ລາວ-ຍີ່ປຸ່ນ ປຶກສາຫາລືການເມືອງ-ຄວາມໝັ້ນຄົງ ຄັ້ງທີ 3
ກອງປະຊຸມປຶກສາຫາລືການເມືອງ-ຄວາມໝັ້ນຄົງ ລາວ ແລະ ຍີ່ປຸ່ນ ຄັ້ງທີ 3 ລະດັບຫົວໜ້າກົມ-ຮອງຫົວໜ້າກົມ ລະຫວ່າງ ກະຊວງການຕ່າງປະເທດ ແລະ ກະຊວງປ້ອງກັນປະເທດ ສປປ ລາວ ແລະ ຍີ່ປຸ່ນ ໄດ້ຈັດຂຶ້ນໃນວັນທີ 4 ມີນານີ້ ທີ່ນະຄອນຫລວງວຽງຈັນ ລະຫວ່າງທ່ານ ບຸນທະນົງສັກ ຈັນທະລາດ ຮັກສາການຫົວໜ້າກົມອາຊີ-ປາຊີຟິກ ແລະ ອາຟຣິກາ ກະຊວງການຕ່າງປະເທດລາວ ແລະ ທ່ານ ISHIKAWA Hiroshi ຫົວໜ້າກົມອາຊີຕາເວັນອອກສຽງໃຕ້ ແລະ ຕາເວັນຕົກສຽງໃຕ້ ກະຊວງການຕ່າງປະ ເທດແຫ່ງຍີ່ປຸ່ນ.
ກອງປະຊຸມໄດ້ປຶກສາຫາລືເພື່ອສະໜັບສະໜູນເຊິ່ງກັນ ແລະ ກັນໃນການຈັດບັນດາກິດຈະກໍາສະເຫຼີມສະຫຼອງວັນການທູດ ລາວ-ຍີ່ປຸ່ນ ຄົບຮອບ 65 ປີ ແລະ 5 ປີ ການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ໃຫ້ປະສົບຜົນສໍາເລັດຕາມຄາດໝາຍ; ຊຸກຍູ້ໃຫ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນຂອງການນໍາຂັ້ນສູງ; ສືບຕໍ່ພິຈາລະນາ ແລະ ຊຸກຍູ້ການເປີດຖ້ຽວບິນໂດຍກົງ ວຽງຈັນ-ຄຸມາໂມໂຕະ. ພ້ອມນັ້ນ, ຍັງໄດ້ປຶກສາຫາລືເພື່ອສືບຕໍ່ຮ່ວມມືກັນຢ່າງສະໜິດແໜ້ນໃນການຈັດຕັ້ງປະຕິບັດ ແລະ ຜັນຂະຫຍາຍບັນດາເອກະສານ ແລະ ຜົນການຕົກລົງຂອງການນໍາລາວ ແລະ ຍີ່ປຸ່ນ ໃຫ້ໄດ້ຮັບໝາກຜົນຕາມຄາດໝາຍ ເປັນຕົ້ນບົດບັນທຶກຄວາມເຂົ້າໃຈລະຫວ່າງ ກະຊວງປ້ອງກັນປະເທດ ລາວ-ຍີ່ປຸ່ນ ທີ່ໄດ້ຮັບການລົງນາມໃນເດືອນຕຸລາ 2019 ຜ່ານມາ ທີ່ໂຕກຽວ ແລະ ອື່ນໆ; ຕີລາຄາຄືນການຮ່ວມມືດ້ານຄວາມໝັ້ນຄົງໃນໄລຍະ 3 ປີ ຜ່ານມາ ເປັນຕົ້ນແມ່ນການຊ່ວຍເຫຼືອຂອງຍີ່ປຸ່ນໃນດ້ານມະນຸດສະທໍາ ແລະ ການບັນເທົາທຸກໄພພິບັດ, ການເກັບກູ້ລະເບີດບໍ່ທັນແຕກ, ການພັດທະນາຊັບພະຍາກອນມະນຸດ. ປຶກສາຫາລືກັນກ່ຽວກັບ ການຮ່ວມມືໃນຂອບແມ່ນໍ້າຂອງ-ຍີ່ປຸ່ນ ແລະ ສະພາບການພົ້ນເດັ່ນໃນພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນ.
