ເປີດກອງປະຊຸມສະໄໝສາມັນ ສະພາປະຊາຊົນ ແຂວງວຽງຈັນ ພິຈາລະນາຫລາຍບັນຫາສຳຄັນຂອງແຂວງ.

ແຫລ່ງຂ່າວຈາກແຂວງ ວຽງຈັນ ລາຍງານວ່າ: ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງວຽງຈັນ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 4 ມີນາ 2020 ນີ້, ຢູ່ທີ່ສະໂມສອນໃຫຍ່ຂອງແຂວງ.

ໂດຍການເຂົ້າຮ່ວມຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ມີບັນດາຜູ້ນຳພັກ-ລັດ, ອາດີດການນຳ, ບັນດາສະມາຊິກສະພາແຫ່ງຊາດ, ສະພາປະຊາຊົນແຂວງ ແລະ ນັກທຸລະກິດ ເຂົ້າຮ່ວມຢ່າງພ້ອມພຽງ.

     ທ່ານ ບຸນເພັງ ສາຍນໍລະດີ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ, ທັງເປັນປະທານກອງປະຊຸມຄັ້ງນີ້ ໄດ້ກ່າວໄຂກອງປະຊຸມວ່າ : ກອງປະຊຸມຄັ້ງນີ້ ຈະໄດ້ສຸມໃສ່ພິຈາລະນາ, ຮັບຮອງ ແລະ ຕົກລົງບັນດາບັນຫາສຳຄັນພຶ້ນຖານຂອງແຂວງຫຼາຍດ້ານເປັນຕົ້ນແມ່ນ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ປະຈຳປີ 2019 ແລະ ທິດທາງແຜນການປີ 2020 ຂອງແຂວງ, ຮັບຟັງກາຍລາຍງານຂອງພະແນກສຶກສາທິການ ແລະ ກິລາ ແຂວງ ກ່ຽວກັບການພັດທະນາຊັບພະຍາກອນມະນຸດ ທີ່ຕິດພັນກັບການພັດທະນາເສດຖະກິດ-ສັງຄົມ ໃນແຕ່ລະໄລຍະ ໂດຍສະເພາະການສ້າງຊັບພະຍາກອນມະນຸດ ໃຫ້ໄປຕາມຂະແໜງການບູລິມະສິດເປັນຕົ້ນ ວິຊາການສະເພາະໃນສາຂາວິຊາກະສິກຳ, ຄູ ແລະ ພະຍາບານ ເພຶ່ອຕອບສະໜອງໃຫ້ແກ່ການພັດທະນາປະເທດຊາດ ແລະ ແກ້ໄຂຄວາມທຸກຍາກ,ຮັບຟັງການລາຍງານຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ກ່ຽກັບການພັດທະນາ ແລະ ຄຸ້ມຄອງວຽກງານທ່ອງທ່ຽວ ທີ່ຕິດພັນກັບການຮັກສາສິ່ງແວດລ້ອມ ແລະ ການສ້າງລາຍໄດ້ໃຫ້ປະຊາຊົນ,ການຈັດຕັ້ງປະເມີນຜົນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ,ຈະໄດ້ພິຈາລະນາ, ຮັບຮອງເອົາບົດລາຍງານຂອງອົງການກວດສອບປະຈຳພາກກາງ ກ່ຽວກັບການຈັດຕັ້ງປະຕິບັດ ການເຄື່ອນໄຫວວຽກງານປະຈຳປີ 2019, ທິດທາງແຜນການເຄື່ອນ ໄຫວວຽກງານ ປະຈຳປີ 2020,ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດປີ 2018 ຂອງແຂວງ ແລະ ຮັບຟັງການລາຍງານຂອງພະແນກກວດກາລັດ ກ່ຽວກັບການຈັດຕັ້ງປະຕິບັດການກວດກາຕິດຕາມ ຜົນຂອງການກວດສອບໃນປີຜ່ານມາ ຢູ່ແຂວງວຽງຈັນ, ພິຈາລະນາ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈຳປີ 2019 ແລະ ທິດທາງແຜນການປີ 2020 ຂອງອົງການໄອຍາການປະຊາຊົນແຂວງ, ສານປະຊາຊົນແຂວງ ແລະ ພິຈາລະນາຮັບຮອງເອົາບົດລາຍງານການເຄື່ອນໄຫວວຽກງານ ປະຈຳປີ 2019 ແລະ ທິດທາງແຜນການປີ 2020 ຂອງສະພາປະຊາຊົນແຂວງວຽງຈັນ ຊຸດທີ I.