ້ຕໍ່ໄປຢ່າພົວພັນກັບຂ້ອຍອີກ ແລະ ກໍບໍ່ຕ້ອງຮັບໂທລະສັບ ແລະ ຂໍ້ຄວາມຂອງອ້າຍອີກ. ຜົວໄດ້ອ້ອນວອນໃຫ້ຂ້ອຍອະໂຫສິກຳໃຫ້ ເພາະຫາກໍເລີ່ມຕົ້ນມີີພົວພັນກັບສາວຄົນນັ້ນ ດ້ວຍພຽງທາງໂທລະສັບ ແລະ ສົ່ງຂໍ້ຄວາມຫາກັນເທົ່ານັ້ນ ຍັງບໍ່ທັນໄດ້ລ່ວງເສັ້ນຊາຍແດນແຕ່ຢ່າງໃດ.
ຜ່ານການສຶກສາອົບຮົມຂອງຄອບຄົວທັງສອງຝ່າຍ ຂ້ອຍເຫັນດີອະໂຫສິກຳໃຫ້ຜົວ ເພື່ອໃຫ້ເຂົາມີເວລາປັບຕົວເອງ. ຂ້ອຍຮຽກຮ້ອງໃຫ້ຜົວ ຫຼື ສາວນັກສຶກສາຄົນນັ້ນ, ຄົນໃດຄົນໜຶ່ງຕ້ອງພັກວຽກ. ຜົວຮັບປາກວ່າເຂົາຈະລາອອກຈາກວຽກ ສ່ວນສາວນັກສຶກສາຄົນນັ້ນ ເຂົາບໍ່ໄດ້ມີຄວາມຜິດຫຍັງທີ່ຈະຕ້ອງໃຫ້ເຂົາອອກຈາກໂຮງແຮມ ເພາະເຂົາຍັງຝຶກຫັດຢູ່. ຫົວໜ້າໂຮງແຮມໄດ້ເຫັນດີໃຫ້ຜົວພັກວຽກໄລຍະໜຶ່ງເພື່ອໃຫ້ເຂົາໄດ້ມີເວລາປ່ຽນແປງຕົວເອງ ແລະ ເພື່ອນໆຂອງຜົວກໍໃຫ້ກຳລັງໃຈຕໍ່ຂ້ອຍວ່າ: ຄວນໃຫ້ລາວກັບຄືນໄປເຮັດວຽກອີກ ເພາະເງິນເດືອນກໍສູງ ແລະ ລາວເຮັດວຽກກໍດີ, ຂ້ອຍຈຶ່ງເຫັນດີ ບໍ່ໃຫ້ຜົວພັກວຽກອີກ. ຂ້ອຍພະຍາຍາມເຮັດທຸກສິ່ງທຸກຢ່າງເພື່ອໃຫ້ສະພາບກັບຄືນສູ່ປົກກະຕິ ບໍ່ຢາກໃຫ້ບັນຍາກາດໃນຄອບຄົວມີຄວາມເຄັ່ງຕຶງ ແຕ່ຂ້ອຍກໍຍັງລືມເລື່ອງລາວນີ້ບໍ່ລົງ. ແຕ່ລະມື້ຂ້ອຍມີຄວາມທຸກໃຈຫຼາຍ
ນັບແຕ່ມື້ເກີດເລື່ອງຂຶ້ນມາ ຂ້ອຍນອນບໍ່ໄດ້ກິນບໍ່ແຊບ, ໃນສະໝອງຂອງຂ້ອຍຍາມໃດກໍປາກົດເຫັນພາບຜົວກັບສາວຄົນນັ້ນຢູ່ຕະຫຼອດເວລາ. ຂ້ອຍບໍ່ສາມາດທີ່ຈະມີຈິດໃຈເບີກບານມ່ວນຊື່ນໄດ້ເວລາຢູ່ໃນຄອບຄົວ. ເຫັນຜົວຍາມໃດກໍອຸກອັ່ງຕັນໃຈເຂົ້າຍາມນັ້ນ ແລະ ຢາກຖາມເຂົາວ່າ ເປັນຫຍັງຈຶ່ງນອກໃຈຂ້ອຍໄດ,້ ຂ້ອຍມີຄວາມຜິດຫຍັງ? ເມື່ອເປັນເຊັ່ນນີ້ ບໍ່ຮູ້ວ່າຂ້ອຍຄວນເຮັດແນວໃດຕໍ່ໄປ?