ອັງກິດຢືນຢັນພົບຜູ້ເສຍຊີວິດຈາກ ໂຄວິດ-19 ຄົນທຳອິດໃນປະເທດ
March 6, 2020 - 10:43 AM
ລັດຖະບານອັງກິດອອກຖະແຫລງການຢືນຢັນວ່າ: ພົບຜູ້ເສຍຊີວິດຈາກການຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຄົນທຳອິດໃນອັງກິດ. ຂະນະທີ່ຈຳນວນຜູ້ຕິດເຊື້ອພາຍໃນປະເທດເພີ່ມຂຶ້ນເປັນ 115 ຄົນ.
ຖະແຫລງການລະບຸວ່າ: ຜູ້ເສຍຊີວິດເປັນຜູ້ປ່ວຍອາຍຸສູງທີ່ໄດ້ເຂົ້າຮັບການປິ່ນປົວຢູ່ໂຮງໝໍຣໍຢັລ ເບິກເຊຍ ໃນເມືອງຣີດດິ້ງ.
ທ່ານ ຄຣິສ ວິດຕີ້ ຫົວໜ້າທີ່ປຶກສາດ້ານການແພດເປີດເຜີຍຕໍ່ລັດຖະສະພາອັງກິດໃນວັນທີ 5 ມີນາວ່າ: ຜູ້ຕິດເຊື້ອໂຄວິດ-19 ຈຳນວນເຄິ່ງໜຶ່ງຈາກທັງໝົດນັ້ນ ອາດຕິດເຊື້ອພາຍໃນໄລຍະເວລາ 3 ອາທິດ ເຊິ່ງສ້າງແຮງກົດດັນຫລາຍຕໍ່ໜ່ວຍງານບໍລິການດ້ານສາທາລະນະສຸກແຫ່ງຊາດຂອງອັງກິດ.
