ໂຄວິດ-19 ອາດເຮັດໃຫ້ສາຍການບິນທົ່ວໂລກ ເສຍຫາຍ 113.000 ລ້ານໂດລາ

      ສະມາຄົມ​ຂົນ​ສົ່ງ​ທາງ​ອາກາດ​ສາກົນ ຫລື ​ໄອ​ອາ​ຕ້າ ​ເປີດ​ເຜີຍ​ວ່າ: ພະຍາດ​ຕິດ​ເຊື້ອ​ໄວ​ຣັສ​ໂຄ​ໂຣນາ 2019 ຫລື ​ໂຄ​ວິດ-19 ອາດ​ເຮັດ​ໃຫ້​ສາຍ​ການບິນ​ທົ່ວ​ໂລກ​ເສຍ​ຫາຍ​ນັບ​ແຕ່ 63.000-113.000 ລ້ານ​ໂດ​ລາ​ສະຫະລັດ ຂຶ້ນກັບ​ວ່າ​ເຊື້ອຈະ​ແຜ່​ໃນ​ວົງ​ກວ້າງ​ຊໍ່າ​ໃດ.

     ທ່ານ ​ໄບຣອັນ ​ເພຍ ນັກ​ເສດຖະສາດ​ຂອງ​ໄອ​ອາ​ຕ້າ ຖະ​ແຫລ​ງຂ່າວ​ຢູ່​ສິງກະ​ໂປ ​ໃນ​ວັນ​ທີ 5 ມີນາ​ວ່າ: ຄັ້ງສຸດ​ທ້າຍ​ທີ່​ອຸດສາຫະກຳ​ສາຍ​ການບິນ​ໄດ້​ຮັບ​ຜົນ​ກະທົບ​ຮຸນ​ແຮງ​ຂະໜາດ​ນີ້ ຄື​ໄລຍະ​ວິ​ກິດ​ການ​ເງິນ​ໂລກ​ປີ 2009 ຕົວ​ເລກ​ຄວາມ​ເສຍ​ຫາຍ 63.000 ລ້ານ​ໂດ​ລາ​ສະຫະລັດ ​ເປັນສົມ​ມຸດ​ວ່າ: ​ພະຍາດ​ຖືກ​ຈຳກັດ​ຢູ່​ໃນ​ປະ​ເທດ​ທີ່​ມີ​ຜູ້​ປ່ວຍ​ຄິດ​ໄລ່​ເຖິງ​ວັນ​ທີ 2 ມີນາ ​ແລະ ມີ​ການ​ຟື້ນຕົວຢ່າງ​ວ່ອງ​ໄວ​ໃນ​ຮູບ​ໂຕ V, ສ່ວນ​ຕົວ​ເລກ​ຄວາມ​ເສຍ​ຫາຍ 113.000 ລ້ານ​ໂດ​ລາ​ສະຫະລັດ ​ເປັນສົມ​ມຸດ​ວ່າ​ພະຍາດ​ລະບາດ​ໃນ​ວົງ​ກວ້າງ ຫລື ​ເທົ່າ​ກັບ​ລາຍ​ໄດ້​ຈາກ​ຜູ້​ໂດຍສານ​ທົ່ວ​ໂລກ​ຫລຸດ​ລົງ 11-19%.

     ກ່ອນ​ໜ້າ​ນີ້ ​ໄອ​ອາ​ຕ້າ ປະ​ເມີນ​ໃນ​ວັນ​ທີ 20 ກຸມພາ​ວ່າ: ​ໂຣກ​ໂຄ​ວິດ-19 ລະບາດ​ອາດ​ເຮັດ​ໃຫ້​ສາຍ​ການບິນ​ສູນ​ເສຍ​ລາຍ​ໄດ້ 29.300 ລ້ານ​ໂດ​ລາ​ສະຫະລັດ ຖ້າ​ການລະບາດ​ຈຳກັດ​ຢູ່​ໃນ​ຕະຫລາດ​ທີ່​ກ່ຽວຂ້ອງ​ກັບ​ຈີນ​ເທົ່າ​ນັ້ນ.